Na Modimo o be a Tseba Gore Adama le Efa ba be ba tla Dira Sebe?

BATHO ba bantši ba botšiša potšišo ye go tšwa pelong. Ge go rotošwa kgang ya mabapi le go dumelela ga Modimo bokgopo, sebe sa banyalani ba mathomo sa serapeng sa Edene se a ahlaahlwa. Go ka ba bonolo gore kgopolo ya gore ‘Modimo o tseba tšohle’ e dire gore batho ba bangwe ba phethe ka gore Modimo o swanetše go ba a tsebile e sa le pele gore Adama le Efa ba be ba tla se mo kwe.

Ge e ba Modimo a tsebile e sa le pele gore banyalani ba bao ba phethagetšego ba be ba tla dira sebe, se se be se tla ra gore’ng? Kgopolo e bjalo e be e tla ra gore Modimo o na le dika tše dintši tše sa kgahlišego. O tla bonagala a se na lerato, toka le therešo. Ba bangwe ba ka lebelela e le go ba sehlogo go bea batho ba pele boemong bjo go tsebilwego e sa le pele gore mafelelo a bjona ke a mabe. Modimo o be a ka bonagala a ikarabela ka—goba go ba mmaki wa—bobe le tlaišego ka moka tšeo di ilego tša latela historing. Go ba bangwe, Mmopi wa rena o be a ka bonagala e le lešilo.

Na Jehofa Modimo, bjalo ka ge a hlaloswa ka Mangwalong, o swanelwa ke tlhaloso e bjalo e sa kgahlišego? Go araba potšišo yeo, a re hlahlobeng seo Beibele e se bolelago mabapi le mediro ya tlhago le semelo sa Jehofa.

E be “e le se Sebotse Kudu”

Pego ya Genesi e bolela mabapi le tlholo ya Modimo, go akaretša le batho ba pele lefaseng, gore: “Modimo a lebelela se sengwe le se sengwe seo a se dirilego a bona e le se sebotse kudu.” (Genesi 1:31) Adama le Efa ba be ba dirilwe ka mo go phethagetšego, ba swanela maemo a bona a lefaseng. Ba bopilwe ba se na bofokodi le gatee. Ka ge ba bopilwe ‘gabotse kudu,’ ba be ba tloga ba ena le bokgoni bja go itshwara gabotse bjalo ka ge go be go letetšwe. Ba be ba bopilwe ka “seswantšho sa [Modimo].” (Genesi 1:27) Ka go rialo, ba be ba ena le bokgoni bja go bonagatša dika tša Modimo tša bohlale, lerato, toka le toko go fihla bokgoleng bjo itšego. Go bonagatša dika tše bjalo go be go tla ba thuša go dira diphetho tšeo di bego di tla ba hola le go thabiša Tatago bona wa legodimong.

Jehofa o ile a nea dibopiwa tše tše phethagetšego le tše bohlale tokologo ya boikgethelo. Ka go rialo ba be ba se ba rulaganyetšwa go fo kgahla Modimo—go etša mehuta e itšego ya diroboto. Nagana ka taba ye. Ke mpho efe ye o bego o tla e tšeela godimo kudu—na ke yeo motho a go filego yona ka gobane a swanetše go go fa goba ke yeo a go filego a tutueletšwa ke pelo? Karabo e molaleng. Ka mo go swanago, ge nkabe Adama le Efa ba ile ba ikgethela go kwa Modimo, o be a tla tšeela godimo kudu go mo kwa ga bona. Bokgoni bja go ikgethela bo neile banyalani ba mathomo sebaka sa go kwa Modimo ka go rata.—Doiteronomio 30:19, 20.

O na le Toka e Bile o Lokile

Beibele e re utollela dika tša Jehofa. Dika tše di dira gore go se kgonege gore a tsenye letsogo sebeng. Psalme 33:5 e re Jehofa “o rata toko le toka.” Ka baka leo, Jakobo 1:13 e re: “Modimo a ka se ke a lekwa ka dilo tše mpe le gona yena ga a leke motho le ge e le ofe.” Ka baka la toka ya gagwe le go naganela ga gagwe, Modimo o ile a lemoša Adama a re: “O ka ja wa ba wa kgotsofala ka se se tšwago sehlareng se sengwe le se sengwe sa mo serapeng. Eupša ge e le sehlare sa go tseba botse le bobe o se ke wa ja tša sona, gobane mohlang o ka jago tša sona o tla hwa lehu.” (Genesi 2:16, 17) Banyalani ba pele ba be ba filwe kgetho magareng ga bophelo bjo bo sa felego le lehu. Na e be e ka se be boikaketši gore Modimo a ba lemoše ka sebe se itšego mola a šetše a tseba gore mafelelo e tla ba a mabe? Ka ge a “rata toko le toka,” Jehofa o be a ka se nee batho kgetho yeo ge e le gabotse e sego gona.

