Ekišang Tumelo ya Bona

O Ithutile Boikokobetšo go Mong wa Gagwe

PETRO o be a ka se tsoge a lebetše nako ya ge mahlo a bona a be a kopana. Na o ile a bona bohlatsenyana bja gore Jesu o nyamile goba o galefile? Re ka se ke ra kgodišega; pego e buduletšwego e bontšha feela gore “Morena a retologa a lebelela Petro.” (Luka 22:61) Eupša ka go lebelelwa moo, Petro o ile a lemoga kamoo yena a paletšwego ka gona. O ile a lemoga gore o dirile sona selo seo Jesu a bego a mmoditše gore o tlo se dira, selo seo yena a bego a gapeletša gore a ka se tsoge a se dirile—o be a latotše Mong wa gagwe. E be e le boemo bjo bo nyamišago go Petro, mohlomongwe boemo bjo bo nyamišago bja letšatši le le nyamišago bophelong bja gagwe.

Lega go le bjalo, bjo e be e se boemo bja go dira gore Petro a hloke kholofelo. Ka ge Petro a be a e-na le tumelo e kgolo, o be a sa dutše a e-na le sebaka sa go lokiša diphošo tša gagwe le go ithuta thuto e nngwe dithutong tša Jesu tše bohlokwa. E be e le mabapi le go lebalela. Yo mongwe le yo mongwe wa rena o swanetše go ithuta thuto ye, ka gona, a re latele Petro leetong le le thata.

Monna yo a Swanetšego go Ithuta go Gontši

Dikgwedi tše e ka bago tše tshela pejana, motseng wa gabo wa Kaperenaume, Petro o ile a batamela Jesu gomme a mmotšiša gore: “Morena, ngwanešo o swanetše go ntshenyetša gakae gomme nna ke mo lebalele gakae? Go fihla ga šupa?” Mohlomongwe Petro o be a nagana gore o be a bontšha go naganela. Go ba gona, baetapele ba bodumedi ba mehleng yeo ba be ba ruta gore motho o swanetše go lebalela gararo feela! Jesu o ile a araba ka gore: “E sego go fihla ga šupa, eupša go fihla ga masome-šupa-šupa.”—Mateo 18:21, 22.

Na Jesu o be a šišinya gore Petro a bale gore motho o mo senyetša gakae? Aowa, go e na le moo, ka go fetola 7 yeo e bego e šišinywa ke Petro go ba 77, o be a e-ra gore tebalelo ga e na palo. Jesu o be a bontšha gore Petro o be a tutueditšwe ke moya wa bopelothata le wa go se lebalele woo o bego o phatlaletše mehleng yeo, wa go balela diphošo bjalo ka ge eka di ngwalwa ka pukung ya dikoloto. Lega go le bjalo, tebalelo ya Modimo ga e na tekanyo.

Petro ga se a ka a ngangišana le Jesu. Eupša, na thuto ya Jesu e be e fihleletše pelo ya gagwe? Ka dinako tše dingwe re ithuta dilo tše dintši mabapi le go lebalela ge le rena re nyaka go lebalelwa. Ka gona a re boele ditiragalong tšeo di ilego tša direga pele Jesu a bolawa. Diiring tšeo tše di gateletšago, Petro o dirile dilo tše dintši tšeo Mong wa gagwe a bego a swanetše go mo lebalela tšona.

Go Nyakega mo Gogolo ga Tebalelo

E be e le bošego bja ditiragalo tše dintši—bošego bja mafelelo bja bophelo bja Jesu bja lefaseng. Jesu o be a sa na le dilo tše dintši tšeo a bego a swanetše go di ruta baapostola ba gagwe—ka mohlala, mabapi le boikokobetšo. Jesu o beile mohlala ka go ba hlapiša maoto ka boikokobetšo, e lego mošomo woo gantši o newago bahlanka ba maemo a tlase. Sa pele, Petro o ile a se kwešiše seo Jesu a bego a se dira. Ke moka o ile a gana go hlapišwa maoto. Ka morago ga moo, a gapeletša gore Jesu a se mo hlapiše maoto feela eupša a mo hlapiše diatla le hlogo! Jesu ga se a ka a fela pelo eupša o ile a mo hlalosetša bohlokwa le seo se bolelwago ke go ba hlapiša maoto ga gagwe.—Johane 13:1-17.

