Beibele e Fetoša Maphelo

KE KA baka la eng seopedi se se tumilego se ile sa tlogela talente ya sona gore se be modiredi wa nako e tletšego wa bodumedi? Gape ke eng seo se thušitšego sesenyi seo se ilego sa hlaloswa ke moahlodi gore le ka mohla se ka se tsoge se fetogile setho seo se nago le mohola setšhabeng gore se fetoge? Bala dipego tše gore o ikhweletše dikarabo.

“Ga go yo a ka Bago Lekgoba la Marena a Mabedi.”—ANTOLINA ORDEN CASTILLO

NGWAGA WA MATSWALO: 1962

NAGA: SEPANIA

BOPHELO BJA PELE E EBA MOKRISTE: SEBAPADI SA DIPAPADI TŠA SEFALENG LE SEOPEDI SA MMINO WA ZARZUELA

BOPHELO BJA KA BJA NAKONG E FETILEGO: Ke belegetšwe motsaneng wa Tresjuncos, tikologong yeo e tsebjago e le La Mancha. Batswadi ba ka e be e le balemi. Mma e be e le Mokatholika gomme tate e le Moprotestanta. Tate o nthutile gore ke hlomphe Beibele; ke be ke mmona a e bala ka dinako tšohle. Eupša mma o nkgodišitše ke le Mokatholika gomme o be a nkiša Mmiseng Sontaga se sengwe le se sengwe.

Ge ke be ke ena le nywaga e 15, ke ile ka tloga motsaneng wa gešo gomme ka yo dula Madrid le kgaetšedi ya ka yo mogolo. Ke be ke gopola batswadi ba ka kudu eupša mafelelong ke ile ka tlwaela bophelo bja toropong. Ge ke be ke ena le nywaga e 17, ke ile ka ba le sebaka sa go šoma le sehlopha sa diopedi tša zarzuela, e lego mmino wa Sepaniši wa opera. Ke be ke thabela bophelo bjoo kudu gomme ka phetha ka gore ke be sebapadi sa dipapadi tša sefaleng. Ke ile ka tlogela dithuto tša ka tša go ithutela go ba mongwaledi gomme ka thoma go šoma le dikhamphani tše di fapafapanego tša zarzuela. Mo e ka bago ka nako ye, ke ile ka thoma go ratana le kgaetšedi ya yo mongwe wa bagwera ba ka. Ke be ke ekwa ke atlegile ka go ba le mošomo o mobotse, tšhelete gaešita le go ratwa.

Ke ile ka thoma go tšea maeto le dikhamphani tše di fapafapanego tša zarzuela go phatša Sepania ka moka, gaešita le dinageng tše dingwe tše bjalo ka Colombia, Costa Rica, Ecuador le Venezuela. Ke ile ka opela le dihlopha tše sa swanego tšeo e bego e le tša mohuta wo o tumilego wa mmino kua Madrid woo o tsebjago e le “La movida madrileña.” Sehlopha se sengwe seo ke bego ke se etelela pele go opeleng se ile sa atlega kudu.

Ke be ke rata mošomo wo eupša ke sa rate go hloka boitshwaro mo go bego go le gona. Go oketša moo, ke be ke tshwenyegile kudu ka tsela yeo ke bego ke bogega ka yona le gore batho ba ntebelele ke le motho wa maemo a godimo bjalo ka seopedi se se tumilego. Ke ile ka swarelela mohuteng o itšego wa dijo gomme ka thoma go swarwa ke bolwetši bja anorexia le bja bulimia.

Pakane ya ka e kgolo e be e sa dutše e le go ba sebapadi sa dipapadi tša sefaleng. Mafelelong, ke ile ka amogelwa Sekolong sa Madrid sa Dithuto tša go Bapala Diterama. Re be re rutwa gore go ba sebapadi go be go nyaka gore mmapadi a tšweletše maikwelo le semelo sa karolo yeo a e bapalago. Ge ke be ke diriša keletšo ye, ke ile ka lemoga gore ke be ke se sa na  le maikwelo. Ke be ke fetogile mosadi yo a nago le boithati ka mo go tseneletšego.

KAMOO BEIBELE E FETOTŠEGO BOPHELO BJA KA: Ke be ke tseba gore ge e ba ke nyaka go ba le dika tše dibotse, ke be ke swanetše go šoma ka thata. Eupša ke be ke sa tsebe moo ke tlago go thoma gona. Ke ile ka phetha ka gore ke ye kereke ya baebangedi kua Madrid yeo ke bego ke ile ka e etela gatee ke ena le batswadi ba ka. Ke ile ka rapela Modimo ke diriša leina la gagwe la Jehofa.

