Beibele e Fetoša Maphelo

KGAREBE yeo e godišitšwego gabohloko e ile ya hwetša bjang morero wa kgonthe bophelong? Ke’ng seo se ilego sa tutuetša lerabele le šoro la tša dipolitiki gore e be modiredi wa bodumedi yo a nago le khutšo? Bala dipego tše gore o hwetše dikarabo.

“Ke be ke Tloga ke Nyaka go Hwetša Borutho le Lerato.”—INNA LEZHNINA

NGWAGA WA MATSWALO: 1981

NAGA: RUSSIA

BOPHELO BJA PELE E EBA MOKRISTE: GO GODIŠWA GABOHLOKO

BOPHELO BJA KA BJA NAKONG E FETILEGO: Ke belegwe ke le sefoa ke batswadi bao e lego difoa. Ke ile ka thabela nywaga ya pele e tshela ya bophelo bja ka. Ka morago batswadi ba ka ba ile ba hlalana. Gaešita le ge ke be ke sa le yo monyenyane kudu, ke be ke kwešiša seo se bolelwago ke tlhalo, gomme e ile ya nkweša bohloko kudu. Ka morago ga tlhalo, tate le kgaetšedi ya ka yo mogolo ba ile ba dula kua Troitsk, mola mma a ile a sepela le nna a hudugela Chelyabinsk. Ge nako e dutše e eya, mma o ile a nyalwa gape. Tate wa ka wa mogodiši o be a lemaletše bjala gomme o be a fela a re itia le mma.

Ka 1993, kgaetšedi ya ka yo mogolo yo a rategago o ile a kgangwa ke meetse. Kotsi yeo e ile ya tšhoša lapa lešo kudu. Mma o ile a thoma go nwa gomme a tlatšana le tate wa ka wa mogodiši go ntshwareng gampe. Ke ile ka thoma go tsoma bophelo bjo bokaone. Ke be ke tloga ke nyaka go hwetša borutho le lerato. Ke ile ka thoma go ya dikerekeng tše di sa swanego ke tsoma khomotšo, eupša ka se e hwetše.

KAMOO BEIBELE E FETOTŠEGO BOPHELO BJA KA: Ge ke be ke ena le nywaga e 13, morutwana yo ke tsenago le yena ka klaseng, yo e bego e le yo mongwe wa Dihlatse tša Jehofa, o ile a mpotša ditaba tše itšego tše di tšwago ka Beibeleng. Ke be ke thabela go ithuta ka baanegwa ba ka Beibeleng ba bjalo ka Noa le Jobo, bao ba ilego ba hlankela Modimo go sa šetšwe maemo a thata. Go se go ye kae ke ge ke ithuta Beibele le Dihlatse gomme ke eya dibokeng tša tšona.

Go ithuta Beibele go ile gwa ntshedimoša ka ditherešo tše dintši tše di kgahlišago. Ke ile ka kgongwa ke go ithuta gore Modimo o na le leina. (Psalme 83:18) Ke ile ka kgahlwa ke go bona kamoo Beibele e boletšego e sa le pele ka go nepa ka maemo ao a bego a tla ba gona “mehleng ya bofelo.” (2 Timotheo 3:1-5) Le gona ke ile ka thabišwa ke go ithuta ka kholofelo ya tsogo. Nagana feela—ke tlo bona kgaetšedi ya ka gape!—Johane 5:28, 29.

 Lega go le bjalo, ga se yo mongwe le yo mongwe yo a bego a thabela go mpona ke thabile. Mma le tate wa ka wa mogodiši ba be ba hloile Dihlatse tša Jehofa. Ba ile ba leka go nkgapeletša gore ke kgaotše go ithuta Beibele. Eupša ke be ke rata seo ke bego ke ithuta sona e bile ke se ka ikemišetša go kgaotša.

