Bophelo bjo bo Nago le Morero Gona Bjale le ka mo go sa Felego

O KA phela bophelo bjo bo nago le morero wa kgonthe gaešita le gona bjale. Bjang? Ka go latela melao ya motheo e bohlale yeo e hwetšwago ka Lentšung la Modimo, e lego Beibele. Anke re hlahlobeng e sego kae feela ya yona.

MOLAO WA MOTHEO WA BEIBELE: Kgoši Solomone o ngwadile gore: “Ga go se se phalago gore motho a je le go nwa gomme a thabiše moya wa gagwe ka tše botse ka baka la boitapišo bja gagwe.”—MMOLEDI 2:24.

Re bopetšwe gore re kgotsofatšwe ke mošomo o agago. Gaešita le ge o lebeletšana le maemo a thata kudu, o ka hwetša tekanyo e itšego ya kgotsofalo bophelong gona bjale ge o šoma ka mafolofolo le ka potego.

MOLAO WA MOTHEO WA BEIBELE: “Go na le lethabo le legolo go neeng go feta go amogeleng.”—DITIRO 20:35.

Batho ba bantši ba lemogile gore go direla batho dilo—ka mohlala, go gafa nako ya bona gotee le matla go thuša ba bangwe dinakong tša mathata—go ba putsitše kudu e bile go tladitše maphelo a bona ka morero wa kgonthe. Solomone o ngwadile gore: “O se ke wa lesa go dira botse go bao bo ba swanetšego ge seatla sa gago se kgona go dira bjalo.”—Diema 3:27.

Ela hloko mohlala wa Ralph. Ka morago ga go rola modiro, o ile a tlatša mosadi wa gagwe bodireding bja nako e tletšego bja Bokriste. Yo mongwe le yo mongwe wa bona o fetša tekanyo e itšego ya diiri a le bodireding kgwedi e nngwe le e  nngwe, ba ikgafela go ruta ba bangwe Beibele. Ralph o re: “Ge re fihla gae mantšiboa, ga re fihle re lapišitšwe ke botšofadi feela, eupša re fihla re lapišitšwe ke go diriša matla a rena ka moka re direla Tatago rena wa legodimong. Ke molapo o kgahlišago!” Yena le mosadi wa gagwe ba thabile ka gobane ba phelela go nea ba bangwe.

MOLAO WA MOTHEO WA BEIBELE: “Mogwera wa kgonthe o dula a na le lerato ka dinako tšohle, e bile ke ngwanabo motho yo o ka ithekgago ka yena mohlang wa tlalelo.”—DIEMA 17:17.

Mathata a ka kgotlelelwa gabonolo ge a rwadišanwa. Mongwadi wa ditaodišo wa Leisemane e lego Francis Bacon o ngwadile gore “lefase le bjalo ka lešoka” go bao ba se nago bagwera ba kgonthe. Go ba le bagwera ba kgonthe—le go ba mogwera wa kgonthe—go ka dira gore o kgone go kgotlelela bophelo; go ka dira le gore bophelo e be bjo bobotse le bjo bo kgotsofatšago.

MOLAO WA MOTHEO WA BEIBELE: “Go thaba bao ba lemogago gore ba nyaka dilo tša moya.”—MATEO 5:3.

Ka go re’alo, Jesu o bontšhitše selo se bohlokwa seo se nyakegago ge e ba motho a nyaka go bona phethagatšo ya dikholofetšo tša Modimo—go lemoga “go nyaka [ga gagwe] dilo tša moya” le go kgotsofatša senyakwa seo. Go fapana le diphoofolo, re na le kganyogo ya ka gare ya go nyaka go kwešiša morero wa bophelo. Ke Jehofa Modimo feela yoo a ka kgotsofatšago senyakwa seo e bile o dira bjalo ka Lentšu la gagwe, e lego Beibele. Ka ge re bone sehlogong se se fetilego, Beibele e utolla morero wa Modimo ka lefase. E re botša lebaka leo ka lona re lego mo, lebaka leo ka lona go nago le tlaišego e kaakaa le seo Modimo a letetšego gore re se dire. Go nyakega gore re kwešiše ditherešo tše bjalo tša Mangwalo e le gore re phele bophelo bjo bo nago le morero le bjo bo kgotsofatšago. Bao ba iphago nako ya go ithuta Beibele le go diriša seo ba ithutago sona ba thabile. Ka baka la’ng? Ka gobane ka go dira bjalo ba aga tswalano ya kgauswi kudu le Mmopi wa rena, “Modimo yo a thabilego,” Jehofa.—1 Timotheo 1:11.