 Lega go le bjalo, nakwana ka morago ga moo baapostola ba ile ba thoma go ngangišana ka gore ke mang yo mogolo gare ga bona. Ka ntle le pelaelo Petro o ile a tšea karolo ngangišanong yeo ye e bontšhago go ikgogomoša ga batho. Go sa šetšwe seo, Jesu o ile a ba phošolla ka botho a ba a ba reta ka dilo tšeo ba di dirilego gabotse—ka go bontšha potego ya go kgomarela Mong wa bona. Lega go le bjalo, o ile a ba botša gore ba be ba tlo mo tlogela. Petro o ile a araba ka gore o be a tla kgomarela Jesu le ge a lebane le lehu. Jesu o ile a porofeta gore, go fapana le seo, Petro o be a tlo Mo latola gararo bošegong bjona bjoo pele mogogonope o lla gabedi. Ke moka, Petro ga se a fo thulana le polelo ya Jesu eupša o ile a ba a bolela ka boikgantšho gore o tla botega go feta baapostola ba bangwe!—Mateo 26:31-35; Mareka 14:27-31; Luka 22:24-28.

Na Jesu o be a le kgaufsi le go galefela Petro? Ge e gabotse, nakong ye ka moka e thata, Jesu o ile a tšwela pele a šetša botse go baapostola ba gagwe ba sego ba phethagala. O be a tseba gore Petro o tlo mo nyamiša, lega go le bjalo, o boletše gore: “Ke go lopetše gore tumelo ya gago e se ke ya fela; gomme wena, ge o šetše o boile o matlafatše bana beno.” (Luka 22:32) Ka go rialo, Jesu o ile a bontšha gore o kgodišegile gore bomoya bja Petro bo be bo tla boela sekeng gomme a boela tirelong ya gagwe ya potego. Ruri wo ke moya wa botho le wa go lebalela!

Ka morago, serapeng sa Getsemane, Petro o ile a swanelwa ke go phošollwa gantši. Jesu o ile a mo kgopela, gotee le Jakobo le Johane, gore ba phafoge ge Yena a rapela. Jesu o be a e-kwa bohloko maikwelong gomme a nyaka thekgo, eupša Petro le ba bangwe ba ile ba robala leboelela. Jesu o ile a bontšha go ba kwela bohloko le go lebalela ka go bolela gore: “Go ba gona, moya o mafolofolo, eupša nama e a fokola.”—Mareka 14:32-38.

Go se go ye kae, lešaba le ile la tla le swere mabone e bile le itlhamile ka melamo le ditšhoša. Bjale e be e le nako ya go dira dilo ka temogo le bohlale. Lega go le bjalo, Petro o ile a kitimela go tsena ntweng, a hwidinya tšhoša ya gagwe hlogong ya Malekose, mohlanka wa moperisita yo a phagamego, gomme a mo kgaola tsebe. Jesu o ile a phošolla Petro ka botho, a fodiša ntho ya Malekose, gomme a hlalosa molao wa motheo wa go se tsene dintweng woo o hlahlago bahlanka ba gagwe go fihla le lehono. (Mateo 26:47-55; Luka 22:47-51; Johane 18:10, 11) Petro o be a šetše a dirile diphošo tše dintši tšeo go nyakegago gore Mong wa gagwe a mo lebalele tšona. Boemo bja gagwe bo ka re gopotša gore “ka moka ga rena re kgopša gantši.” (Jakobo 3:2) Ke mang mo go rena yo a sa nyakego go lebalelwa ke Modimo letšatši le lengwe le le lengwe? Lega go le bjalo, go Petro go be go sa na le dilo tše dintši tšeo di bego di tlo direga. Dikgolo di be di sa e-tla.

