Beibele e Fetoša Maphelo

KE ENG seo monna yo mongwe wa Scotland a hweditšego se ena le mohola go feta go ba le kgwebo e atlegago? Ke’ng seo se thušitšego monna yo mongwe wa Brazil go tlogela bophelo bjo bo gobogilego le go kgaotša go kgoga crack cocaine? Monna yo mongwe wa Slovenia o kgonne bjang go tlogela mokgwa wa gagwe wa go ipolaiša bjala? Bala seo batho ba ba se bolelago.

“Bophelo bja ka bo be bo Bonagala bo Sepela Gabotse.”—JOHN RICKETTS

NGWAGA WA MATSWALO: 1958

NAGA: SCOTLAND

BOPHELO BJA PELE E EBA MOKRISTE: RAKGWEBO YO A ATLEGILEGO

BOPHELO BJA KA BJA NAKONG E FETILEGO: Ke gotše ke sa hloke selo. Tate e be e le tona ya madira a Brithania, ka baka leo lapa lešo le be le huduga gantši. Ka ntle le Scotland, re dutše Engelane, Jeremane, Kenya, Malaysia, Ireland le Tsipero. Go tloga ge ke ena le nywaga e seswai, ke ile ka tsena dikolong tšeo di nago le bodulabarutwana kua Scotland. Mafelelong ke ile ka aloga Yunibesithing ya Cambridge.

Ge ke ena le nywaga e 20, ke ile ka thoma mošomo wa nywaga e seswai wa kgwebo ya oli. Mathomong, ke ile ka šoma Amerika Borwa gomme ka morago ka šoma Afrika ke moka ka feleletša ke šoma Bodikela bja Australia. Ka morago ga go hudugela Australia, ke ile ka hloma khamphani ya tša peeletšo ya ditšhelete, yeo ke ilego ka feleletša ke e rekišitše.

Tšhelete yeo ke ilego ka e hwetša ge ke rekiša khamphani yeo e ile ya dira gore ke kgone go rola modiro ke ena le nywaga e 40. Ke ile ka diriša nako yeo ke bego ke ena le yona go etela dinaga. Ke ile ka dikologa Australia ka sethuthuthu gabedi gomme ka tšea leeto la go dikologa lefase ka moka. Bophelo bja ka bo be bo bonagala bo sepela gabotse.

KAMOO BEIBELE E FETOTŠEGO BOPHELO BJA KA: Gaešita le pele nka rola modiro, ke be ke nyaka go hwetša tsela e itšego ya go leboga Modimo ka bophelo bjoo ke bego ke bo thabela. Ke ile ka thoma go ya Kerekeng ya Anglican, yeo ke bego ke godišeditšwe go yona. Eupša kereke e be e sa nee thuto e ntši e tšwago Beibeleng. Ka morago, ke ile ka ithuta le Mamormon, eupša ke be ke nyamišwa ke go se ithekge ga ona ka Beibele.

Ka letšatši le lengwe, Dihlatse tša Jehofa di ile tša kokota mojakong wa ka. Ke ile ka bona di tloga fase gore di theile dithuto tša tšona ka mo go feletšego Beibeleng. Lengwalo le lengwe leo di ilego tša mpalela lona e be e le la 1 Timotheo 2:3, 4. Ditemana tšeo di bolela gore thato ya Modimo ke gore “mehuta yohle ya batho e phološwe gomme e fihle tsebong e nepagetšego ya therešo.” Ke be ke kgahlwa ke gore Dihlatse di be di sa gatelele feela tsebo eupša di be di gatelela tsebo e nepagetšego yeo e theilwego Beibeleng.

Go ithuta Beibele le Dihlatse tša Jehofa go nthušitše go hwetša tsebo yeo ye e nepagetšego. Ka mohlala,  ke ithutile gore Modimo le Jesu ga se karolo ya Boraro Botee bjo bo sa kwešišegego; go e na le moo, ke batho ba babedi bao ba sa swanego. (Johane 14:28; 1 Bakorinthe 11:3) Ke be ke thabetše go ithuta therešo yeo e bonolo. Gape ke be ke tshwentšwe ke gore ke be ke sentše nako e ntši nakong e fetilego ke leka go kwešiša selo seo se ka se kwešišegego!

