Na Ruri ke go se Botege?

“Fetoša pego ya gago ya kotsi ya koloi ganyenyane gomme dilo tšohle di tla loka”

“Balaodi ba metšhelo ga se ba swanela go tseba dilo ka botlalo”

“Selo se bohlokwa kudu ke go se tanywe”

“O re’ng o se lefelela mola o ka se hwetša ntle le tefo?”

O KA kwa dipolelo tše swanago le tše ge o kgopela keletšo mabapi le ditaba tša ditšhelete. Batho ba bangwe ba bonagala ba e-na le seo go thwego ke bohlale bja go rarolla dilo ka moka. Potšišo ke gore, Na ruri ditharollo tšeo di a botega?

Go se botege go atile kudu lehono moo e lego gore batho gantši ba lebelela go bolela maaka, go hlalefetša le go utswa e le ditsela tše amogelegago tša go phema kotlo, go dira tšhelete goba go ikhumiša. Gantši batho ba tsebegago setšhabeng ga ba bee mohlala o mobotse wa potego. Nageng e nngwe ya Yuropa, melato ya bomenetša le go diriša tšhelete ka bošaedi e oketšegile ka tekanyo e fetago 85 lekgolong go tloga ka 2005 go fihla ka 2006. Le gona, se ga se akaretše melato e mentši ya go se botege yeo e lebelelwago e se e megolo, yeo batho ba bangwe ba e bitšago dibe tše dinyenyane. Mohlomongwe go be go sa makatše gore bo-rakgwebo le bo-radipolitiki ba tumilego ba nageng yeo ba be ba akaretšwa melatong ya bomenetša yeo go hweditšwego gore ba ile ba diriša di-diploma tša bofora go tšwetša pele mešomo ya bona ya boiphedišo.

Lega go le bjalo, go sa šetšwe moya o atilego kudu lefaseng wa go se botege, batho ba bantši ba nyaka go dira se se nepagetšego. Go ka direga gore o yo mongwe wa bona. Mohlomongwe ka ge o rata Modimo, o nyaka go dira seo se nepagetšego mahlong a gagwe. (1 Johane 5:3) O ka ikwa go swana le moapostola Paulo, yo a ngwadilego gore: “Re holofela gore re na le letswalo le botegago, ka ge re rata go itshwara ka go botega dilong tšohle.” (Baheberu 13:18) Ka baka leo, re go laletša gore o seka-seke a mangwe a maemo ao a ka lekago kganyogo ya motho ya go bontšha “potego dilong tšohle.” Le gona re tla ela hloko melao ya motheo ya Beibele yeo e ka thušago maemong a bjalo.

Ke Mang yo a Swanetšego go Lefelela Ditshenyagalelo tša Kotsi?

Mosadi yo mongwe yo mofsa yo a bitšwago Lisa * o ile a dira phošo ge a be a otlela letšatšing le lengwe gomme a thulana le koloi e nngwe. Ga go na motho yo a gobetšego, eupša dikoloi ka bobedi di ile tša senyega. Nageng ya gabo, baotledi ba banyenyane ba lefa tšhelete e ntši ya inšuranse, gomme tšhelete yeo e oketšega ka morago ga kotsi e nngwe le e nngwe. Ka ge Lisa a be a e-na le Gregor, motswala’gwe yo mogolo, ge a be a otlela koloi ya gagwe, mogwera o šišinya gore ba bege gore Gregor o be a otlela koloi ya gagwe. Ka tsela yeo, Lisa a ka efoga go lefa tšhelete e ntši ya inšuranse. Tharollo yeo e bonagala e le e bohlale. Ke’ng seo a swanetšego go se dira?

Dikhamphani tša inšuranse di diriša tšhelete  yeo e lefšago ke bao ba ngwadišitšego inšuranse bakeng sa go lefelela melato yeo. Ka gona, ka go latela tšhišinyo ya mogwera wa gagwe, Lisa o be a tla gapeletša batho ba bangwe bao ba ngwadišitšego inšuranse go lefelela kotsi ya gagwe ka ditefo tše phagamego tša inšuranse. O tla be a sa dire pego e fošagetšego feela eupša gape o tla be a utswetša ba bangwe. Go ka bolelwa se se swanago ka go ngwala pego ya maaka e le gore inšuranse e go fe tšhelete e ntši.

Dikotlo tša molao e ka ba thibelo e matla ya go se dire ditiro tše bjalo tša go se botege. Eupša lebaka le bohlokwa kudu la go phema go se botege le ka Lentšung la Modimo. O mongwe wa Melao e Lesome o re: “O se kê wa utswa.” (Ekisodo 20:15) Moapostola Paulo o ile a boeletša molao woo go Bakriste, ge a re: “Yo a utswago a se ke a hlwa a utswa.” (Baefeso 4:28) Ge o e-kwa Lentšu la Modimo ditabeng tše bjalo tša inšuranse, o phema go dira selo seo Modimo a se ganago. Le gona, o bontšha gore o rata le go hlompha molao wa Modimo gotee le baagišani ba gago.—Psalme 119:97.

