Ke Mang yo a Swanetšego go Ruta Bana ka Modimo?

“Morutwana ga a fete morutiši wa gagwe, eupša yo mongwe le yo mongwe yo a rutilwego gabotse o tla swana le morutiši wa gagwe.”—LUKA 6:40.

BATSWADI ba bangwe ba ikwa ba sa swanelege go ka ruta bana ba bona ka Modimo. Ba ka nagana gore ga ba na thuto e lekanego goba tsebo e lekanego ka bodumedi moo ba ka bago barutiši ba babotse. Ka baka leo, ba ka ikwa ba nyaka go tlogelela wa leloko goba moetapele wa bodumedi boikarabelo bjo bjo bohlokwa.

Bjale, ke mang yo a swanelegago kudu go ruta bana ditherešo tša bodumedi le melao ya motheo ya boitshwaro? Ela hloko seo Beibele e se bolelago ka taba ye gomme o bapiše dipolelo tšeo le seo banyakišiši ba se utolotšego.

Karolo ya Tate ke Efe?

Seo Beibele e se rutago: “Botate, le se ke la fehla kgalefo baneng ba lena, eupša ba godišeng ka tlwaetšo le tlhahlo ya Morena.”—Baefeso 6:4, “Holman Christian Standard Bible.”

Seo banyakišiši ba se utolotšego: Botate ba holega bjang ge ba eba le ditumelo tše tiilego tša bodumedi? Sehlogo sa Fathers’ Religious Involvement and Early Childhood Behavior, se se gatišitšwego ka 2009, se re: “Go itswakanya le batho ba bodumedi go ka thuša banna gore e be botate ba bakaone. Bodumedi bo nea batho thekgo ya tša leago le taolo gotee le sehlopha sa dithuto  le tlhahlo tša kamoo motho a ka phelago ka gona.”

Beibele e gatelela bohlokwa bja karolo yeo e tšewago ke tate go godišeng le go tlwaetšeng bana. (Diema 4:1; Bakolose 3:21; Baheberu 12:9) Eupša na keletšo yeo e a šoma le lehono? Ka 2009, Yunibesithi ya Florida e ile ya gatiša sehlogo seo se hlalosago kamoo botate ba ilego ba kgoma bana ba bona ka gona. Banyakišiši ba hweditše gore bana bao botatago bona ba bilego le karolo go ba godišeng ba be ba sekametše go bontšheng kwelobohloko le go ipona ba le bohlokwa. Bašemanyana gantši ba be ba itshwara gabotse gomme banenyana ba bonagala ba phetše gabotse monaganong. Ka ntle le pelaelo, keletšo ya Beibele e sa šoma.

Karolo ya Mma e Bohlokwa Gakaaka’ng?

Seo Beibele e se rutago: “O se ke wa lahla molao wa mmago.”—Diema 1:8.

Seo banyakišiši ba se utolotšego: Ka 2006, Handbook of Child Psychology e boletše gore: “Ka karolelano, bomma ba fetša nako ya magareng ga 65 lekgolong le 80 lekgolong go feta botate ba boledišana le go dira dilo le bana ba bona ba banyenyane, gomme dipalopalo tše bjalo di a swana dinageng tše dintši.” Ge mma a fetša nako e bjalo le ngwana, polelo, ditiro le mekgwa ya gagwe e kgoma kgolo ya ngwana wa gagwe kudu.

Ge mma le tate ba šoma mmogo go ruta bana ba bona therešo ka Modimo, ba ba nea bonyenyane dimpho tše pedi tše bohlokwa. Ya pele, bana ba ba le sebaka sa go ba le tswalano le Tatago bona wa legodimong, e lego segwera seo se tlago go ba thuša maphelong a bona ka moka. Ya bobedi, bana ba ithuta ka mohlala kamoo monna le mosadi wa gagwe ba swanetšego go dirišana ka gona go fihlelela dipakane tše bohlokwa. (Bakolose 3:18-20) Gaešita le ge ba bangwe ba ka kgona go thuša tate le mma, ke batswadi bao ba nago le boikarabelo bja go ruta bana ba bona ka Modimo le mabapi le kamoo Modimo a nyakago gore lapa le dire dilo ka gona.

Lega go le bjalo, batswadi ba swanetše go ruta bana ba bona bjang? Ke mekgwa efe yeo e ka šomago gakaonekaone?