Therešo e ka Fetoša Bophelo bja Gago

O KA ba o kwele goba o rutilwe tše dingwe tša dithuto tša maaka ka Modimo tšeo lelokelelo le la dihlogo le di pepentšhitšego. Go dutše go le bjalo, o ka dikadika go fetoša ditumelo tša gago, kudukudu ge e ba o di dumetše bophelo bja gago ka moka.

Ke mo go kwagalago gore o dikadike. Dikereke tše dingwe di nyatša kgopolo ya go bapetša dithuto tša tšona le seo Beibele e se bolelago. Ba bangwe ba leka go emelela dithuto tša bona tše fošagetšego ka go bolela gore Beibele ga e hlalosege le gore e diretšwe go se kwešišwe ke batho ka moka. Lega go le bjalo, barutiwa ba bantši ba Jesu e be e le batho ba tlwaelegilego, ba sa rutegago, eupša ba ile ba kwešiša seo a bego a se ruta.—Ditiro 4:13.

O ka dikadika go hlahloba ditumelo tša gago ka poifo ya gore go dira bjalo go bontšha go hloka tumelo. Eupša na ke ga tlhaologanyo go nagana gore Modimo a ka se thabišwe ke ge o hlahloba Beibele, e lego molaetša wa gagwe bathong, e le gore o kwešiše seo a se nyakago go wena? Ka mo go fapanego, Lentšu la gagwe le go kgothaletša go hlahloba Mangwalo ka bowena, ge le re: “Le itlhatselele thato e botse le e amogelegago le e phethegilego ya Modimo.”—Baroma 12:2.

Go ithuta therešo ka Modimo go feta go tlatša monagano ka tsebo—go ka fetoša bophelo bja gago gore e be bjo bokaone. (Johane 8:32) Deanne, yo go boletšwego ka yena sehlogong sa mathomo, ga bjale o agile tumelo ya gagwe Lentšung la Modimo. O anega ka gore: “Ke be ke sa lemoge gore Mangwalo a kwagala ka tsela ye go fihlela ke ithuta Beibele. Ga bjale ke tseba Jehofa e le Tate yo lerato wa legodimong, e sego feela Modimo yo e sego motho wa kgonthe. Ke hweditše morero wa kgonthe bophelong.”

Mohlomongwe o ile wa ithuta Beibele nakong e fetilego gomme wa bona e sa go hole. Ge e ba go le bjalo, o se ke wa langwa. Go leka go kwešiša Beibele mola o rutilwe maaka ka Modimo go swana le go leka go bopa seswantšho se segolo o diriša diripana tša sona eupša o lebeletše seswantšho se se fošagetšego. O ka kopanya diripana tše sego kae gabotse eupša wa langwa ka baka la go ferekanywa ke ge di sa sepedišane le seswantšho seo o se filwego. Ka gona, thoma ka seswantšho se se nepagetšego, ke moka diripana tšeo di tla kopana gabotse.

Na o ka rata go ithuta therešo ka Modimo? Re go laletša gore o ikgokaganye le Dihlatse tša Jehofa tša lefelong la geno goba o ngwalele atereseng e swanetšego yeo e lego go letlakala 4 la makasine wo bakeng sa thuto e sa lefelelwego ya legae ya Beibele.

[Ntlhakgolo go letlakala 9]

“Le itlhatselele thato e botse le e amogelegago le e phethegilego ya Modimo.”—BAROMA 12:2.