Go Palelwa o Šoro ga Petro

Jesu o ile a hlalosetša lešaba gore ge e ba le nyaka yena, le swanetše go tlogela baapostola ba gagwe ba sepele. Petro o ile a fo lebelela ge lešaba le tlema Jesu. Ke moka Petro o ile a tšhaba, bjalo ka baapostola ba bangwe.

Petro le Johane ba ile ba kgaotša go tšhaba, mohlomongwe kgaufsi le motse wa Annase, monna yo e kilego ya ba Moperisita yo a Phagamego, moo Jesu a ilego a išwa gona la mathomo bakeng sa go botšološišwa. Ge Jesu a be a tlošwa moo, Petro le Johane ba ile ba latela eupša ba “le kgojana.” (Mateo 26:58; Johane 18:12, 13) Petro e be e se lefšega. Go be go tloga go nyakega sebete gore a ba šale morago. Lešaba le be le itlhamile, gomme Petro o be a šetše a gobaditše yo mongwe wa bona. Lega go le bjalo, mo mohlaleng wa Petro ga re bone mohuta wa lerato le le sa kwanantšhego leo a boletšego ka lona—boikemišetšo bja go hwa le Mong wa gagwe ge e ba go nyakega.—Mareka 14:31.

Go swana le Petro, ba bantši lehono ba nyaka go latela Kriste ba “le kgojana”—ka tsela yeo e lego gore ba bangwe ba ka se ba lemoge. Eupša bjalo ka ge Petro ka boyena a ile a ngwala ka morago, tsela feela ya go latela Kriste ka mo go swanetšego  ke ka go mo gomarela kgaufsi kudu ka mo go nyakegago, go ekiša mohlala wa gagwe dilong tšohle, go sa šetšwe seo se diregago.—1 Petro 2:21.

Petro o ile a šala lešaba leo morago go fihlela a fihla go e nngwe ya dikgoro tša dintlo tše dikgolo tša Jerusalema. E be e le legaeng la Kayafa, moperisita yo phagamego yo a humilego le yo matla. Dintlo tše bjalo di be di agwa go dikologa lapa, kgoro e e-ba ka pele. Petro o ile a fihla kgorong gomme a se dumelelwe go tsena. Johane, yo a bego a šetše a le ka gare, o ile a tla gomme a dira gore moleta-kgoro a dumelele Petro go tsena. Go bonala Petro a se a ka a dula le Johane; goba a ile a leka go tsena ka ntlong gore a be ka lehlakoreng la Mong wa gagwe. O ile a dula ka lapeng, moo makgoba le bahlanka ba bangwe ba bego ba fetša diiri tša bošego bjo bo tonyago ba oretše mollo, ba lebeletše ge dihlatse tša maaka di be di eme mothalading o bego o thoma ka gare o tšwela ka ntle di tsena di e-ya ka tshekong.—Mareka 14:54-57; Johane 18:15, 16, 18.

Moo mollong, ngwanenyana yo a dumeletšego Petro go tsena o ile a kgona go mmona gabotse. O be a mo tseba. O ile a mo latofatša a re: “Le wena, o be o e-na le Jesu Mogalilea!” A se a letela seo, Petro o ile a latola Jesu—goba gaešita le go kwešiša seo ngwanenyana a bego a se bolela. O ile a ya go ema kgaufsi le kgoro, a leka gore a se bonagale gabotse, eupša ngwanenyana yo mongwe o ile a mo tseba gomme a bolela ka tsela e swanago gore: “Motho yo o be a e-na le Jesu wa Monatsaretha.” Petro o ile a ena a re: “Motho yo ga ke mo tsebe!” (Mateo 26:69-72) Mohlomongwe e be e le ka morago ga ge a mo latotše labobedi moo Petro a ilego a kwa mogogonope o lla, eupša o be a šitišegile kudu go ka gopola boporofeta bjoo Jesu a bo boletšego diiri tše mmalwa pejana.

