Go nea Khomotšo ka Morago ga Polao e Sehlogo

SEKOLONG LETLAKALA la mathomo la kuranta e be e le le leso ka moka. Letlakaleng leo go be go ngwadilwe gore: “Ke ka baka la’ng?” Ye ke potšišo yeo e ilego ya botšišwa leboelela ka morago ga ge mošemane wa nywaga e 17 a thuntšhitše batho kua Winnenden ka borwa bja Jeremane, a bolaya batho ba 15 gomme mafelelong a ipolaya. Difolaga tša Jeremane ka moka di ile tša theošwa gomme ditaba tša mabapi le tiragalo ye e sehlogo di ile tša phatlalala ka go akgofa lefaseng ka bophara.

 Winnenden ke motse o atlegilego le o kgahlišago woo o dikologilwego ke dirapa tša merara le tša dienywa tše dingwe. Letšatši la March 11, 2009, le thomile e le le le tlwaelegilego Sekolong se se Phagamego sa Albertville. Gatee-tee ka 9:30 mesong, go ile gwa thoma bošoro le moferefere.

Mošemane o ile a tsena a galefile sekolong seo a kilego a tsena go sona a swere sethunya seo a se tšerego ka phapošing ya go robala ya batswadi ba gagwe. Kapejana ka go latelana, o ile a thuntšha barutwana ba senyane le barutiši ba bararo ka diklaseng tše tharo le ka seferong, a gobatša le ba bangwe ba mmalwa. Maphodisa a ile a fihla ka morago ga metsotso e sego kae. Mmolai o ile a tšhabela lebaleng la kgaufsi le kliniki ya malwetši a monagano. Moo o ile a bolaya mošomi yo itšego. Ke moka o ile a amoga mootledi yo mongwe koloi ka kgang gomme a sepela le yena a mo šupile ka sethunya. Mootledi o ile a kgona go tšhaba ka morago ga dikhilomithara tše e ka bago tše 40. Ge a be a le moo go rekišwago dikoloi, mošemane yoo yo a swerego sethunya o ile a bolaya morekiši le moreki gomme a gobatša maphodisa a mabedi o šoro ao a bego a leka go mo swara. Mafelelong ge maphodisa a be a mo swara, o ile a ipolaya ka go ithuntšha hlogong.

Go ya ka bao ba bego ba tseba mošemane yo, e be e le mofsa yo a lego mahlalagading yo a tlwaelegilego yoo a bego a nyaka go amogelwa ke ba bangwe le go ba le bagwera. Go senyegile kae? Go ka direga gore o be a gateletšegile maikwelong gomme a tlwaetše go bapala ka dithunya tša go bapadišwa (air guns) le dipapadi tše dingwe tše tumilego tša bošoro tša khomphutha. Ba bangwe ba ka re, eupša go bjalo le ka bafsa ba bangwe ba dikete. Le gona, go thwe’ng ka bahlaselwa? Na o ile a kgetha ba itšego goba o be a fo thunya a sa kgethe? Go ile gwa ba le dikakanyo mabapi le lebaka leo ka lona a ilego a thunya banenyana ba seswai le mošemane o tee feela. Ga go na motho yoo a ilego a nea tlhaloso e kwagalago.

Go Arabela Kapejana

Heike o gopola ka gore: “Ge morwa wa rena a be a re leletša mogala gomme a re botša ka tiragalo ya go thuntšhwa ga batho sekolong, ke be ke sa kgolwe. Eupša ge ke be ke e-kwa dikoloi tše dintši tša maphodisa le dikoloi tša go rwala balwetši di kitimela moo, ke ile ka tšhoga.” Go ka direga gore go arabela kapejana ga maphodisa go ile gwa thibela mošemane yoo go bolaya batho ba oketšegilego sekolong seo. Ka morago ga gore batho ba ntšhwe sekolong, bašomi ba tša kalafo ba tšhoganetšo, baeletši ba tša monagano le baruti ba mašole ba ile ba tla lefelong la kotsi gomme ba ba ba lapišwa ke go šoma ka thata bakeng sa go hlokomela barutwana.