 Jehofa gape o na le botho bjo bogolo. (Psalme 31:19) Ge Jesu a hlalosa botho bja Modimo o itše: “Motho ke mang mo gare ga lena yo ge morwa wa gagwe a mo kgopelago senkgwa a ka mo fago leswika? Goba mohlomongwe ge a kgopela hlapi, a ka mo fago noga? Ka gona, ge e ba lena gaešita le ge le le kgopo le tseba go nea bana ba lena dimpho tše dibotse, gona Tatago lena yo a lego magodimong o tla nea gakaakang dilo tše dibotse go bao ba mo kgopelago!” (Mateo 7:9-11) Modimo o nea dibopiwa tša gagwe “dilo tše dibotse.” Tsela yeo batho ba bopilwego ka yona le legae la Paradeise leo ba bego ba le lokišeditšwe ke bohlatse bja botho bja Modimo. Na Mmuši yo bjalo yo botho o be a ka ba sehlogo wa gore a fe batho legae le lebotse leo a tsebago gore ba be ba tla le amogwa? Aowa. Mmopi wa rena yo a lokilego le yo botho ga se a swanela go bewa molato bakeng sa borabele bja batho.

“Yo Bohlale a Nnoši”

Mangwalo gape a bontšha gore Jehofa ke “yo bohlale a nnoši.” (Baroma 16:27) Barongwa ba Modimo ba legodimong ba ile ba bona diponagatšo tše dintši tša bohlale bjo bjo bo ka se lekanywego. Ba ile ba thoma go “gobela ka go hlalala” ge Jehofa a tšweletša dibopiwa tša gagwe tša lefaseng. (Jobo 38:4-7) Ga go pelaelo gore dibopiwa tše tše bohlale tša moya di be di lebeletše ditiragalo tša serapeng sa Edene ka kgahlego e kgolo. Ka gona, na go be go tla bontšha tlhaologanyo gore Modimo yo bohlale, ka morago ga go dira legohle le le kgahlišago le mehutahuta ya mediro e kgahlišago ya lefaseng, a dire gore barwa ba gagwe ba barongwa ba bone ge a bopa dibopiwa tše pedi tša moswananoši tšeo a bego a tseba gore di tla palelwa? Go molaleng gore go rulaganya manyami a bjalo ga go na tlhaologanyo.

Go sa dutše go le bjalo, yo mongwe a ka ganetša ka gore, ‘Eupša Modimo yo bohlale ka go fetišiša o be a ka se tsebe bjang?’ Ke therešo gore karolo ya bohlale bjo bogolo bja Jehofa ke bokgoni bja gagwe bja go tseba “go tloga mathomong dilo tša mafelelo.” (Jesaya 46:9, 10) Lega go le bjalo, ga a gapeletšege go diriša bokgoni bjo, go fo swana le ge a sa gapeletšege ka mehla go diriša matla a gagwe a magolo ka botlalo. Jehofa ka bohlale o kgetha gore o tla diriša neng bokgoni bja gagwe bja go tseba dilo e sa le pele. O bo diriša ge go dira bjalo go ena le tlhaologanyo e bile go dumelelana le maemo.

Bokgoni bja go se diriše go tseba dilo e sa le pele bo ka bapišwa le karolo ya thekinolotši ya mehleng yeno. Motho yo a bogetšego papadi yeo e gatišitšwego e sa le pele o na le kgetho ya go ka bapala metsotso ya mafelelo ya papadi pele e le gore a bone mafelelo a yona. Eupša ga a gapeletšege go thoma ka tsela yeo. Ke mang yo a ka mo swayago diphošo ka gobane a kgethile go bogela papadi yeo ka moka go tloga mathomong? Ka mo go swanago, go molaleng gore Mmopi o kgethile go se bone gore mafelelo e be e tla ba afe. Go e na le moo, o ile a kgetha go leta gomme a bone kamoo bana ba gagwe ba lefaseng ba tlago go itshwara ka gona ge ditiragalo di dutše di direga.

Bjalo ka ge go boletšwe pejana, Jehofa ka bohlale bja gagwe ga se a bopa batho e le diroboto tšeo di rulaganyeditšwego tsela yeo di tlago go itshwara ka yona. Go e na le moo, ka lerato o ile a ba fa tokologo ya boikgethelo. Ka go kgetha tsela e nepagetšego, ba be ba tla bonagatša lerato la bona, tebogo le go kwa ga bona, ka go rialo ba oketša lethabo la bona le la Jehofa bjalo ka Tatago bona wa legodimong.—Diema 27:11; Jesaya 48:18.