Go se go ye kae ka morago ga moo, Dihlatse tše pedi tša Jehofa di ile tša tla lapeng la ka. Ke ile ka boledišana le tšona ka mafolofolo ka Beibele, eupša ke be ke ganetšana le tšona gantši mabapi le seo di bego di se ruta. Esther, e lego Hlatse yeo e bego e ithuta Beibele le nna ka mehla, o be a sa mphelele pelo. Yena le lapa la gagwe ba be ba mpontšha lerato le botho e le ruri. Ke ile ka thoma go ba gona dibokeng tšeo di bego di swarwa ke Dihlatse gomme go se go ye kae ka lemoga gore ke hweditše therešo yeo ke bego ke e nyaka.

Ke be ke sa tšwa go fetša dithuto tša ka tša go bapala diterama ge ke be ke bulegelwa ke dibaka tša mošomo tše sa swanego. Ke ile ka abelwa karolo papading yeo e bego e tla bontšhwa lefelong le le tumilego kua Madrid leo go bapalwago dipapadi tša sefaleng go lona. Eupša ke ile ka lemoga gore bakeng sa gore ke atlege bjalo ka sebapadi ke be ke swanetše go ineela ka mo go feletšego mošomong wa go ba sebapadi sa dipapadi tša sefaleng. Mafelelong ke ile ka phetha ka go nyaka mohuta o mongwe wa mošomo, wo o bego o tla nthuša go tsepamiša kgopolo go hlankeleng Modimo. Ke ile ka lemoga therešo ya mantšu a Jesu a rego: “Ga go yo a ka bago lekgoba la marena a mabedi, gobane o tla hloya yo mongwe a rata yo mongwe goba o tla kgomarela yo mongwe a nyatša yo mongwe. Le ka se be makgoba a Modimo le a Mahumo.” (Mateo 6:24) Lesogana la ka leo re bilego gotee ka nywaga e seswai ga se la ka la dumelelana le seo ke bego ke ithuta sona, ka gona ke ile ka phetha ka gore ke fediše tswalano ya rena. Diphetogo tše di be di se bonolo.

KAMOO KE ILEGO KA HOLEGA KA GONA: Ga bjale ke dira mošomo wa nakwana, ke thuša batšofadi ka mediro ya tša boiketlo le boithabišo. Go dira bjalo go nthuša gore ke fetše nako ya ka e ntši ke ithuta Beibele le batho bao ba dulago lefelong la rena ba bolelago Searabia. Ke swanetše go šoma ka thata gore ke ithute leleme le le lefsa, eupša ke thabela kudu go abelana dilo tše dibotse tšeo ke ithutilego tšona le batho bao ba nago le moya wa go amogela baeng le bao ba sekametšego dilong tša moya.

Maikwelo a go ikwa ke se na selo ge ke be ke ithutela go ba sebapadi sa dipapadi tša sefaleng ga bjale a tšeetšwe legato ke a go ba le morero bophelong. Ke ikwa Jehofa a nthušitše go ba motho yo mokaone le yo a thabilego.

“Ke ile ka Hlatsela Gore Moahlodi o be a Fošitše.”—PAUL KEVIN RUBERY

NGWAGA WA MATSWALO: 1954

NAGA: ENGELANE

BOPHELO BJA PELE E EBA MOKRISTE: SESENYI SE SEŠORO

BOPHELO BJA KA BJA NAKONG E FETILEGO: Ke belegetšwe Dudley, e lego toropo e kgolo ya diintaseteri ya ka Bodikela bja Dinageng tša Gare. Tate o ile a ntlwaetša go rata go bala go tloga bjaneng. O ile a ba a nkgothaletša go kgahlegela dilo tše makatšago tša tlhago, gaešita le ge a be a re di bile gona ka tlhagelelo. O nthutile gore Modimo ga a gona. Go sa šetšwe seo, batswadi ba ka ba ile ba nthomela sekolong sa Sontaga sa kereke ya Methodist.

Ge ke be ke ena le nywaga e  seswai, ke ile ka bona bašemane ba motseng ba fiša sekepe mokerong. Maphodisa a ile a tla, eupša letšhogo le ile la mpalediša go bolela le ona. Bašemane ba be ba ntšhošeditše. Ke ile ka latofatšwa ka go hloka toka ka molato woo gomme ka befelwa. E le ge ke itefeletša, ke ile ka senya dikolo, dikereke le difeketori tša mo motseng, e lego bosenyi bjoo bo bego bo lekana dikete tša diranta. Ge ke be ke ena le nywaga e lesome, ke be ke šetše ke thomile go hula dintlo le mabenkele. Ke be ke kgahlwa ke mollo gomme ke tšhumile meago e mentši. Barutiši sekolong ba be ba re ke ngwana wa go se laolege.