Go be go se bonolo go kgotlelela kganetšo ya ka gae. Re ile ra kwa bohloko kudu gape ge kgaetšedi ya ka yo monyenyane, yo a bego a eya le nna dibokeng tša Dihlatse tša Jehofa, le yena a kgangwa ke meetse. Lega go le bjalo, Dihlatse di be di dula di nthekga. Gare ga tšona, ke ile ka hwetša borutho le lerato tšeo ke bego ke dutše ke di nyaka bophelo bja ka ka moka. Ke ile ka lemoga gore bjo e swanetše go ba e le bodumedi bja therešo. Ka 1996, ke ile ka kolobetšwa ka ba yo mongwe wa Dihlatse tša Jehofa.

KAMOO KE ILEGO KA HOLEGA KA GONA: Ke na le nywaga e tshela ke nyalane le monna wa ka yo botse yo a bitšwago Dmitry. Re hlankela gotee ofising ya lekala ya Dihlatse tša Jehofa ya St. Petersburg. Ge nako e dutše e eya, pono ya batswadi ba ka ka ditumelo tša ka e ile ya fetoga.

Ke leboga kudu gore ke tseba Jehofa! Go mo hlankela go dirile gore ke be le morero wa kgonthe bophelong.

“Ke be ke Tshwenywa ke Dipotšišo tše Dintši.”—RAUDEL RODRÍGUEZ RODRÍGUEZ

NGWAGA WA MATSWALO: 1959

NAGA: CUBA

BOPHELO BJA PELE E EBA MOKRISTE: LERABELE LA TŠA DIPOLITIKI

BOPHELO BJA KA BJA NAKONG E FETILEGO: Ke belegetšwe Havana, Cuba, gomme ke goletše lefelong leo le diilago moo meferefere ya ditarateng e bego e atile. Ge ke dutše ke gola, ke ile ka kgahlegela papadi ya judo le dipapadi tše dingwe tša go lwa.

Ke be ke le morutwana yo bohlale gomme batswadi ba ka ba ile ba nkgothaletša gore ke ye yunibesithi. Ge ke le moo, ke ile ka thoma go nagana gore go be go nyakega gore tshepedišo ya tša dipolitiki ya naga ya gešo e fetošwe.  Ke ile ka phetha ka gore ke rabele. Nna le morutwana yo ke bego ke tsena le yena ka klaseng re ile ra hlasela lephodisa, re holofetše gore re tla le tšeela sethunya sa lona. Tlhaselo yeo e ile ya tlogela lephodisa leo le gobetše kudu hlogong. Nna le morutwana yoo re ile ra lahlelwa kgolegong bakeng sa tlhaselo yeo gomme ra ahlolelwa lehu la go thuntšhwa ke maphodisa. Ke be ke ena le nywaga e 20 feela, eupša ke be ke lebanwe ke lehu!

Ge ke be ke lewa ke bodutu seleng ya ka ya kgolegong, ke be ke itlwaetša tsela yeo ke bego ke tla itshwara ka yona pele ga maphodisa ao a bego a tlo nthuntšha. Ke be ke sa nyake go bontšha poifo ka tsela le ge e le efe. Ka nako e swanago, ke be ke tshwenywa ke dipotšišo tše dintši. Ke be ke ipotšiša gore: ‘Ke ka baka la’ng go ena le go hloka toka mo gontši gakaakaa mo lefaseng? Na bophelo bjo ke bjona feela bjo bo lego gona?’

KAMOO BEIBELE E FETOTŠEGO BOPHELO BJA KA: Kahlolo ya rena ya lehu e ile ya feleletša e fetotšwe gore re e be nywaga e 30 kgolegong. Nakong ye ke gona moo ke ilego ka kopana le ba bangwe ba Dihlatse tša Jehofa, bao ba bego ba swaretšwe ditumelo tša bona tša bodumedi. Ke ile ka kgahlwa ke boitshwaro bja Dihlatse bja go bontšha sebete le khutšo. Gaešita le ge di be di swerwe ka mabaka a fošagetšego, di be di se tša galefa goba go befelwa.

