Batamela Kgauswi le Modimo

Go Phethagatša Tlamo ya Rena go Modimo

NA O kile wa ipotšiša gore, ‘Morero wa bophelo ke ofe?’ Jehofa ga se a re nea bokgoni bja go botšiša potšišo e bjalo feela eupša o re neile le kganyogo e tseneletšego ya go nyaka go tseba karabo. Re leboga Modimo wa rena yo lerato ka gobane ga se a re tlogela leswiswing. Karabo yeo re e nyakago e ka Lentšung la gagwe, Beibele. Ela hloko mantšu a Kgoši Solomone ao a hwetšwago go Mmoledi 12:13.

Solomone o be a le boemong bja moswananoši. O be a ka bolela gabotse mabapi le kamoo go ka hwetšwago lethabo le morero wa bophelo ka gona. Ka ge a be a šegofaditšwe ka bohlale bjo bo fetago bjo bo tlwaelegilego, mahumo le bogoši, o ile a kgona go dira nyakišišo e tseneletšego ka seo batho ba se phegelelago, go akaretša le go nyaka ga bona mahumo le maemo. (Mmoledi 2:4-9; 4:4) A bolela ka tlase ga pudulelo, o ile a phetha nyakišišo ya gagwe ka gore: “Bofelo bja ditaba tšohle tšeo o di kwelego ke gore: Boifa Modimo wa therešo gomme o lote ditaelo tša gagwe. Ka gobane se ke sohle seo motho a tlamegilego go se dira.” Mantšu ao a gatelela selo se se holago le se segolo kudu seo batho ba ka se phegelelago.

“Boifa Modimo wa therešo.” Kgopolo ya go boifa Modimo mathomong e ka bonala e le e sa ipiletšego. Eupša poifo ye ke tshekamelo e botse ya pelo. Ga re akanye ka mohlanka yo a boifago go befediša mong wa gagwe yo a sa swarego batho gabotse, eupša re akanya ka ngwana yo a fišegelago go kgahliša tate yo lerato. Puku e nngwe ya ditšhupetšo e re go boifa Modimo ke “tlhompho le poifo tšeo batho ba Gagwe ba Mmontšhago tšona ka gobane ba Mo rata e bile ba hlompha matla a Gagwe le bogolo bja Gagwe.” Boemo bjo bjalo bja kgopolo bo re tutueletša go ikokobeletša thato ya Modimo ka gobane re mo rata e bile re tseba gore o a re rata. Poifo ye yeo e swanetšego ga e fo ba maikwelo; e bontšhwa ka ditiro. Bjang?

“O lote ditaelo tša gagwe.” Go boifa Modimo go re tutueletša go mo kwa. Go kwa Jehofa ke selo se se kwagalago. Bjalo ka Mmopi wa rena, o tseba tsela e kaonekaone yeo re swanetšego go phela ka yona, go fo swana le ge mohlami wa dilo a tseba tsela e kaonekaone ya go diriša ditšweletšwa tša gagwe. Go oketša moo, Jehofa o re kganyogela dilo tše dibotse. O nyaka gore re thabe e bile ditaelo tša gagwe di hlametšwe go re thuša gore re phele ka boiketlo. (Jesaya 48:17) Moapostola Johane o bea taba ka tsela ye: “Gobane se ke seo lerato la Modimo le se bolelago, gore re boloke ditaelo tša gagwe gomme ditaelo tša gagwe ga di boima.” (1 Johane 5:3) Go kwa ga rena go hlatsela gore re rata Modimo, gomme ditaelo tša gagwe di bontšha gore o a re rata.

“Se ke sohle seo motho a tlamegilego go se dira.” Mantšu a a gatelela lebaka le bohlokwa la go boifa Modimo le go mo kwa. Go dira bjalo ke tlamo le kabelo ya rena. Jehofa ke Mmopi wa rena, ka gona re mo kolota bophelo bja rena. (Psalme 36:9) Re mo kolota le go mo kwa. Re phethagatša tlamo ya rena ge re phela kamoo a nyakago re phela ka gona.

Ka gona, morero wa bophelo ke ofe? Ka mantšu a bonolo, ke gore: Re bopetšwe go dira thato ya Modimo. Ga go na tsela e kaone ya go dira gore bophelo bja gago bo be le morero go phala ye. Ke ka baka la’ng o sa ithute ka mo go oketšegilego ka thato ya Jehofa le kamoo o ka phelago ka go dumelelana le yona? Dihlatse tša Jehofa di tla thabela go go thuša.

Mmalo wa Beibele o šišintšwego bakeng sa November:

◼ Diema 22-31; Mmoledi 1-12–Sefela sa Difela 1-8