Kapejana babegi ba ditaba ba ile ba kopana sekolong, ba leka go boledišana le barutwana, bao bontši bja bona bo bego bo sa tšhogile. Morutwana yo mongwe o ile a kgona go bala dikoloi tše 28 tša diteišene tše 26 tše fapa-fapanego tša thelebišene di eme pele ga sekolo. Phadišano e be e le e kgolo magareng ga mekero ya ditaba, e lego seo se lebišitšego dipegong tšeo di se nago bohlatse. Mmegi yo mongwe wa ditaba o ile a etela lapa labo ngwanenyana yo a bolailwego letšatšing leo go kgopela diswantšho gomme ba bangwe ba ile ba lefa barutwana gore ba ba tšee diswantšho. Ba kgahlilwe ke tiragalo yeo, babegi ba bangwe ba ditaba ba ile ba thatafalelwa ke go bontšha teka-tekano magareng ga go hwetša ditaba tšeo ba ka di begago pele ga ba bangwe le go bontšha go naganela le go hlompha bahlaselwa.

Ka ge se se direga gantši maemong a bjalo, batho ba ile ba retologela bodumeding go hwetša khomotšo le ditlhaloso. Letšatšing la polao ye e sehlogo go ile gwa swarwa kopano ya dihlopha tše di fapa-fapanego tša bodumedi. Ba bantši ba ile ba leboga thekgo yeo. Eupša bao ba bego ba nyaka khomotšo e tšwago Lentšung la Modimo goba dikarabo tša dipotšišo tša bona tše di hlobaetšago ba ile ba nyama o  šoro. Lapa le lengwe le ile la ba gona tirelong ya poloko ya morutwana yo a bego a tsena ka klaseng e tee le morwa wa bona. Mmagwe o ile a bolela gore: “Mopišopo o ile a bolela ka tlaišego ya Jobo. Ke ile ka letela gore a hlalose seo re ka ithutago sona goba gore a nee khomotšo e itšego—eupša ga se a ka a dira bjalo. Ga go na lentšu leo a le boletšego mabapi le mabaka ao a dirilego gore Jobo a tlaišege goba mabapi le mafelelo a tlaišego ya gagwe.”

Monna yo mongwe o be a befedišitšwe ke mantšu a se nago mohola ao a a kwelego. Monna yoo o be a ile a ithuta Beibele le Dihlatse tša Jehofa nywageng e ka bago e 30 e fetilego eupša a ile a kgaotša. Ga bjale o ile a thoma go ya dibokeng gape.

Valisa, ngwanenyana wa nywaga e 14 yo a ithutago Beibele ka mehla le Dihlatse, o be a le ka klaseng kgaufsi le lefelo leo go diregilego tšhollo ye ya madi go lona. Ka morago ga go kwa modumo wa sethunya, o ile a thoma go rapela Jehofa. Ka morago, ge a botšišwa kamoo a bego a lebeletšana le boemo bjo ka gona, o ile a bolela gore ditiragalo tše di tiišitše seo a ithutilego sona go tšwa Beibeleng mabapi le mehla ye ya bofelo yeo e hlobaetšago. (2 Timotheo 3:1-5) Dihlatse tše pedi di be di swaregile ka go boledišana le baagišani ba tšona ka mantšu a homotšago. Mokgekolo yo mongwe o ile a di batamela gomme a re, “Batho ba bantši ba swanetše go dira seo le se dirago.” Gaešita le ge polao yeo e sehlogo e be e nyamiša e bile e tšhoša, e ile ya tutueletša ba bangwe go theetša kholofetšo le khomotšo e tšwago Lentšung la Modimo.