“Neang Kesara tša Kesara”

Peter ke rakgwebo. Ramatlotlo wa gagwe o šišinya gore a nyake phokoletšo ya motšhelo bakeng sa seo go thwego ke theko ya sedirišwa se bitšago kudu sa khomphutha. Theko e bjalo ke yeo e tlwaelegilego bakeng sa kgwebo e swanago le ya Peter. Gaešita le ge Peter a se a ka a reka sedirišwa seo, ga se gantši mmušo o bego o ka nyakišiša ka tshenyagalelo yeo. Phokoletšo yeo e ka thuša Peter gore a seketše tšhelete e ntši kudu ya go lefa motšhelo. O swanetše go dira’ng? A ka hlahlwa ke’ng gore a dire phetho?

Moapostola Paulo o ile a botša Bakriste ba mehleng ya gagwe gore: “Anke moya o mongwe le o mongwe o ikokobeletše balaodi ba bagolo . . . Neang bohle tše di ba swanelago, yo a swanelwago ke lekgetho, le mo nee lekgetho; yo a swanelwago  ke sebego, le mo nee sebego.” (Baroma 13:1, 7) Bao ba nyakago go amogelwa ke Modimo ba lefa metšhelo ka moka yeo balaodi ba e nyakago. Ka lehlakoreng le lengwe, ge e ba molao wa naga o dumelela diphokoletšo tša metšhelo go batho goba dikgwebo tše itšego, ga go phošo go kgopela diphokoletšo tše bjalo ge e ba ka molao o swanelega go dira bjalo.

Boemo bjo bo latelago ke bjo bongwe bjoo bo akaretšago go lefa metšhelo. David o šoma bjalo ka mmetli khamphaning e itšego. Eupša bagwera le baagišani ba gagwe ba kgopela gore a ba direle diraka le fenitšhara gomme o di dira ka morago ga mošomo. Ba holofetša go mo lefa mogolo wa godimo go feta woo a bego a o hwetša mošomong wa gagwe, eupša ba letetše gore a šome ntle le lenaneo-theko. Ka go rialo, ga go na motho yo a nago le pego ka modiro woo o dirilwego e bile ga go na yo a tla lefago metšhelo. Batho ba bantši ba nagana gore se se lokile, ka ge motho yo mongwe le yo mongwe a holwa ke tokišetšo ye. Ka ge David a nyaka go kgahliša Modimo, o swanetše go lebelela bjang mošomo woo o dirwago ntle le lenaneo-theko?

Gaešita le ge motho yo a šomago ka tsela yeo a ka se tanywe, ga a lefe metšhelo yeo mmušo o nago le tshwanelo ya go e amogela. Jesu o laetše ka gore: “Neang Kesara tša Kesara, eupša Modimo le mo nee tša Modimo.” (Mateo 22:17-21) Jesu o boletše se e le ge a phošolla kgopolo ya batheetši ba gagwe ya mabapi le go lefa makgetho. Balaodi ba mmušo bao Jesu a bego a ba bitša Kesara, ba be ba lebelela metšhelo e le yeo e swanetšego go lefša. Ka gona, balatedi ba Kriste ba lebelela go lefa metšhelo ka moka e le boikarabelo bja bona bja Mangwalo.

Go se Botege Ditlhahlobong

Morutwana yo a tsenago sekolo se phagamego yo a bitšwago Marta, o itokišetša go ngwala ditlhahlobo tša gagwe tša mafelelo. Ka ge ditebelelo tša gagwe tša go hwetša mošomo o kaone di ithekgile ka gore a hwetše dintlha tše phagamego, o feditše diiri tše ntši a ithuta. Ba bangwe ba barutwana-gotee le yena le bona ba itokišeditše—eupša ka tsela e fapanego. Ba tla be ba diriša di-pager, di-calculator tše di ngwadilwego dikarabo e sa le pele le megala-thekeng go kopiša e le gore ba tle ba hwetše dintlha tše phagamego. Na Marta o swanetše go dira seo go thwego motho yo mongwe le yo mongwe o a se dira go kgonthiša gore o hwetša dintlha tše dibotse?

