Na Bodiidi ke Pontšho ya go se Amogelwe ke Modimo?

MODIMO o boditše Baisiraele ba bogologolo gore: “Mo xo lena xo se kê xwa ba le modiitšana.” Se ke ka gobane Molao woo a bego a ba file wona, o be o e-na le ditokišetšo tša go hlokomela badiidi le go ba lokolla dikolotong. (Doiteronomio 15:1-4, 7-10) Ka baka leo, go swanetše go ba go be go se na badiidi gare ga Baisiraele, ka gobane Jehofa o be a holofeditše go ba šegofatša. Lega go le bjalo, tšhegofatšo yeo e be e ithekgile ka go kwa Molao, e lego seo Baisiraele ba paletšwego ke go se dira.

Lega go le bjalo, se se be se sa bolele gore bao ba bego ba e-na le dilo tše di bonagalago tše sego kae ba be ba sa amogelwe ke Modimo, e lego seo gape se sa bolelego gore yo mongwe le yo mongwe yo a bego a humile o be a šegofatšwa ke Modimo. Bontši bja bahlanka ba Modimo ba ba botegago ba be ba diila. Moporofeta Amosi e be e le modiši wa dinku le motho yo a šomago go ya ka dihla. (Amosi 1:1; 7:14) Mehleng ya moporofeta Eliya, ge tlala e be e wetše Isiraele, Eliya o ile a swanelwa ke go ithekga ka moya wa go amogela baeng wa mohlologadi wa modiidi, yoo bupi bja gagwe bjo sego kae le makhura a gagwe di ilego tša dula di oketšwa ka mohlolo. Eliya le mohlologadi yoo ga se ba ka ba huma; Jehofa o ile a ba nea dinyakwa tša bona tša motheo feela.—1 Dikxoši 17:8-16.

Maemo a sa letelwago a dira gore batho e be badiidi. Dikotsi le malwetši di ka dira gore motho a se sa kgona go šoma, e ka ba ka nakwana goba go ya go ile. Lehu le ka dira gore batho e be ditšhiwana le bahlologadi. Gaešita le maemo a bjalo a sa kgahlišego ga se pontšho ya go se amogelwe ke Modimo. Pego ya Naomi le Ruthe ke mohlala o ruthetšago pelo wa tlhokomelo e lerato yeo Jehofa a e neago bao ba se nago sa bona. Gaešita le ge Naomi le Ruthe ba be ba diila ka baka la lehu la banna ba bona, Jehofa Modimo o ile a ba šegofatša gomme a dira tokišetšo ya go hlokomela dinyakwa tša bona.—Ruthe 1:1-6; 2:2-12; 4:13-17.

Go molaleng gore bodiidi ga se bohlatse bja go se amogelwe ke Modimo. Bao ba botegelago Jehofa Modimo ba ka kgothatšwa ke mantšu a Kgoši Dafida a rego: “Ke be ke le lesoxana, ka bá ka tšofala kè sešo ka bôna moloki à lahlilwe, le bana ba xaxwe bà diila.”—Psalme 37:25.

[Seswantšho go letlakala 8]

Gaešita le ge ba be ba diila, Naomi le Ruthe ba ile ba šegofatšwa le go hlokomelwa ka lerato ke Modimo