Ithute Lentšung la Modimo

Melao ya Modimo e re Hola Bjang?

Sehlogo se se rotoša dipotšišo tšeo o ka bago o ile wa di botšiša le go go bontšha moo o ka balago dikarabo gona ka Beibeleng ya gago. Dihlatse tša Jehofa di tla thabela go ahlaahla dikarabo tše le wena.

1. Ke ka baka la’ng re swanetše go kwa Modimo?

Go tloga go swanetše gore re kwe Modimo—re bopilwe ke yena. Gaešita le Jesu o be a ekwa Modimo ka mehla. (Johane 6:38; Kutollo 4:11) Melao ya Modimo e re nea tsela ya go hlatsela gore re a mo rata.—Bala 1 Johane 5:3.

Melao ka moka ya Jehofa Modimo e a re hola. E re ruta tsela e kaonekaone ya bophelo gona bjale le go bontšha kamoo re ka hwetšago mehola ya ka mo go sa felego nakong e tlago.—Bala Psalme 19:7, 11; Jesaya 48:17, 18.

2. Melao ya Modimo e hola boemo bja rena bja tša maphelo bjang?

Molao wa Modimo kgahlanong le botagwa o re šireletša malwetšing a bolayago le dikotsing. Go nwa kudu go a lemalelwa gomme go lebiša boitshwarong bja bošilo. (Diema 23:20, 29, 30) Jehofa o re dumelela go nwa bjala eupša ka go lekanyetša.—Bala Psalme 104:15; 1 Bakorinthe 6:10.

Jehofa gape o re lemoša kgahlanong le mona, bogale bjo bo sa laolegego le mekgwa e mengwe e senyago. Boemo bja rena bja tša maphelo bo tla holega, go ithekgile ka gore re diriša keletšo ya gagwe gakaakang.—Bala Diema 14:30; 22:24, 25.

3. Molao wa Modimo o re šireletša bjang?

Molao wa Modimo o iletša thobalano ya ka ntle ga lenyalo. (Baheberu 13:4) Banyalani bao ba kwago molao wo ba ikwa ba šireletšegile kudu gomme ba dira gore bana ba bona ba phele tikologong e kaone. Ka lehlakoreng le lengwe, thobalano ya ka ntle ga lenyalo gantši e feleletša ka malwetši, tlhalo, bošoro, khuduego ya maikwelo le malapa a motswadi o tee.—Bala Diema 5:1-9.

Re šireletša bogwera bja rena le Modimo ka go phema maemo ao a re lekago gore re be le thobalano ya ka ntle ga lenyalo. Re phema le go gobatša ba bangwe.—Bala 1 Bathesalonika 4:3-6.

  4. Go hlompha bophelo go re hola bjang?

Batho bao ba hlomphago mpho ya Modimo ya bophelo ba thabela boemo bjo bobotse bja tša maphelo ge ba kgaotša mekgwa e bjalo ka go kgoga le ditemalelo tše dingwe tšeo di beago bophelo kotsing. (2 Bakorinthe 7:1) Modimo o tšeela godimo gaešita le bophelo bja ngwana yo a golago ka popelong. (Ekisodo 21:22, 23) Ka gona ga se ra swanela go bolaya ka boomo ngwana yo a sešogo a belegwa. Le gona, bao ba tšeelago godimo pono ya Modimo ka bophelo, ba gata megato ya tšhireletšego mošomong, ka gae le ka koloing. (Doiteronomio 22:8) Go oketša moo, ga ba lekele hlogong ka maphelo a bona ka baka la dipapadi, ka gobane bophelo ke mpho e tšwago go Modimo.—Bala Psalme 36:9.

5. Go lebelela madi e le a makgethwa go re hola bjang?

Madi ke a makgethwa ka gobane Modimo o re a emela bophelo bja sephedi, goba moya wa sona. (Genesi 9:3, 4) Re holwa ke molao wa Modimo woo o lekanyago mohola wa madi le wa bophelo. Bjang? Molao wo o dira gore re kgone go lebalelwa dibe.—Bala Lefitiko 17:11-13; Baheberu 9:22.

Madi a Jesu e be e le a bohlokwa kudu ka gobane o be a phethagetše. Jesu o ile a nea Modimo selo seo se bego se emela bophelo bja gagwe—madi a gagwe. (Baheberu 9:12) Madi a gagwe a tšholotšwego a dira gore re kgone go hwetša bophelo bjo bo sa felego.—Bala Mateo 26:28; Johane 3:16.

Bakeng sa tsebišo e oketšegilego, bona dikgaolo 12 le 13 tša puku ye, Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.