Mangwalo a bontšha gore mabakeng a mantši Modimo o be a sa diriše bokgoni bja gagwe bja go tseba dilo e sa le pele. Ka mohlala, ge Aborahama yo a botegago a fihla bokgoleng bja go leka go dira sehlabelo ka morwa wa gagwe, Jehofa o be a ka re: “Bjale ke a tseba gore o boifa Modimo ka ge o se wa nkgana ka morwa wa gago, e lego morwa wa gago o tee feela.” (Genesi 22:12) Ka lehlakoreng le lengwe, go bile le dinako tše dingwe tšeo ka tšona boitshwaro bjo bobe bja batho ba itšego bo bego bo “kweša [Modimo] bohloko.” Na o be a  ka kwa bohloko bjo bjalo ge e ba e be e le kgale a tseba seo ba bego ba tla se dira?—Psalme 78:40, 41; 1 Dikgoši 11:9, 10.

Ka gona, ke mo go kwagalago go phetha ka gore Modimo yo bohlale ka go fetišiša ga se a ka a diriša bokgoni bja gagwe bja go tseba dilo e sa le pele go tseba gore batswadi ba rena ba mathomo ba be ba tla dira sebe. E be e se lešilo mo a bego a ka bopa batho e le gore ba phele maphelo a tletšego ka ditiragalo tše sa kgahlišego tšeo a bego a šetše a tseba gore di tla direga ka baka la bokgoni bja gagwe bja go tseba dilo e sa le pele.

“Modimo ke Lerato”

Lenaba la Modimo, e lego Sathane, le thomile borabele bja kua Edene bjoo bo bilego le ditlamorago tše sa kgahlišego, go akaretša sebe le lehu. Ka baka leo Sathane e be e le “mmolai wa batho.” O ile a ba a ipontšha e le “moaketši le tatago maaka.” (Johane 8:44) Ka ge a hlohleletšwa ke maikemišetšo a mabe, o katanela go dira gore go bonagale eka Mmopi wa rena o na le maikemišetšo a mabe. O rata go dira gore Jehofa a bonwe molato bakeng sa sebe sa batho.

Lerato ke lebaka le legolo leo le dirilego gore Jehofa a kgethe go se tsebe e sa le pele gore Adama le Efa ba be ba tla dira sebe. Lerato ke seka se segolo sa Modimo. Johane wa pele 4:8 e re: “Modimo ke lerato.” Lerato le a kgahliša, ga se le lebe. Le lebelela botse bathong ba bangwe. Ee, a tutueditšwe ke lerato, Jehofa o be a kganyogela banyalani ba mathomo dilo tše kaonekaone.

Gaešita le ge bana ba Modimo ba lefaseng ba be ba ena le tokologo ya go ikgethela go dira phetho e sego bohlale, Modimo wa rena yo lerato ga se a ka a letela gore ba dire dilo tše mpe goba go gononela dibopiwa tša gagwe tše di phethagetšego. O be a ba file dilo tšohle tšeo ba di nyakago le go ba hlama ka mo go feletšego. E be e le mo go swanetšego gore Modimo a letele gore ba mo kwe ka go rata, e sego gore ba rabele. O be a tseba gore Adama le Efa ba be ba ena le bokgoni bja go dira dilo ka potego, bjalo ka ge ka morago go ile gwa hlatselwa le ke batho ba go se phethagale, ba bjalo ka Aborahama, Jobo, Daniele le ba bangwe ba bantši.

Jesu o itše: “Go Modimo dilo tšohle di a kgonega.” (Mateo 19:26) Yeo ke kgopolo e homotšago. Lerato la Jehofa, gotee le dika tše dingwe tša gagwe tše dikgolo e lego toka, bohlale le matla, le re kgonthišetša gore ka nako e swanetšego a ka tloša ditlamorago ka moka tša sebe le lehu e bile o tla dira bjalo.—Kutollo 21:3-5.

Go Molaleng gore Jehofa o be a sa tsebe e sa le pele gore banyalani ba mathomo ba be ba tla dira sebe. Ge a be a kwešwa bohloko ke go se kwe ga batho le tlaišego yeo e latetšego, Modimo o be a tseba gore boemo bjo bja nakwana bo be bo ka se thibele go phethagala ga morero wa gagwe wa ka mo go sa felego ka lefase le ka batho ba lego go lona. O re’ng o sa tsome tsebišo e oketšegilego mabapi le morero woo le kamoo o ka holwago ke go phethagala ga wona? *

[Mongwalo wa tlase]

[Ntlhakgolo go letlakala 14]

Jehofa ga se a bopa batho ba mathomo ba le bjalo ka diroboto tšeo di rulaganyeditšwego go itshwara ka tsela e itšego

[Ntlhakgolo go letlakala 15]

Modimo o be a tseba gore Adama le Efa ba be ba ena le bokgoni bja go dira dilo ka potego