Bothata bja Lefase ka Bophara, Tharollo ya Lefase ka Bophara

TLAIŠEGO e bonwa gohle gomme batho ba bantši ba arabela go yona ka kwelobohloko. Ka mohlala, bašomi ba tša kalafo ba šoma diiri tše ditelele dipetlele e le gore ba thuše balwetši goba bao ba gobetšego. Bo-raditima-mollo, maphodisa, bathei-ba-molao le bašomi ba tša tlhakodišo ba katanela go imolla goba go thibela tlaišego ya ba bangwe. Maiteko ao a thuša batho bao ba nyakago thušo, eupša ga go motho goba mokgatlo woo o ka kgonago go fediša tlaišego lefaseng ka bophara. Ka mo go fapanego, Modimo a ka kgona gomme o tla tliša tharollo ya lefase ka bophara.

Kgonthišetšo e hwetšwa ka pukung ya mafelelo ya Beibele e rego: “[Modimo] o tla phumola megokgo ka moka mahlong a bona, gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.” (Kutollo 21:4) Ela hloko bogolo bja kholofetšo yeo. E  akaretša morero wa Modimo wa go fediša tlaišego ka moka. O tla dira seo ka go fediša ntwa lefaseng, tlala, bolwetši le go hloka toka gotee le batho ka moka ba kgopo. Ga go motho yoo a ka fihlelelago seo.

Seo Mmušo wa Modimo o Tlago go se Dira

Modimo o tla phethagatša dikholofetšo tša gagwe a diriša motho wa bobedi ka matla legohleng—Jesu Kriste yo a tsošitšwego. Go tla nako yeo ka yona Jesu a tlago go buša lefase ka moka e le Kgoši e sa ganetšwego ke motho. Batho ba ka se sa hlwa ba bušwa ke dikgoši tšeo e lego batho, bapresidente goba bo-radipolitiki. Go e na le moo, ba tla bušwa ke Kgoši e tee le mmušo o tee—Mmušo wa Modimo.

Mmušo woo o tla fediša mmušo o mongwe le o mongwe wa batho. Kgale, Beibele e boletše e sa le pele gore: “Ké mo Modimo a tl’o xo tsoša mmušô wo o ka se kexo wa šwalalanywa neng le neng, wo o ka se kexo wa selêla xo sethšaba se sengwê. O tlo phšatla mebušô e mengwê ka moka wa e fediša; xe e le wôna, o tlo êma xo ya xo ile.” (Daniele 2:44) Batho lefaseng ka bophara e tla ba batee ka tlase ga mmušo o tee wa go loka—Mmušo wa Modimo.

Ge a be a le lefaseng e le motho, Jesu o boletše gantši ka Mmušo woo. O boletše ka wona thapelong ya mohlala gomme a laela barutiwa ba gagwe gore ba rapele ka tsela ye: “Mmušo wa gago a o tle. Thato ya gago a e direge le mo lefaseng bjalo ka ge e direga legodimong.” (Mateo 6:10) Ela hloko gore Jesu o bontšhitše gore Mmušo o tswalana le go dirwa ga thato ya Modimo lefaseng e bile ke thato ya Modimo go fediša tlaišego lefaseng ka bophara.

Mmušo wa go loka wa Modimo o tla tliša ditšhegofatšo tšeo go sego mmušo wa batho woo o ka di tlišago. Gopola gore Jehofa o neetše Morwa wa gagwe e le topollo bakeng sa gore batho ba ka hwetša bophelo bjo bo sa felego. Ka tlase ga pušo e lerato ya Mmušo, batho ba tla phethagala ganyenyane-ganyenyane. Ka mafelelo afe? Jehofa “lehu ó tlo le tloša ka xo sa felexo; Mong ’a bohle Morêna ó tlo phomola mexôkxô mahlong ohle.”—Jesaya 25:8.