Nakwana ka morago, Petro o be a sa leka ka matla gore a se lemogwe. Eupša sehlopha sa batho seo se bego se eme kgorong se ile sa batamela. Yo mongwe go sona o be a tswalane le Malekose, mohlanka yoo Petro a mo gobaditšego. O ile a re go Petro: “Na ga se ka go bona serapeng o e-na le yena?” Petro o ile a ikwa a gapeletšega go kgodiša sehlopha seo gore se fošitše. Ka gona o ile a ena, gomme go bonagala a ile a bolela gore a rogakwe ge e ba a bolela maaka. Mogogonope o ile wa lla gatee-tee ka morago ga gore a bolele mantšu ao—wa bobedi woo Petro a o kwelego bošegong bjoo.—Johane 18:26, 27; Mareka 14:71, 72.

Jesu o be a sa tšwa go fihla mathuding a lebanego le kgoro. Ka yona nako yeo, ka ge go hlalositšwe matsenong, mahlo a gagwe a ile a kopana le a Petro. Petro ka yona nako yeo o ile a lemoga kamoo a nyamišitšego Mong wa gagwe ka gona. Petro o ile a tloga lapeng leo, a ikwa a le molato kudu. O ile a ya ditseleng tša motse woo, a bonegetšwe ke ngwedi wa letopa-nta. O be a se sa bona gabotse. O ile a tlala megokgo. O ile a hlabega gomme a lla gabohloko.—Mareka 14:72; Luka 22:61, 62.

Ka morago ga go lemoga bogolo bja phošo ye,  go bonolo go motho go nagana gore sebe sa gagwe ke se segolo kudu moo se ka se lebalelwego. Petro a ka ba a ile a ipotšiša ge e ba a tla lebalelwa. Na o tla lebalelwa?

Na Petro o be a sa Swanelwe ke Tebalelo?

Go thata go nagana ka bohloko bjoo Petro a bego a bo kwa ge letšatši le be le dutše le hlaba le ditiragalo tša letšatši leo di dutše di direga. O swanetše go ba a ile a itshola ge Jesu a be a e-hwa thapameng yeo ka morago ga go tlaišwa! Petro a ka ba a be a tshwenyega ge a nagana kamoo a ka bego a tlaleleditše bohlokong bja Mong wa gagwe go seo se feleleditšego ka go ba letšatši la mafelelo la bophelo bja Gagwe e le motho mo lefaseng. Go sa šetšwe bohloko bjoo a ka bego a be a bo-kwa, Petro ga se a ka a dumelela manyami a mo fenya. Re tseba seo ka gobane pego e re o ile a ba le bana babo gape. (Luka 24:33) Ga go pelaelo gore baapostola ka moka ba ile ba itshola ka baka la tsela yeo ba ilego ba itshwara ka yona bošegong bjoo bja lefsifsi, gomme ba ile ba homotšana.

Ka tsela e itšego, mo re bona Petro a dira e nngwe ya diphetho tša gagwe tše bohlale. Ge mohlanka wa Modimo a e-wa, taba-kgolo ga se bogolo bja sebe sa gagwe eupša ke matla a go ikemišetša gagwe go tsoga, le go lokiša ditaba. (Diema 24:16) Petro o ile a bontšha tumelo ya kgonthe ka go bokana gotee le bana babo go sa šetšwe go ikwa ga gagwe a nyamile. Ge motho a imelwa ke manyami goba a itshola, go ipea lekatana go ka bonala go kgahliša eupša go kotsi. (Diema 18:1) Tsela e bohlale e ka ba go ba kgaufsi le badumedi-gotee le go matlafala gape moyeng.—Baheberu 10:24, 25.

