KA MOKA ga rena re nyaka go ratwa ke batho. Na o ikwa ka tsela yeo?— * Beibele e bolela ka Dorokase, e lego mosadi yoo a bego a ratwa kudu ke batho ba bantši.

Dorokase o be a dula Jopa, e lego motse wo o lego kgauswi le Lewatle la Mediterranean. Jerusalema e be e le bokgole bja dikhilomithara tše ka bago tše 56 tikologong ya ka gare ya naga go tloga Jopa. Dorokase e be e le yo mongwe wa barutiwa ba Jesu ba mathomo.

O nagana gore ke ka baka la’ng Dorokase a be a ratwa kudu?— Ge e le gabotse, Beibele e re o be a dira dilo tše dintši tše dibotse gomme a nea ba bangwe dimpho tše dibotse. O be a direla bahlologadi diaparo tše dibotse, e lego basadi bao ba hwetšwego ke banna ba bona. Gape o be a botša ba bantši ka Modimo wa therešo, e lego Jehofa, bjalo ka ge Jesu a dirile.

Na o tseba se sebe seo se diragalelago Dorokase gona bjale?— O thoma go babja kudu gomme o a hwa. Bagwera ba gagwe ka moka  ba nyamile. Ka gona ba romela batho moo moapostola Petro a dulago gona, mo e ka bago bokgole bja dikhilomithara tše 16. Ba mo kgopela gore a tle kapejana. Ge Petro a fihla, o ya ka phaphošing ya ka godimo moo Dorokase a lego gona. Basadi ka moka ba a lla gomme ba mmontšha diaparo tšeo Dorokase a ba diretšego tšona.

Ke moka Petro o ntšhetša yo mongwe le yo mongwe ka ntle. Petro le baapostola ba bangwe ba be ba dirile mehlolo nakong e fetilego, eupša ga go le o tee wa bona yo a kilego a tsoša motho yo a hwilego. O nagana gore Petro o dira’ng ga bjale?—

Petro o khunama kgauswi le setopo gomme o rapela Jehofa. Ke moka o botša Dorokase gore a tsoge. Gomme Dorokase o a tsoga! Petro o mo nea seatla sa gagwe gomme o mo thuša go emelela. Ke moka o bitša bahlologadi le ba bangwe gomme o ba bontšha yena. Na o ka akanya kamoo ka moka ga bona ba thabilego ka gona?—

Anke ga bjale re akanye ka seo o ka ithutago sona kanegelong ye ya mabapi le tsogo ya Dorokase. Selo se sengwe seo e se bontšhago ke gore ge e ba o thuša ba bangwe, o tla ratwa ke ba bantši ba bona. Eupša se bohlokwa le go feta ke gore o tla gopolwa le go ratwa ke Modimo. A ka se tsoge a lebetše dilo tše dibotse tšeo o di direlago batho ba bangwe. Gomme o tla go putsa ka bophelo bjo bo sa felego bja lethabo lefaseng la gagwe le lefsa la toko.