Go se go ye kae ke ile ka thoma go ya dibokeng tša Dihlatse tša Jehofa. Ke ile ka kgahlwa ke bogwera le ditekanyetšo tše phagamego tša boitshwaro tša yo mongwe le yo mongwe moo—ba be ba bonala eka ke bakgethwa. Lerato la bona la kgonthe le ile la nkgodiša gore ke be ke hweditše bodumedi bja therešo.—Johane 13:35.

KAMOO KE ILEGO KA HOLEGA KA GONA: Ka morago ga ge ke kolobeditšwe, ke ile ka kopana le mosadi yo a kgahlišago yo a bitšwago Diane. O be a godišitšwe e le yo mongwe wa Dihlatse tša Jehofa, gomme o be a na le dika tše dintši tše dibotse tšeo di bego di nkgahla. Ge nako e dutše e eya, re ile ra nyalana. Bogwera bja Diane le thekgo ya gagwe e bile tšhegofatšo e tšwago go Jehofa.

Nna le Diane re ile ra ba le kganyogo e tseneletšego ya go hudugela lefelong leo go bego go na le tlhokagalo e kgolo ya baboledi ba ditaba tše dibotse tša Beibele. Ka 2010, re ile ra hudugela Belize, Amerika Bogare. Mo re hlankela batho bao ba ratago Modimo le bao ruri ba nyoretšwego tsebo ya Beibele.

Ke na le khutšo ya monagano ka gore ke feleleditše ke tseba therešo ka Modimo le Lentšu la gagwe, Beibele. Ka ge ke le modiredi wa nako e tletšego, ke thabetše go ruta batho ba bangwe ba mmalwa Beibele. Ga go na selo seo se phalago go bona ge therešo ya Beibele e kaonefatša bophelo bja motho—go etša ge e kaonefaditše bja ka. Mafelelong, ke hweditše tsela e di phalago tšohle ya go leboga Modimo ka bophelo bjoo ke bo thabelago.

“Ba Ile ba Mpontšha Botho.”—MAURÍCIO ARAÚJO

NGWAGA WA MATSWALO: 1967

NAGA: BRAZIL

BOPHELO BJA PELE E EBA BOKRISTE: TSELA E GOBOGILEGO YA GO PHELA

BOPHELO BJA KA BJA NAKONG E FETILEGO: Ke goletše Avaré, torotswana e homotšego nageng ya São Paulo. Bontši bja badudi ba yona ba a šoma.

Tate o hlokofetše nakong ya ge mma a nkimile. Ge ke sa le mošemanyana, ke be ke apara diaparo tša mma ge a be a sa tšwile. Ke ile ka ba le mekgwa ya bosadi, gomme batho ba ile ba thoma go ntšea ke le mosodoma. Ge nako e dutše e eya, ke ile ka thoma go robala le bašemane le banna ba bangwe.

Nakong ya ge ke fetša nywaga ya mahlalagading, ke ge ke nyaka batho bao nka robalago le bona (banna gotee le basadi) gohle moo ke bego nka ba hwetša gona—dipareng, di-nightclub, gaešita le dikerekeng. Nakong ya menyanya ya boithabišo, ke be ke apara bjalo ka mosadi gomme ke bina meletlong ya sekolo sa mmino wa samba. Ke be ke tumile kudu.

Ke be ke ena le bagwera bao e lego basodoma, bagweba-ka-mmele le bao ba lemaletšego dihlaretagi. Ba bangwe ba bona ba ile ba ntutueletša go leka go kgoga crack cocaine, gomme go se go ye kae ke ge ke e lemaletše. Ka dinako tše dingwe re be re kgoga bošego ka moka. Ka dinako tše dingwe gape, ke be ke ikarola gomme ke tšea letšatši ka moka ke kgoga crack. Ke ile ka ota  moo e lego gore go ile gwa ba le mabarebare a gore ke be ke swerwe ke AIDS.

KAMOO BEIBELE E FETOTŠEGO BOPHELO BJA KA: Mo e ka bago ka nako yeo, ke ile ka kopana le Dihlatse tša Jehofa. Di ile tša mpontšha botho kudu. E nngwe ya ditemana tša Beibele tšeo di ilego tša mpalela tšona e be le ya Baroma 10:13 yeo e rego: “Yo mongwe le yo mongwe yo a bitšago leina la Jehofa o tla phološwa.” Mantšu ao a ile a mpontšha bohlokwa bja go diriša leina la Jehofa. Gantši, ka morago ga ge ke feditše bošego ka moka ke kgoga crack cocaine, ke be ke bula lefasetere, ke lebelela legodimong gomme ke rapela Jehofa ke lla, ke mo kgopela gore a nthuše.