Ge ke be ke ena le nywaga e 12, ke ile ka hwetša puku ya go dirišana le meoya gomme ka itirela letlapa leo le dirišetšwago go ikgokaganya le meoya le le bitšwago Ouija. Ka ge batswadi ba ka ba be ba sa dumele go Modimo, ba be ba nagana gore go kgahlegela ga ka meoya e be e le selo sa go ithabiša le seo se sego kotsi le gore se be se tla nthuša gore ke se tsene mathateng. Eupša ge ke be ke fetša sekolo, ke be ke šetše ke ile ka sekišwa gantši kgorong ya tsheko ya disenyi tša bafsa. Ke be ke le setho sa sehlopha se sešoro seo se bitšwago dihlogo tša diphalola. Ke be ke sepela ke itlhamile ka legare le ka ketane ya paesekele. Ke ile ka hwetša mošomo eupša go se go ye kae wa ntahlegela ka gobane ke ile ka swarwa ka nakwana. Ka morago ga gore ke lokollwe, ke ile ka thoma go senya meago gape gomme ka swarwa le go lahlelwa kgolegong nywaga e mebedi. Moahlodi o ile a re nka se tsoge ke fetogile le gore ke motho yo kotsi setšhabeng.

Ka morago ga go lokollwa kgolegong, ke ile ka gahlana le kgarebe ya ka ya nakong e fetilego e lego Anita. Re ile ra nyalana gomme ka dula nakwana ke sa utswe goba go baka mathata. Lega go le bjalo, ka morago ga nywaga e mmalwa, ke ile ka boela bophelong bja ka bja bosenyi. Ke ile ka thoma go thuba mafelo a dikgwebo le go utswa diseifi tša wona. Ke ile ka thoma go diriša dihlaretagi, go nwa kudu le go sepela ke itlhamile ka sethunya. Ke ile ka swarwa gape le go lahlelwa kgolegong.

Mokgwa wa ka wa bophelo o ile wa bakela Anita kgateletšego e šoro ya monagano. Ngaka ya gagwe e ile ya mo nea diphilisi tša go okobatša eupša ya mmotša gore seo a bego a se nyaka e be e le tlhalo. Ke ile ka holega ka gore ga se a ka a tšea keletšo ya ngaka yeo.

KAMOO BEIBELE E FETOTŠEGO BOPHELO BJA KA: Ge re sa tšwa go nyalana, Anita o ile a ithuta Beibele ka nakwana le Dihlatse tša Jehofa. Bjale, ge ke be ke sa le ngwageng wo e bego e swanetše go ba wa mafelelo ke le kgolegong, o ile a etelwa gape ke Dihlatse. Go ile gwa direga gore ka lona letšatši leo ke rapele Modimo ka gore: “Ge e ba o le gona e le ka kgonthe, nnee bohlatse.”

Ge ke be ke lokollwa kgolegong dikgwedi tše mmalwa ka morago, ke ile ka ya go moruti wa mo motseng gomme ka mo kgopela gore a ithute Beibele le nna le Anita. O ile a re o tla re ruta feela ditumelo tša kereke gotee le thapelo.

Mafelelong, ke ile ka thoma go bala Beibele. Ke ile ka makatšwa ke go ithuta gore Beibele e ganetša go dirišana le meoya. (Doiteronomio 18:10-12) Ka morago, ke ile ka hwetša kopi ya Morokami yeo Dihlatse di bego di e tlogeletše Anita ka letšatši leo ke ilego ka rapela Modimo bakeng sa thušo. Seo ke ilego ka se bala se ile sa ntutueletša gore ke ikgokaganye le Dihlatse.

Ba malapa a borena, bagwera le disenyigotee le nna ba be ba sa thabišwe ke go kwa gore re be re ithuta Beibele le Dihlatse tša Jehofa. Ba bangwe ba be ba re ke fetotšwe mogopolo. Go bolela therešo, bjoko bja ka bo be bo nyaka go hlwekišwa. Semelo sa ka se be se ena le mafokodi a mantši, letswalo la ka le be le fokola e bile go oketša dibeng tše dingwe tša ka, ke be ke kgoga disekerete tše e ka bago tše 60 ka letšatši. Dihlatse tšeo di re thušitšego go ithuta Beibele le tšeo re bego re kopanela le tšona phuthegong ya rena di be di sa re felele pelo e bile di le botho. Mafelelong, ke ile ka itokolla mekgweng ya ka e mebe.—2 Bakorinthe 7:1.

KAMOO KE ILEGO KA HOLEGA KA GONA: Ga bjale nna le Anita re na le nywaga e 35 re nyalane. Yo mongwe wa bana ba rena le ditlogolo tša rena tše pedi ba hlankela Jehofa gotee le rena. Nywageng ya morago bjale nna le Anita re kgonne go fetša nako e ntši ya rena re thuša ba bangwe go ithuta Beibele.

Go hlankela Jehofa Modimo go dirile gore re be le morero bophelong. Morago kua ka bo-1970, moahlodi o ile a botša kgoro ya tsheko gore nka se tsoge ke fetogile. Lega go le bjalo, ka thušo ya Modimo le tlhahlo ya Beibele, ke ile ka hlatsela gore moahlodi o be a fošitše.