Ba bangwe ba ka botšiša gore: ‘Ke ka baka la’ng Modimo a se a hlwa a gata mogato? O letetše’ng?’ Nkabe e le kgale Jehofa a gatile mogato wa go fediša goba gaešita le go thibela tlaišego ka moka. Go e na le moo, o e dumeletše gore e tšwele pele, e sego ka lebaka le ge e le lefe la boithati, eupša e le bakeng sa go hola bana ba gagwe ba lefaseng ka mo go sa felego. Batswadi ba lerato ba ka dumelela ngwana wa bona go tsena mathateng ge e ba ba tseba gore se se tla ba tlišetša mehola e swarelelago. Ka mo go swanago, go na le mabaka a kwagalago a gore Modimo a dumelele batho go tlaišega ka nakwana gomme mabaka a a hlaloswa ka Beibeleng. A akaretša dilo tše bjalo ka tokologo ya boikgethelo, sebe le kgang ya mabapi le go swanelega ga bogoši bja Jehofa. Beibele gape e hlalosa gore sephedi se sebe sa moya se dumeletšwe go buša lefase ka nako e lekanyeditšwego. *

Gaešita le ge re ka se kgone go ahla-ahla mabaka ao ka baka la sekgoba se senyenyane, go na le dintlha tše pedi tšeo di ka re neago kholofelo le kgothatšo. Ya mathomo še: Jehofa o tla re šegofatša go feta tlaišego le ge e le efe yeo re kilego ra ba le yona. Go oketša moo, Modimo o re kgonthišetša gore: “Tša kxalê di ka se hlwê di tsebywa, le mo pelong ya motho di ka se hlwê di rotoxa.” (Jesaya 65:17) Modimo o tla fediša, ka mo go feletšego le sa ruri, masetlapelo le tlaišego tšeo di bakwago ke go dumelelwa ga nakwana ga bobe.

Ntlha ya bobedi še: Modimo o beile nako yeo e ka se fetošwego ya go fediša tlaišego. Gopola gore moporofeta Habakuku o ile a botšiša gore na Jehofa o be a tla dumelela bošoro le tshele nako e kaaka’ng. Jehofa o ile a araba ka gore: “Pônô e beetšwe lebaka la yôna; e . . . ka se diêxe.” (Habakuku 2:3) Bjalo ka ge re tla bona sehlogong se se latelago, ‘lebaka leo le beilwego’ le kgaufsi.

[Mongwalo wa tlase]

 [Lepokisi go letlakala 7]

Mangwalo ao a Bolelago ka Bokamoso bjo bo Phadimago

GA GO SA NA DINTWA:

“Tlang, Le bônê! Šé medirô ya Morêna, Mo-hlôla-thšoxô-faseng, Mo-fediša-dintwa xo fihla mafelong a lefase.”—Psalme 46:8, 9.

BARATIWA BA A BOA:

“Go tla ba le tsogo ya ba lokilego gotee le ba sa lokago.”—Ditiro 24:15.

DIJO BAKENG SA BOHLE:

“Xo tlo ba le mohora wa mabêlê’ mo naxeng; ’phoxong tša thaba meré ya dienywa e tlo xwaša.”—Psalme 72:16.

GO KA SE SA BA LE BOLWETŠI:

“Mo xo ba ba axilexo fá xo ka se bê le e a rexo: Ke a babya!”—Jesaya 33:24.

BATHO BA KGOPO BA KA SE SA BA GONA:

“Ba babe ba tlo fedišwa naxeng; bakxeloxi ba tlo rakwa mo xo yôna.”—Diema 2:22.

TOKA E TLO ATA:

“Tsebang! Xo tlo bewa kxoši [Kriste Jesu] ya xo buša ka xo loka, ya bakxôma ba moahlolêlô wo o lokilexo.”—Jesaya 32:1.

[Diswantšho go letlakala 7]

Mmušo wa Modimo o tla tloša tlaišego le ge e le efe yeo re bego re e-na le yona