Mafelelo a sa Kgahlišego a Tiragalo

Ke therešo gore gaešita le mantšu a tšwago pelong a khomotšo a ka se tloše letšhogo le go nolega moko mo go kwewago ke bao ba kgomegilego ka go lebanya. Ga go mantšu ao a ka tlošago ka mo go feletšego bohloko bjo bo kwewago ke motswadi yo a hwetšwego ke ngwana goba bjo bo kwewago ke lephodisa leo le ilego la kitimela sekolong gomme la hwetša gore mosadi wa lona e be e le yo mongwe wa bao ba bolailwego.

Barutwana bao ba ilego ba phologa masetlapelo ao, gotee le malapa a bona, ba ile ba kwa bohloko ka mo go tseneletšego, yo mongwe le yo mongwe ka tsela ya gagwe. Vassilios o ile a tšwa moagong ka mojako wa tšhoganetšo ka morago ga gore mošemane yoo a thome go thuntšha. O gopola ka gore: “Ge ke be ke e-tšwa ka lefasetere, ke ile ka rapela Jehofa. Ke be ke nagana gore ke tlo hwa. Ke be ke kgonthišegile gore ye e be e le thapelo ya-ka ya mafelelo.” Dibekeng tše di latetšego, o ile a tlaišwa ke ditoro tše di boifišago gomme a sa nyake go bolela le motho. O ile a kgopišwa kudu ke go bona mekero ya ditaba e be e phadišana ka go bega ditaba ka polao ye e sehlogo gotee le go hloka maikwelo ga bao ba bego ba nyaka go hwetša ditaba ka botlalo. Ge nako e dutše e e-ya, o ile a kgona go amogela maemo kamoo a lego ka gona.

Jonas o be a le ka klaseng yeo Vassilios a bego a le ka go yona gomme o ile a bona ge barutwana-gotee le yena ba bahlano ba bolawa. O itše: “Ka morago ga tiragalo ye, ke ile ka kgona go hlalosa seo se diregilego; go be go le bjalo ka ge eka ke filimi e boifišago. Eupša ga bjale ke thatafalelwa ke go bolela kamoo ke ikwago ka gona. Maikwelo a-ka a a feto-fetoga. Ka dinako tše dingwe ga ke nyake go bolela ka yona; mola ka dinako tše dingwe ke bolela kudu ka yona.” Le yena o lora ditoro tše di boifišago e bile o a hlobaela bošego.

Ka morago ga matšatši a mmalwa, barutwana ba ile ba newa dithoto tša bona tšeo di bego di le ka diklaseng. Ditsebi tša kgateletšego ya monagano di ile tša lemoša ka gore go bona dithoto tšeo go ka dira gore barutwana ba gopole tiragalo yeo. Mathomong, Jonas o be a sa nyake go kgwatha baki ya gagwe, mokotla wa dipuku le helemete ya gagwe ya sethuthuthu. Gape o be a tšhoga kudu nako le nako ge a be a bona motho yo a swerego sethunya goba a swerego mokotla wa go bepulwa wo e ka rego ke wa go swara sethunya. Ge batswadi ba gagwe ba be ba  bogetše filimi gomme go kwagala modumo wa sethunya, o be a tšhoga kudu. Ditsebi tša kgateletšego ya monagano di ile tša leka go thuša bahlaselwa go se nagane ka dilo tšeo di tswalanago le tiragalo yeo ya masetlapelo.

Jürgen, tatago Jonas, o šoma kliniking yeo go yona go ilego gwa bolawa mošomi. O boletše gore batswadi ba bantši le bašomi-gotee ba be ba itlhokofatša ka dipotšišo tše di rego: ke ka baka la’ng? le go thwe’ng ge nkabe? Ka mohlala, mošomi wa kliniking yoo a bonego mošemane yo itlhamilego ka sethunya a feta, o ile a tshwenywa kudu maikwelong ke kgopolo ya gore mošemane yoo a ka be a ile a mo thuntšha, moo go ilego gwa nyakega gore a hwetše kalafo ya tša monagano.

