Na o Kile wa Botšwa Maaka?

KE DILO tše sego kae tše kwešago bohloko go feta go tseba gore motho yo mongwe yoo o mmotago o go boditše maaka. O ka ikwa o gobošitšwe, o befetšwe goba e bile o ekilwe. Maaka a senya segwera le manyalo; a amoga batho dimilione tše sa balegego tša diranta ka boradia.

Ka gona, akanya kamoo o bego o tla ikwa ka gona ge o be o ka tseba gore o boditšwe maaka ka Modimo. Ge e ba o le motho wa borapedi, seo se ka go kgoma kudu, go swana le kamoo se kgomilego batho ba bao ba tsenago kereke:

● “Ke ile ka ikwa ke radiilwe ke kereke.”—DEANNE.

● “Ke be ke befetšwe. Ke ile ka ikwa ke hlalefeditšwe—gore dikholofelo le dipakane tša ka e be e le tša lefeela.”—LUIS.

O ka no ba o sa nagane gore o boditšwe maaka ka Modimo. Seo o se tsebago o ka ba o se boditšwe ke motho yo o mmotago le yoo a ka se tsogego a go kwešitše bohloko ka maikemišetšo—batswadi ba gago, moruti goba mogwera wa kgauswi. O ka ba o feditše bophelo bja gago ka moka o dumela thuto e itšego. Eupša na o a dumela gore gaešita le thuto e tletšego lefaseng e ka ba e le ya maaka? Yo e kilego ya ba Mopresidente wa United States e lego Franklin D. Roosevelt o ile a lemoga ntlha ye, ka ge a itše: “Go boaboeletšwa ga maaka ga go a fetoše therešo.”

O ka lemoga bjang gore o boditšwe maaka? Jesu o kile a botša Modimo ka thapelo gore: “Lentšu la gago ke therešo.” (Johane 17:17) Ee, Lentšu la Modimo, Beibele, le hupere seo re se nyakago gore re hlaole therešo maakeng.

Ke ka baka la’ng o sa dumelele Beibele gore e pepentšhe dithuto tša maaka tše tlwaelegilego ka Modimo? O tla bona kamoo therešo e ka kaonefatšago bophelo bja gago ka gona.