Ka ge go se botege go tlwaelegile kudu, batho ba bantši ba nagana gore ga se phošo. Ba bea mabaka ka gore, “Se bohlokwa ke gore o se ke wa tanywa.” Lega go le bjalo, Bakriste ba therešo ga se ba swanela go nagana ka tsela yeo. Gaešita le ge morutiši a ka se bone bao ba kopišago, go na le yo mongwe yo a ba bonago. Jehofa Modimo o tseba seo re se dirago gomme o tla re ahlola. Paulo o ngwadile gore: “Ga go na sebopiwa se se sa bonagalego mahlong a gagwe, eupša dilo ka moka di hlobotše e bile di molaleng mahlong a yo re ikarabelago go yena.” (Baheberu 4:13) Na go tseba gore Modimo o re lebeletše ka ge a kgahlegela seo re se dirago ga se tutuetšo e matla ya gore re botege ge re ngwala tlhahlobo?

O tla Dira’ng?

Lisa, Gregor, Peter, David le Marta ba ile ba lemoga bogolo bja maemo ao ba lebanego le ona.  Ba ile ba dira phetho ya gore ba botege le go kgomarela letswalo le lebotse gotee le go botega boitshwarong bja bona. Ke’ng seo o tlago go se dira ge o lebane le maemo a swanago le a?

Bašomi-gotee, barutwana-gotee le baagišani ba ka no se tshwenywe ke go bolela maaka, go kopiša goba go utswa. Ge e le gabotse, ba ka leka go go kwera e le go go gapeletša go dira dilo ka tsela e swanago le ya bona. Ke’ng seo se ka go thušago gore o dire phetho e nepagetšego go sa šetšwe kgateletšo ya gore o dire ka go se botege?

Gopola, go dira dilo ka go dumelelana le thato ya Modimo go tla feleletša ka gore re be le letswalo le le hlwekilego gaešita le go amogelwa ke Modimo. Kgoši Dafida o ngwadile gore: “Morêna, mo Ngwakong wa xaxo xo ka dula mang? Thabeng e kxêthwa ya xaxo xo ka axa mang? Ké yo a swerexo tsela ya bothakxa, a dira tša xo loka, a búa therešô ka pelo, . . . Wa mokxwa o byalo a ka se kê a bá a šutha neng le neng.” (Psalme 15:1-5) Go ba le letswalo le le hlwekilego gotee le bogwera le Modimo wa legodimong go phala go ba le mahumo lege e le afe a dilo tše di bonagalago ao a hweditšwego ka go se botege.

[Mongwalo wa tlase]

[Ntlhakgolo go letlakala 12]

“Yo a utswago a se ke a hlwa a utswa.”

Go hlompha molao wa Modimo le go rata moagišani go tla re tutueletša gore re botege ditabeng tša inšuranse

[Ntlhakgolo go letlakala 12]

“Neang bohle tše di ba swanelago, yo a swanelwago ke lekgetho, le mo nee lekgetho.”

Gore re amogelwe ke Modimo, re lefa metšhelo ka moka yeo e nyakwago ke molao

[Ntlhakgolo go letlakala 13]

“Dilo ka moka . . .di molaleng mahlong a yo re ikarabelago go yena.”

Gaešita lege barutiši ba ka se re tanye re kopiša, re nyaka go botega pele ga Modimo

[Box/​Pictures on page 14]

Bohodu bjo bo sa Lemogegego

Mogwera wa gago o rekile lenaneo la morago-bjale la khomphutha gomme o rata go ba le lona. O go holofetša go go sekeletša tšhelete ka go go direla kopi ya lenaneo leo. Na seo ke go se botege?

Ge badiriši ba reka lenaneo la khomphutha, ba dumela go latela melao yeo e hlalositšwego lengwalong leo le tlago le lenaneo leo. Lengwalo leo le ka dumelela moreki gore a tsenye lenaneo leo le go le diriša khomphutheng e tee feela. Boemong bjoo, go direla motho yo mongwe kopi ya lenaneo leo la khomphutha e tla ba go roba molao wa lengwalo leo. (Baroma 13:4) Go dira kopi yeo ke go utswa, ka ge go amoga mong wa yona ditshwanelo tša go hwetša tšhelete yeo a swanetšego go e amogela.—Baefeso 4:28.

Ba bangwe ba ka bea mabaka ka gore, ‘Go ka se tsebe motho.’ Seo e ka ba e le therešo, eupša re swanetše go gopola mantšu a Jesu a rego: “Ka baka leo, dilo tšohle, tše le nyakago batho ba le dira tšona, le lena ka mo go swanago le ba dire tšona.” (Mateo 7:12) Ka moka ga rena re nyaka go lefša ka mo go swanetšego bakeng sa modiro wa rena gomme ra kganyoga gore ba bangwe ba sware thoto ya rena ka tlhompho. Ka tsela e swanago, re swanetše go naganela ba bangwe. Re phema bohodu bjo bo sa lemogegego, bjo bjalo ka go tšea thoto * yeo e sego ya rena.—Ekisodo 22:7-9.

[Mongwalo wa tlase]