Kamoo ba Bangwe ba Ilego ba Thušwa go Lebeletšana le Boemo

Ke’ng seo se thušitšego ba bangwe go lebeletšana le boemo bjo bjalo bjo bo boifišago kudu? Jürgen o re: “Gaešita le ge ka dinako tše dingwe go le thata, ke mo go kgahlišago go ba le ba bangwe. Go tseba gore batho ba bangwe ba tshwenyegile ka wena, le gore ga o noši, go a thuša.”

Jonas gape o leboga gore ba bangwe ba tshwenyega ka yena, o re: “Batho ba bantši ba romela dikarata le melaetša. Ba bangwe ba bolela ka ditemana tša Beibele, tšeo ke bego ke di bala ka nako yeo. Seo ke se sebotse.” Ke’ng gape seo se mo thušago? “Ge ke phafoga bošego gomme ke palelwa ke go lebeletšana le boemo, ke a rapela. Ka dinako tše dingwe ke theetša mmino goba dikgatišo tšeo di theetšwago tša Phafoga!” * O oketša ka gore Beibele e re botša lebaka leo ka lona dilo tše ka moka di ilego tša direga: Sathane o buša lefase gomme re phela mehleng ya bofelo. Tatagwe o bolela gore tsebo e bjalo e ba thuša go lebeletšana le boemo bjoo.

Kgaufsinyane go ka se sa ba le Tlaišego

Ka matšatši a mmalwa feela, go be go e-na le dikerese, matšoba le mangwalo ka pele ga sekolo. Kerstin o lemogile gore batho ba mmalwa ba ile ba ngwala ba botšiša lebaka leo ka lona seo se ilego sa direga le lebaka leo ka lona Modimo a ilego a se dumelela. A nagana gore dipotšišo tše di nyaka karabo, yena le Dihlatse tše dingwe tše pedi ba ile ba ngwala lengwalo gomme ba le bea magareng ga mangwalo a mangwe.

Tirelong ya semmušo ya segopotšo sa tiragalo ye, seteišene sa thelebišene se ile sa bontšha lengwalo la gagwe gomme sa tsopola methaladi ya pele e rego: “Ke ka baka la’ng? Mehleng ye ya bofelo, potšišo ye e be e dutše e botšišwa gantši, kudu-kudu dipotšišo tše di rego: Modimo o be a le kae? Le gona, ke ka baka la’ng a ile a dumelela se?” Go a nyamiša gore tsopolo e kgaoditše moo.

Ke ka baka la’ng go nyamiša? Ka gobane lengwalo le tšwela pele go hlalosa mathomo a tlaišego ka moka gomme la bolela gore Modimo “o tla kgonthiša gore tshenyo ka moka yeo batho ba e bakilego e tla fedišwa.” Ke moka le oketša ka gore: “Ka pukung ya mafelelo ya Beibele, Modimo o re o tla phumola megokgo ka moka mahlong a batho, gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.” Jehofa Modimo o tla tsoša gaešita le bahu. Ka tlase ga Mmušo wa gagwe wo o tlago kgaufsinyane, go ka se be le masetlapelo, dipolao tše sehlogo goba tlaišego. Modimo o holofeditše gore: “Bonang! dilo ka moka ke di dira tše mpsha.”—Kutollo 21:4, 5.

[Mongwalo wa tlase]

[Seswantšho go letlakala 12]

Jonas o amogetše karata yeo e rego, “Re nagana ka wena”

[Mothopo wa Seswantšho go letlakala 9]

Focus Agency/WPN

[Mothopo wa Seswantšho go letlakala 9]

© imagebroker/Alamy

[Mothopo wa Seswantšho go letlakala 10]

Foto: picture alliance

[Mothopo wa Seswantšho go letlakala 11]

Foto: picture alliance