MOLAO WA MOTHEO WA BEIBELE: “Gopola Mmopi wa gago . . . pele go etla nako ya mathata gomme go batamela nywaga yeo o tla rego, ‘Ga ke bone morero wa yona.’”—MMOLEDI 12:1, THE NEW ENGLISH BIBLE.

Keletšo ya Kgoši Solomone yeo e lebišitšwego go bafsa, bao lebakeng le itšego ba ka palelwago ke go lemoga masetlapelo ao bophelo bo ka a tlišago, e šoma go rena ka moka. Phelela go kgahliša Mmopi wa gago. Seo se tla dira gore bophelo bja gago bo be le morero wa kgonthe. Gana go ba le boemo bja kgopolo bja gore: “A re jeng gomme re nweng, gobane gosasa  re tla hwa.” (1 Bakorinthe 15:32) Mmoledi 8:12 e re ge e ba o etiša Modimo pele, “dilo di tla [go] sepelela gabotse.”

Ngwanenyana yo a bitšwago Wendi o bone therešo ya mantšu ao. Ge e be e sa le yo monyenyane, yena le ngwanabo ba ile ba ithuta Sepaniši e le gore ba ka hudugela Dominican Republic, moo go bego go ena le tlhokagalo e kgolo ya bagoeledi ba ditaba tše dibotse tša Beibele. “Re ile ra gafa dilo tše dintši gore re yo hlankela moo go nago le tlhokagalo, eupša re ile ra ipshina kudu ka modiro woo. Ga go selo se sengwe se sekaone go feta modiro woo seo nkabego ke ile ka se dira ka dikgwedi tšeo tše tshela! Ditšhegofatšo tšeo re ilego ra di hwetša di be di feta kgole boikgafo bjoo re bego re bo dirile.”

Go Botegela Modimo go Dira Gore Bophelo bo be le Morero

Go aga tswalano ya kgauswi le Jehofa go ka dira gore bophelo bja gago bo be le morero ka tsela e kgethegilego kudu. Bjang? Sathane ga se a dira gore Adama le Efa ba rabele kgahlanong le bogoši bja Modimo feela, eupša o ile a ba a umaka gore ga go motho yoo a bego a ka dula a botegela Modimo ge a lekwa. (Jobo 1:9-11; 2:4) O ka thuša go hlatsela Sathane e le moaketši! Bjang? Ka go dula o botegela Modimo, ka go kgomarela melao ya gagwe ya motheo le ka go bontšha gore o lemoga tshwanelo ya Jehofa e phagamego ya go re bontšha se se lokilego le se sebe.—Kutollo 4:11.

Re ka swanelwa ke go kgotlelela ditlhohlo ge e ba re nyaka go sepela tseleng e lokilego. Na ditlhohlo tšeo di tla re amoga bophelo bjo bo nago le morero? Go ba gona, akanya lenaba le lešoro le bolela maaka ka mogwera wa rena yo a rategago goba setho sa lapa. Ge e ba go emelela leina la moratiwa yoo go ka dira gore lenaba leo le re tlaiše, na seo se be se tla re amoga bophelo bjo bo nago le morero? Ga go bjalo le gatee! Re tla kgotlelela go tlaišetšwa seo ka lethabo. Go bjalo le ka go dula re botegela Modimo. Go dula re botega ka tlase ga maemo a gona bjale a mabe ge e le gabotse go thabiša pelo ya Modimo.—Diema 27:11.

Bophelo bjo bo Nago le Morero ka mo go sa Felego

Ka gona, ikemišetše go ithuta sohle seo o ka se kgonago ka Modimo le morero wa gagwe. Jesu Kriste o itše: “Se se bolela bophelo bjo bo sa felego, gore ba tsebe wena Modimo a nnoši wa therešo le yo o mo romilego, Jesu Kriste.” (Johane 17:3) Ge Modimo a phethagatša morero wa gagwe wa mathomong ka lefase, batho ba botegago ba tla thabela seo Jehofa a bego a ba reretše sona mathomong—“bophelo bjo bo sa felego” lefaseng la paradeise. Ke moka bophelo e tla ba bjo bo nago le morero le bjo bo kgotsofatšago.—Psalme 145:16.

O ka hwetša kae tsebo yeo Jesu a bego a bolela ka yona? O ka e hwetša ka Lentšung le le buduletšwego la Modimo, e lego Beibele. Ge e ba o ka rata go thušwa go dira se, ikwe o lokologile go ngwalela bagatiši ba makasine wo. Ba tla thabela go rulaganya gore motho yo mongwe a go thuše go ithuta seo ge e le gabotse Beibele e se rutago.