Batamela Kgauswi le Modimo

“Mokgethwa, Mokgethwa, Mokgethwa ke Jehofa”

GE O be o ka swanelwa ke go kgetha lentšu letee la go hlalosa Jehofa Modimo—seo a lego sona—o be o tla kgetha lefe? Lekgolong la seswai la nywaga B.C.E., moporofeta Jesaya o ile a newa pono yeo go yona a ilego a kwa dibopiwa tša moya di reta Jehofa, di diriša lentšu leo le hlalosago karolo ya motheo ya seo a tlogago A le sona, e lego bokgethwa. Seo Jesaya a se bonego le seo a se kwelego di swanetše go re tlatša tlhompho le go re batametša kgauswi le Jehofa. Ge re dutše re hlahloba mantšu a Jesaya 6:1-3, akanya o le moo.

Jesaya o bona’ng? Jesaya o bega gore: “Ke ile ka bona Jehofa a dutše sedulong sa bogoši se se phagamego.” (Temana 1) Jesaya ga a bone Morena yo a Phagamego Jehofa ka go lebanya. Mahlo a nama ga a kgone go bona lefelong la moya. Beibele e bolela ka go lebanya gore: “Ga go motho yo a kilego a bona Modimo ka nako le ge e le efe.” (Johane 1:18) Seo Jesaya a se bonago ke pono. * Lega go le bjalo, pono yeo e bonagala gabotse kudu—e bonagala e le ya kgonthe moo e lego gore Jesaya o a makala, gomme o itshwara tše nkego o bona Jehofa.

Ka morago Jesaya o bona seo mohlomongwe go se nago motho yo mongwe yo a kilego a newa tokelo ya go se bona ponong. O ngwala gore: “Barongwabatuki ba be ba mo [Jehofa] ukametše. Yo mongwe le yo mongwe wa bona o be a na le diphego tše tshela. Ka tše pedi o be a ikhupetša sefahlego, ka tše pedi a apeša maoto gomme a fofa ka tše pedi.” (Temana 2) Barongwabatuki ke dibopiwa tša moya tša maemo a phagamego kudu. Jesaya ke yena mongwadi a nnoši wa Beibele yo a bolelago ka bona. Barongwabatuki ba dula ba le komana-madula-a-bapile go ya go dira seo Modimo a nyakago ba se dira. Ba ikhupeditše sefahlego le maoto, e le go bontšha tlhompho e swanetšego go Yo ba nago le tokelo ya go mo hlankela.

Jesaya ga se a makatšwa feela ke seo a se bonago eupša o makatšwa le ke seo a se kwago. Ka ge ba bopa sehlopha sa diopedi sa legodimong, barongwabatuki ba opela ka go hlaboša. Jesaya o ngwala gore: “Ba goeletšana ba re: ‘Mokgethwa, mokgethwa, mokgethwa ke Jehofa wa madira!’” (Temana 3) Lentšu la Seheberu leo le fetoletšwego e le ‘kgethwa’ le fetiša kgopolo ya bohlweki le tshekego. Lentšu le gape le akaretša “kgopolo ya tokologo e feletšego le go kgaogana le seo e lego se sebe.” Kopelong yeo mohlomongwe e lego ya go hlatlolana, barongwabatuki ba opela lentšu “mokgethwa” gararo, e lego seo se gatelelago gore Jehofa ke yo mokgethwa ka tekanyo e phagamego kudu. (Kutollo 4:8) Ka gona, bokgethwa ke seka seo se hlaolago seo a lego sona. Jehofa o sekile, o hlwekile e bile ga a na bosodi ka mo go feletšego.

Go tseba gore Jehofa ke yo mokgethwa go swanetše go re tutueletša go batamela kgauswi le yena. Ka baka la’ng? Ka go se swane le babuši bao e lego batho bao e ka bago ba kgopo le ba swarago ba bangwe gampe, Jehofa ga a na bobe ka mo go feletšego. Ka gona bokgethwa bja gagwe bo re kgonthišetša gore o tla dula e le Tate yo kaone, Mmuši yo a lokilego le Moahlodi yo a sa bebego sefahlego. Re na le mabaka ohle a go kgodišega gore Modimo yoo a hlaloswago ke bokgethwa a ka se tsoge a re nyamišitše.

Mmalo wa Beibele o šišintšwego bakeng sa December:

▪ Jesaya 1-23

[Mongwalo wa tlase]

[Ntlhakgolo go letlakala 26]

Go tseba gore Jehofa ke yo mokgethwa go swanetše go re tutueletša go batamela kgauswi le yena