Ka ge a be a e-na le bana babo ba moya, Petro o ile a kwa ditaba tše nyamišago tša gore setopo sa Jesu ga se gona ka lebitleng. Petro le Johane ba ile ba kitimela lebitleng leo Jesu a bego a bolokilwe go lona gomme mojako o tswaletšwe. Johane, mohlomongwe ka ge e be e le yo monyenyane, o fihlile pele. O ile a dika-dika ge a bona mojako wa lebitla o bulegile. E sego Petro. Le ge a be a fegelwa, o ile a fetela ka lebitleng. Le be le se na selo!—Johane 20;3-9.

Na Petro o be a dumela gore Jesu o tsogile bahung? Mathomong o be a sa dumele, gaešita le ge basadi ba botegago ba begile gore barongwa ba  tšweletše go bona ba ba botša gore Jesu o tsogile bahung. (Luka 23:55–24:11) Eupša mafelelong a letšatši leo, dika ka moka tša manyami le dipelaelo pelong ya Petro di be di phumogile. Ga bjale Jesu o be a phela e le sebopiwa se matla sa moya! O ile a tšwelela go baapostola ba gagwe ka moka. Lega go le bjalo, o ile a dira selo se sengwe pele, ka sephiring. Baapostola ba boletše letšatšing leo gore: “Ka kgonthe, Morena o tsogile gomme o bonagetše go Simone!” (Luka 24:34) Ka mo go swanago, moapostola Paulo ka morago o ile a ngwala mabapi le letšatši leo le legolo gore Jesu “o bonagetše go Kefase, ke moka a tla a bonagala go ba lesome-pedi.” (1 Bakorinthe 15:5) Kefase le Simone ke maina a mangwe a Petro. Jesu o bonagetše go yena letšatšing leo—bohlatse bo bontšha gore nakong ya ge Petro a be a nnoši.

Ka Beibeleng, ditaba ka botlalo mabapi le poelano yeo ye e kgomago pelo di tsebja ke Jesu le Petro. Re ka fo nagana kamoo Petro a ilego a kgomega ka gona ge a be a bona Morena wa gagwe yo a rategago a phela gape le go ba le sebaka sa go kgopela tebalelo le go bontšha gore o a itshola. O be a nyaka tebalelo go feta selo le ge e le sefe lefaseng. Ke mang yo a ka belaelago gore Jesu o ile a mo lebalela, le gona ka kudu? Bakriste bao lehono ba welago sebeng ba swanetše go gopola pego ya Petro. Le ka mohla ga se ra swanela go nagana gore ga re swanelwe ke tebalelo ya Modimo. Ka mo go phethagetšego, Jesu o ile a ekiša Tatagwe, “wa tebalêlô e nntši.”—Jesaya 55:7.

Bohlatse bjo bo Oketšegilego bja Tebalelo

Jesu o ile a botša baapostola ba gagwe gore ba ye Galilea, moo ba bego ba tla kopana le yena. Ge ba goroga, Petro o ile a dira phetho ya go yo rea dihlapi Lewatleng la Galilea. Ba bangwe ba mmalwa ba ile ba sepela le yena. Lebakeng le gape, Petro o ile a ikhwetša a le letsheng leo a feditšego nywaga ya gagwe e mentši ya peleng go lona. Modumo wa sekepe, modumo wa maphoto ge a bethana le sekepe, le go gwaša ga malokwa ka diatleng tša gagwe e ka ba e le dilo tšeo di bego di bonagala a sa tlwaelane le tšona. Na bošegong a ka ba a be a naganišiša ka tsela yeo a swanetšego go phela ka ge bjale bodiredi bja Jesu bja lefaseng bo fihlile mafelelong? Na a ka ba a be a rata go boela bophelong bjo bonolo bja go rea dihlapi? Maemong le ge e le afe, ga se ba ka ba swara dihlapi bošegong bjoo.—Mateo 26:32; Johane 21:1-3.

