Babadi ba Rena ba a Botšiša . . .

Na Bakriste ka Moka Bao ba Botegago ba ya Legodimong?

▪ Batho ba bantši ba badile mantšu a Jesu a homotšago a rego: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.” (Johane 3:16) Na Jesu o be a bolela gore barapedi ka moka bao ba botegago ba Tatagwe, Jehofa Modimo, ba be ba tla ya legodimong go yo thabela bophelo bjo bo sa felego ba thabile e le ka kgonthe?

Ela hloko mantšu a Jesu ao a šišinyago kgopolo a rego: “Ga go motho yo a kilego a rotogela legodimong ge e se yo a theogilego a etšwa legodimong, e lego Morwa wa motho.” (Johane 3:13) Se se bolela gore barapedi ba botegago ba nakong e fetilego ba bjalo ka Noa, Aborahama, Moshe le Dafida ba be ba se ba ya legodimong. (Ditiro 2:34) Bjale, ka moka ga bona ba ile kae? Ka boripana: Babotegi ba bogologolo ba ka lebitleng, ba robetše lehung, ga ba tsebe selo gomme ba letetše tsogo.—Mmoledi 9:5, 6; Ditiro 24:15.

Ka Beibeleng, Jesu ke yena wa mathomo yo a ilego a bolela gore ba bangwe ba tla phela legodimong ka morago ga lehu. O ile a botša baapostola ba gagwe gore o be a tla ba lokišetša lefelo legodimong. (Johane 14:2, 3) Se e be e le selo se sefsa bathong ba Modimo. Ka morago moapsotola Paulo o ile a hlalosa gore ka morago ga lehu la Jesu le go tsošetšwa ga gagwe legodimong, Jesu o ile a ‘kgakolela barutiwa ba gagwe tsela e mpsha le e phelago’—tsela yeo go beg go se na motho yo mongwe yo a kilego a e sepela pele.—Baheberu 10:19, 20.

Na se se bolela gore go tloga ka nako yeo go ya pele babotegi ka moka ba be ba tla ya legodimong? Ga go bjalo, ka gobane go tsošetšwa legodimong go sepedišana le kabelo yeo e newago batho ba itšego. Mantšiboeng a mafelelo ba le gotee, Jesu o ile a botša baapsotla ba gagwe gore ba be ba tla ‘dula didulong tša bogoši gore ba ahlole’ Mmušong wa gagwe wa legodimong. Ka go re’alo, kabelo ya bona e be e tla ba go buša le Jesu legodimong.—Luka 22:28-30.

Ka ntle le baapostola, batho ba bangwe le bona ba be ba tla fiwa kabelo ye e kgahlišago. Moapostola Johane o ile a bona Jesu ponong a ena le sehlopha sa bao ba tsošitšwego ba le legodimong bao ba hlaloswago e le ‘mmušo le baperisita bao ba tla bušago godimo ga lefase.’ (Kutollo 3:21; 5:10) E be e le ba bakae? Go etša pušong e nngwe le e nngwe, ke ba sego kae feela bao ba bušago. Go bjalo le ka Mmušo wo wa legodimong. Jesu, Kwana ya Modimo, o buša le babušigotee le yena ba 144 000 ‘bao ba rekilwego gare ga batho.’—Kutollo 14:1, 4, 5.

Ke therešo gore palo ya 144 000 ke e nyenyane ge e bapišwa le palo ya babotegi ka moka, ba nakong e fetilego le ba gona bjale. Eupša se se a kwagala ka gobane ba 144 000 ba tsošetšwa legodimong bakeng sa kabelo e itšego e kgethwa ya mošomo. Ge o be o ka swanelwa ke go aga ntlo, na o be o tla hira baagi ka moka bao ba nago le bokgoni ba tikologong ya geno? Aowa. O be o tla nyaka feela palo yeo e nyakegago bakeng sa modiro. Ka mo go swanago, ga se babotegi ka moka bao ba kgethilwego ke Modimo bakeng sa tokelo ya moswananoši ya go buša le Kriste legodimong.

Mmušo wo wa legodimong o tla phethagatša morero wa Modimo wa mathomong bakeng sa batho. Jesu le babušigotee le yena ba 144 000 ba tla okamela go fetošwa ga lefase ka moka gore e be paradeise, moo babotegi bao ba sa balegego ba tlago go dula gona ka mo go sa felego ba thabile. (Jesaya 45:18; Kutollo 21:3, 4) Bona ba tla akaretša bao ba lego kgopolong ya Modimo, bao ba tlago go tsošwa.—Johane 5:28, 29.

Barapedi ka moka ba botegago ba Jehofa—ba nakong e fetilego le ba gona bjale—ba ka amogela mpho e kgahlišago ya bophelo bjo bo sa felego. (Baroma 6:23) Ba sego kae ba tla amogela bophelo legodimong bakeng sa kabelo e kgethegilego gomme ba bangwe ba bantši kudu ba tla amogela bophelo paradeiseng ya lefase ka moka.