Polelo ya Phatlalatša e Kgethegilego

Re ka Hwetša Kae Thušo Gore re Lebeletšane le Mathata a Lehono?

Go na le dikeletšo tše dintši lefaseng la lehono. Batho ba bantši kudu ba gogelwa ke dipuku gotee le manananeo a thelebišene ao a ba neago dikeletšo tša go rarolla mathata. Lega go le bjalo, mathata a tlwaelegilego a tšwela pele a le gona. Mo gongwe o ka ipotšiša gore: ‘Na go na le mothopo wa tlhahlo wo nka o botago e le ka kgonthe?’ Karabo ke ee!

Gaešita le ge Beibele e na le nywaga e dikete e le gona, e na le melao ya motheo yeo e sa felelwego ke nako yeo e ka neago dikarabo tša dipotšišo tše di swanago le tše:

▪ Nka rarolla bjang diphapano gomme ka thabela go ba le tswalano e botse le ba bangwe?

▪ Nka hwetša lethabo bjang?

▪ Nka lebeletšana bjang le mathata a tša boiphedišo?

▪ Nka fediša bjang dipelaelo?

Dikarabo tša dipotšišo tše di tla ahlaahlwa polelong ya phatlalatša e rego, “Melao ya Motheo ya Beibele—Na e ka re Thuša go Lebeletšana le Mathata a Lehono?” Polelo ye yeo e theilwego Beibeleng e tla newa lefaseng ka bophara dinageng tše fetago tše 230. Mafelong a mantši, e tla be e newa Holong ya Mmušo ya Dihlatse tša Jehofa ka Sontaga, May 1, 2011.

Dihlatse tša lefelong la geno di tla thabela go go botša nako le aterese. Re go laletša ka borutho gore o be gona polelong ye.