Na o be o Tseba?

Na Jesu o be a tswalana le ga e le ofe wa baapostola ba gagwe ba 12?

▪ Mangwalo ga a nee karabo e lebanyago ya potšišo ye. Lega go le bjalo, bohlatse bja maemo le bja setlogo bo šišinya gore ba bangwe ba ba 12 ba be ba tswalana le Jesu.

Bangwadi ba Ebangedi ba bolela maina a basadi bao ba bego ba lebeletše ge Jesu a be a e-hwa koteng ya tlhokofatšo. Johane 19:25 e bolela maina a ba bane ba bona: “Mmagwe [Maria] le ngwanabo mmagwe; Maria mosadi wa Klopa le Maria Magdalena.” Go bapiša temana ye le tlhaloso ya Mateo le ya Mareka ya tiragalo yona ye go ka dira gore o fihlele phetho ya gore ngwanabo mmago Jesu e be e le Salome. Salome yo, ge e le gabotse, go bonagala e be e le mmago barwa ba Tsebedeo. (Mateo 27:55, 56; Mareka 15:40) Ka go rialo, barwa ba gagwe, bao go gongwe ba bitšwago Jakobo le Johane, e be e tla ba batswala ba Jesu. Jesu o ile a bitša barwarre ba ba babedi, bao e bego e le barei ba dihlapi, gore e be barutiwa ba gagwe.—Mateo 4:21, 22.

Dipego tše dingwe tšeo e sego tša Beibele di bolela gore Klopa, goba Alifeose, monna wa yo mongwe wa basadi bao go boletšwego ka bona go Johane 19:25, e be e le morwarrago Josefa, tatago Jesu wa mogodiši. Ge e ba pego ye e theilwe therešong, gona Jakobo morwa wa Alifeose, yo mongwe wa baapostola ba 12, le yena e be e le motswala wa Jesu.—Mateo 10:3.

Jesu le Johane Mokolobetši ba be ba tswalana bjang?

▪ Ba bangwe ba dumela gore batswadi ba bona e be e le batswala. Tumelo ye e theilwe phetolelong e sa nepago ya Luka 1:36. Ka mohlala, temaneng yeo, King James Version, e bolela gore mmago Johane, Elisabetha, le Mmago Jesu, Maria, e be e le batswala.

Lega go le bjalo, ge e le gabotse lentšu leo le dirišitšwego Segerikeng sa mathomo temaneng ye ga se leo le lebanyago. Le fo ba le bontšha gore basadi ba ba babedi e be e le metswalo, e sego gore e be e le batswala. Bjalo ka ge The Interpreter’s Dictionary of the Bible e e bea, “lentšu le ke le le nabilego kudu moo e lego gore le ka se thuše go bona thwii gore tswalano ya bona e be e le efe.” Bjale, kgopolo ya gore Jesu le Johane e be e le batswala e tšwa kae? The Catholic Encyclopedia e araba ka gore: “Tsebišo ka moka ya rena ya mabapi le . . . batswadi ba Maria . . . e tšwa dipukung tša apokrifa.”

Ka go rialo, Jesu le Johane e be e le meloko ya kgojana, e bile batswadi ba bona e be e se batswala.