4 Modimo ga a na Toka—Na ke Therešo?

Seo o ka bago o se kwele: “Modimo o ikarabela ka lefase le gomme dilo ka moka tšeo di diregago di direga ka thato ya gagwe. Ka ge lefase le tletše kgethollo, go hloka toka le kgatelelo, Modimo o swanetše go ba a ikarabela.”

Seo Beibele e se rutago: Modimo ga se mothopo wa go hloka toka mo go lego gona lefaseng. Beibele e hlalosa Jehofa ka gore: “Mediro ya gagwe e phethagetše, gobane ditsela tša gagwe ka moka ke tša toka.”—Doiteronomio 32:4.

Modimo o nea bohle ka seatla se se bulegilego, go akaretša le bao go bonagalago ba sa swanelege. Ka mohlala, o “hlabišetša ba kgopo le baloki letšatši la gagwe gomme a nešetša ba ba lokilego le ba sa lokago pula.” (Mateo 5:45) O swara batho ba merafo ka moka ka toka, bjalo ka ge Ditiro 10:34, 35 e bontšha ge e re: “Modimo ga a bebe sefahlego, eupša setšhabeng se sengwe le se sengwe motho yo a mmoifago gomme a dira se se lokilego o a amogelega go yena.”

Lega go le bjalo, mothopo wa go hloka toka ke mang? Batho ba bantši ba kgetha go dira dilo ka go hloka toka, ka go se latele mohlala wa Modimo wa toka. (Doiteronomio 32:5) Gape, Beibele e bontšha gore Modimo o dumeletše lenaba la gagwe, Diabolo, go ba le taolo godimo ga lefase. * (1 Johane 5:19) Lega go le bjalo, go dumelela ga Modimo pušo ye ya go hloka toka go tla fela kgauswinyane. O šetše a rulagantše ditsela tša gagwe tša go “fediša mediro ya Diabolo.”—1 Johane 3:8.

Kamoo go tseba therešo go go thušago ka gona: O ka ba o gateletšwa ke dipego tša bomenetša, kgatelelo le go hloka toka tšeo go bonagalago di sa kgaotše. Go tseba sebaki sa mathata go go thuša go kwešiša lebaka la gore maemo e be a mabe ka tsela ye le la gore maiteko a motho a go leka go dira lefase lefelo le lekaone a dule a palelwa. (Psalme 146:3) Go e na le go fetša nako e ntši le matla a gago o dira diphetogo tša nakwana, o ka ba le kholofelo e tiilego ya bokamoso yeo e theilwego go boteng dikholofetšo tša Modimo.—Kutollo 21:3, 4.

Go kwešiša mothopo wa kgonthe wa go hloka toka go ka re thuša kudukudu ge mathata a re kgoma. Ge re swarwa ka go hloka toka, re ka lla go swana le mohlanka wa Modimo Habakuku ge a be a re: “Molao o felelwa ke matla gomme ga go na toka.” (Habakuku 1:4) Modimo ga se a ka a kgalemela Habakuku bakeng sa go bolela mantšu a. Go e na le moo, Modimo o ile a kgonthišetša mohlanka wa Gagwe ka gore O beile nako ya go lokiša ditaba gomme o ile a mo thuša go hwetša lethabo ge a lebeletšane le mathata. (Habakuku 2:2-4; 3:17, 18) Ka mo go swanago, go bota kholofetšo ya Modimo ya go lokiša go hloka toka go tla go thuša go ba le boiketlo le khutšo ya monagano lefaseng le le se nago toka.

[Mongwalo wa tlase]

[Ntlhakgolo go letlakala 7]

Na ruri Modimo o ikarabela ka tlaišego le go hloka toka?

[Mothopo wa Seswantšho go letlakala 7]

© Sven Torfinn/​Panos Pictures