Ka ge ke be ke tshwenyegile ka mma yo a bego a tlaletšwe, yoo a bego a ekwa bohloko kudu ge a be a mpona ke ipolaya ka dihlaretagi, ke ile ka dira phetho ya go kgaotša go di diriša. Kapejana ka morago ga moo, ke ile ka dumela ge Dihlatse di ithaopela go ithuta Beibele le nna. Di ile tša nkgonthišetša gore go ithuta go be go tla matlafatša boikemišetšo bja ka bja go kgaotša go diriša dihlaretagi—gomme go ile gwa ba bjalo!

Ge ke dutše ke tšwela pele ke ithuta Beibele, ke ile ka lemoga gore ke be ke swanetše go fetoša tsela ya ka ya go phela. Go be go le thata kudu go tlogela mekgwa ya ka ya bosodoma, ka ge ke be ke phetše ka yona ka nako e telele kudu. Lega go le bjalo, selo se sengwe seo se ilego sa thuša e bile go tloga tikologong yeo ke bego ke phela go yona. Ke ile ka tlogela bagwera ba ka ba kgale gomme ka se sa ya dipareng le di-nightclub.

Gaešita le ge go be go se bonolo go dira diphetogo tše, ke ile ka homotšwa ke go tseba gore Jehofa o be a ntlhokomela le gore o be a kwešiša go katana ga ka. (1 Johane 3:19, 20) Ka 2002, ke be ke tlogetše mekgwa ka moka ya bosodoma, gomme ngwageng wona woo ke ile ka kolobetšwa ka ba yo mongwe wa Dihlatse tša Jehofa.

KAMOO KE ILEGO KA HOLEGA KA GONA: Mma o ile a kgahlwa kudu ke diphetogo tšeo ke ilego ka di dira moo e lego gore le yena o ile a thoma go ithuta Beibele. Ka manyami, o ile a hwa lehlakore ga e sa le go tloga ka nako yeo. Lega go le bjalo, o ile a tšwela pele a hlagolela go rata Jehofa le therešo ya Beibele.

Nywageng e seswai e fetilego, ke ile ka tsenela bodiredi bja nako e tletšego, ke fetša nako ya ka e ntši ke ruta ba bangwe Beibele. Ke a dumela gore ka dinako tše dingwe ke ile ka swanelwa ke go lwantšha dikganyogo tše di fošagetšego. Eupša ke matlafatšwa ke go tseba gore ge ke kgetha go se kgotsofatše dikganyogo tšeo, nka thabiša Jehofa.

Go batamela kgauswi le Jehofa le go phela ka tsela yeo e mo kgahlago go okeditše boitlhompho bja ka. Lehono, ke monna yo a thabilego.

“Ke be ke le Faki ya go Dutla.”—LUKA ŠUC

NGWAGA WA MATSWALO: 1975

NAGA: SLOVENIA

BOPHELO BJA PELE E EBA MOKRISTE: GO IPOLAIŠA BJALA

BOPHELO BJA KA BJA NAKONG E FETILEGO: Ke belegetšwe Ljubljana, motsemošate wa Slovenia. Ke thabetše bjana bja ka go fihlela ge ke ena le nywaga e mene. Tate o ile a ipolaya nakong yeo. Ka morago ga masetlapelo ao, mma o ile a swanelwa ke gore a šome ka thata gore a fepe bašemane ba babedi bao ba bego ba gola, nna le mogolo’ake.

Ge ke ena le nywaga e 15, ke ile ka yo dula le makgolo. Ke be ke thabela go dula le yena, ka ge bagwera ba ka ba bantši ba be ba  dula moo a dulago gona. Le gona ke be ke lokologile kudu go feta ge ke be ke dula gae. Ge ke ena le nywaga e 16, ke ile ka thoma go gwerana le batho bao ba bego ba enwa mafelobekeng. Ke ile ka godiša moriri wa ka, ka thoma go apara ka tsela ya borabele gomme ka morago ka thoma go kgoga.

Gaešita le ge ke be ke kgoga dihlaretagi tše di fapafapanego, ga se ka ka ka kgaotša go nwa ka ge ke be ke go thabela kudu. Go se go ye kae ke ge ke se sa nwa digalase tše sego kae tša beine eupša ke be ke galampela e fetago lepotlelo letee ka nako e tee. Ke be ke tloga ke kgona go uta gore ke be ke tagilwe gakaakang. Gantši, motho o be a ekwa ge ke hema gore ke be ke nwele. Le nakong yeo, go be go se na yo a bego a kgona go tseba gore ke nwele dilithara tše mmalwa tša beine goba bjala—e bile ke di tswaka le ka vodka!