Lega go le bjalo, ge letšatši le hlaba motho yo mongwe o ile a ba bitša a le lebopong gomme a ba kgothaletša go lahlela malokwa a bona ka lehlakoreng le lengwe la sekepe. Ba ile ba dira bjalo gomme ba tanya dihlapi tše 153! Petro o ile a tseba gore motho yoo e be e le mang. O ile a tšwa ka sekepeng gomme a thala, a ya lebopong. Lebopong, Jesu o ile a ba nea dijo, hlapi yeo e bešitšwego magaleng. O ile a lebiša tlhokomelo go Petro.

Jesu o ile a botšiša Petro ge e ba a rata Morena wa gagwe “go feta tše”—go bonagala a ile a šupa mokgobong wa dihlapi. Ka pelong ya Petro, na o be a ka rata kgwebo ya go rea dihlapi go feta go rata Jesu? Bjalo ka ge Petro a latotše Morena wa gagwe ka makga a mararo, ga bjale Jesu o ile a mo nea sebaka sa go kgonthišetša lerato la gagwe ka makga a mararo pele ga bagwera ba gagwe. Ge Petro a dira bjalo, Jesu o ile a mmotša gore a bontšhe lerato leo: ka go etiša tirelo e kgethwa pele ga dilo tšohle, go fepa le go diša mohlape wa Kriste, balatedi ba gagwe ba botegago.—Johane 21:4-17.

Ka gona, Jesu o ile a kgonthišetša gore yena le Tatagwe ba be ba sa dutše ba ka diriša Petro. Petro o be a tla phetha karolo e bohlokwa ka phuthegong ka tlase ga tlhahlo ya Kriste. A bohlatse bjo  bogolo gakaakang bja tebalelo ya Jesu! Ka ntle le pelaelo kgaugelo yeo e ile ya kgoma Petro, gomme o ile a dula a e gopola.

Petro ka potego o ile a phetha kabelo ya gagwe ka nywaga e mentši. O ile a matlafatša bana babo, bjalo ka ge Jesu a ile a mo laela bošegong bja pele ga lehu la Gagwe. Petro o ile a šoma ka botho le ka go se fele pelo go diša le go fepa balatedi ba Kriste. Monna yo a bego a bitšwa Simone o ile a phelela leina leo Jesu a bego a mo reetše lona—Petro, goba Lefsika—ka go ba yo a tsepamego, yo a tiilego le yo a nago le tutuetšo e botse ka phuthegong. Bohlatse bjo bontši bja seo bo hwetšwa mangwalong a borutho ao Petro a a ngwadilego ao a ilego a ba dipuku tše bohlokwa ka Beibeleng. Le gona, Mangwalo ao a bontšha gore Petro ga se a ka a lebala thuto yeo a ithutilego yona go Jesu mabapi le go lebalela.—1 Petro 3:8, 9; 4:8.

Eka le rena re ka ithuta thuto yeo. Na re kgopela Modimo letšatši le letšatši gore a re lebalele diphošo tša rena tše dintši. Na re amogela tebalelo yeo gomme ra dumela matleng a yona a go re hlwekiša? Le gona, na re lebalela ba bangwe bao ba phelago le rena? Ge e ba re dira bjalo, re tla bontšha tumelo ya Petro—le kgaugelo ya Mong wa gagwe.

[Ntlhakgolo go letlakala 22]

Petro o dirile diphošo tše dintši tšeo go bego go nyakega gore Mong wa gagwe a mo lebalele tšona, eupša ke mang go rena yo a sa nyakego go lebalelwa letšatši le letšatši?

[Seswantšho go letlakala 23]

“Morena a retologa a lebelela Petro”

[Seswantšho go letlakala 24]

“Morena . . . o bonagetše go Simone!”