Dihlatse di ile tša nthuta gore Modimo o na le morero ka batho. Di ile tša mpontšha ka Beibeleng gore o tla fetoša lefase la rena paradeise yeo e se nago bosenyi le go hloka toka. Di ile tša nthuta gore lefase le tla tlala batho bao ba lokilego, bao ba tlago go ba le sebaka sa go phela ka mo go sa felego ka tlase ga maemo a phethagetšego.—Psalme 37:29.

Ke be ke thabela seo ke bego ke ithuta sona go Dihlatse, eupša semelo sa ka se be se sa swane le sa tšona. Ke be ke nagana gore nka se kgone go ba yo a sa tšeego lehlakore dipolitiking goba go retološa lerama le lengwe ge ke phasolwa. Ka gona ke ile ka phetha ka gore ke ipalele Beibele. Ge ke fetša go e bala, ke ile ka lemoga gore Dihlatse tša Jehofa ke batho ba nnoši bao ba itshwarago go swana le Bakriste ba pele.

Ka go ithuta Beibele, ke ile ka lemoga gore ke be ke swanetše go dira diphetogo tše itšego tše dikgolo bophelong bja ka. Ka mohlala, ke be ke swanetše go hlwekiša polelo ya ka ka ge ke be ke tlwaetše go rogana. Gape ke be ke swanetše go kgaotša go kgoga. Le gona ke be ke swanetše go kgaotša go tšea lehlakore ditabeng tša dipolitiki. Go be go se bonolo go dira diphetogo tše, eupša ka thušo ya Jehofa, ke ile ka atlega ganyenyane-ganyenyane.

E nngwe ya diphetogo tše thata kudu e be le go ithuta go laola bogale bja ka. Ke sa dutše ke rapelela go itshwara tabeng ye. Ke thušitšwe kudu ke ditemana tša Beibele tše bjalo ka Diema 16:32, e rego: “Yo a diegago go galefa o phala mogale, gomme yo a laolago moya wa gagwe o phala yo a thopago motse.”

Ka 1991, ke ile ka kolobetšwa ka ba yo mongwe wa Dihlatse tša Jehofa. Ke ile ka kolobeletšwa ka faking ya meetse kgolegong. Ngwageng o latetšego, rena bagolegwa ba bangwe re ile ra lokollwa gomme ra romelwa Sepania ka gobane re be re ena le metswalo moo. Ge ke fihla Sepania, gateetee ke ile ka ya dibokeng tša Dihlatse tša Jehofa. Dihlatse tša moo di ile tša nkamogela bjalo ka ge eka ke be ke bile le tšona ka nywaga e mentši, gomme di ile tša nthuša gore ke thome bophelo bja ka lefsa.

KAMOO KE ILEGO KA HOLEGA KA GONA: Ke monna yo a thabilego gomme ke hlankela Modimo ke ena le mosadi wa ka le barwedi ba rena. Ke na le tokelo ya go fetša nako ya ka e ntši ke thuša ba bangwe go ithuta Beibele. Ka dinako tše dingwe ke nagana ka lesogana lela leo le bego le lebanwe ke lehu gomme ke leboga kudu kamoo ke ilego ka holega ka gona ga e sa le go tloga ka nako yeo. Ga se feela gore ke a phela eupša e bile ke na le kholofelo. Ke lebeletše pele Paradeiseng yeo e holofeditšwego—nakong ya ge go tla rena toka gomme “lehu le ka se hlwe le sa ba gona.”—Kutollo 21:3, 4.

[Ntlhakgolo go letlakala 19]

“Ke ile ka kgongwa ke go ithuta gore Modimo o na le leina”

[Seswantšho go letlakala 20]

Nna le monna wa ka re thabela go abelana le difoa dikgatišo tša polelo ya diatla