Gantši, ke nna ke bego ke thuša bagwera ba ka gore ba se thekesele ka morago ga ge re letše disco, gaešita le ge mohlomongwe ke be ke nwele bjala bjo bo fetago bjo ba bo nwelego gabedi. Ka letšatši le lengwe, ke ile ka kwa yo mongwe wa bagwera ba ka a bolela gore ke be ke le faki ya go dutla—polelwana ya Seslovenia ya go kwera motho yo a nwago go feta ba bangwe. Mantšu ao a ile a nkweša bohloko kudu.

Ke ile ka thoma go nagana ka seo ke bego ke se dira ka bophelo bja ka. Ke ile ka ikwa ke se na mohola. Go be go bonagala eka selo se sengwe le se sengwe seo ke bego ke se dira bophelong se be se se na morero.

KAMOO BEIBELE E FETOTŠEGO BOPHELO BJA KA: Mo e ka bago ka nako yeo, ke ile ka lemoga gore yo mongwe wa bao ke bego ke tsena le bona ka klaseng o be a fetogile, a thomile go ba bonolo. Ka ge ke be ke fišegela go tseba ka phetogo ya gagwe, ke ile ka mo laletša gore re intšhe re ye lebenkeleng la go jela. Ge re dutše re boledišana, o ile a hlalosa gore o be a thomile go ithuta Beibele le Dihlatse tša Jehofa. O ile a mpotša tše dingwe tša dilo tšeo a bego a ithuta tšona, tšeo ka moka e bego e le tše difsa go nna ka ge ke be ke se ka godišwa ka tsela le ge e le efe ya bodumedi. Ke ile ka thoma go ya dibokeng tša Dihlatse le go ithuta Beibele le tšona.

Go ithuta Beibele go ile gwa mpula mahlo gomme ka bona ditherešo tše matla le tše tutuetšago. Ka mohlala, ke ile ka ithuta gore re phela nakong yeo Beibele e e bitšago ‘mehla ya bofelo.’ (2 Timotheo 3:1-5) Gape ke ile ka ithuta gore kgauswinyane Modimo o tla fediša batho ba babe lefaseng gomme a nea batho ba lokilego sebaka sa go phela ka mo go sa felego Paradeiseng. (Psalme 37:29) Ke ile ka ba le kganyogo e matla ya go hlwekiša bophelo bja ka e le gore ke tle ke be gare ga batho bao ba ba lokilego.

Ke ile ka thoma go botša bagwera ba ka ka ditherešo tša Beibele tšeo ke bego ke ithuta tšona. Ba bantši ba bona ba ile ba nkwera ka seo ke bego ke ba botša sona, eupša boitshwaro bja bona bo ile bja nthuša ka tsela e sa letelwago. Boitshwaro bja bona bo ile bja nthuša gore ke bone gore e be e se bagwera ba kgonthe. Ke ile ka lemoga gore bothata bja ka bja go nwa bo be bo sepedišana le bagwera bao ke ba kgethago. Ba be ba fetša beke ba fagahletše mafelobekeng gore ba tlo tagwa gape.

Ke ile ka tlogela bagwera bao gomme ka ba le bogwera bjo bo agago le Dihlatse tša Jehofa. Go ba gare ga tšona go be go nkgothatša kudu—e be e le batho bao ba bego ba rata Modimo e le ka kgonthe le bao ba bego ba katanela go phela ka ditekanyetšo tša gagwe. Ganyenyane-ganyenyane, ke ile ka kgona go kgaotša mokgwa wa go ipolaiša bjala.

KAMOO KE ILEGO KA HOLEGA KA GONA: Ke leboga Jehofa gore ga ke sa le sethaba-ka-bodila. Ga ke tsebe gore ke be ke tla feletša kae ge nkabe ke ile ka tšwela pele ditseleng tša ka tša nakong e fetilego. Eupša ke kgodišegile gore ga bjale bophelo bja ka bo kaonafetše.

Nywageng e šupa e fetilego, ke bile le tokelo ya go hlankela ofising ya lekala ya Dihlatse tša Jehofa ya Slovenia. Go tseba Jehofa le go mo hlankela go mphile morero wa kgonthe bophelong.