Batamela Kgauswi le Mokwi wa Thapelo

BATHO ba bantši bao ba rego ba dumela go Modimo ga ba kgone go bolela mabaka a kwagalago a tumelo ya bona. E bile ga ba kgone go hlalosa lebaka leo ka lona bodumedi gantši bo tutueletšago bobe goba lebaka leo ka lona Modimo a dumelelago tlaišego. Seo ba kgonago go se dira ke go rapela Modimo yoo ba sa mo kwešišego.

Lega go le bjalo, wena o ka batamela kgauswi le Modimo ka tsela e fapanego. O ka aga tumelo ya gago kwešišong ka Modimo yeo e go dirago gore o mo rate le go mo tšeela godimo. Tumelo ya kgonthe e theilwe bohlatseng. (Baheberu 11:1) Ge o ka ithuta therešo ka Modimo, o ka mo tseba le go bolela le yena bjalo ka mogwera. Ela hloko maitemogelo a ba bangwe bao ba bego ba fela ba rapela gaešita le ge ba be ba ena le dipelaelo ka go ba gona ga Modimo.

▪ Patricia, go boletšwe ka yena sehlogong sa mathomo. O re: “Letšatšing le lengwe ke be ke ena le sehlopha sa bagwera ba e ka bago ba lesome ge ba be ba thoma go bolela ka bodumedi. Ke be ke ba boditše gore ke ile ka tšwa ka ntlong ke tšhabela poledišano ya tate, yo e bego e le moilamodimo, le yo mongwe wa Dihlatse tša Jehofa, yo a bego a etetše ka gae. Yo mongwe wa bagwera ba ka o ile a re, ‘Mohlomongwe Dihlatse tša Jehofa di na le therešo.’

“Yo mongwe o ile a re, ‘Go re’ng re sa ye go se sengwe sa diboka tša tšona gore re bone?’ Gomme re ile ra dira sona seo. Gaešita le ge re be re ena le dipelaelo, ba bangwe ba rena ba ile ba tšwela pele ba kopanela e le feela ka gobane Dihlatse di ena le bogwera.

“Lega go le bjalo, ka Sontaga se sengwe ke ile ka kwa taba yeo e ilego ya fetoša boemo bja ka bja kgopolo. Seboledi se ile sa hlalosa lebaka leo ka lona batho ba tlaišegago. Ke be ke se ka ka ka kwa gore motho mathomong o be a bopilwe a phethagetše le gore sebe le lehu di tlile ka motho o tee ke moka tša fetela bathong ka moka. Seboledi gape se ile sa hlalosa lebaka leo ka lona lehu la Jesu le bego le nyakega bakeng sa go bušetša batho seo se bego se lahlegetše motho wa pele. * (Baroma 5:12, 18, 19) Gateetee ke ile ka kwešiša dilo ka moka. Ke ile ka nagana gore, ‘Ruri go na le Modimo yo a nago le taba le rena.’ Ke ile ka tšwela pele ke ithuta Beibele gomme go se go ye kae ka hwetša gore la mathomo bophelong bja ka, nka rapela motho wa kgonthe.”

▪ Allan, le yena go boletšwe ka yena sehlogong sa mathomo. O re: “Letšatšing le lengwe Dihlatse tša Jehofa di ile tša etela legaeng la rena, gomme mosadi wa ka o ile a re di tsene ka gobane o be a kgahlilwe ke seo di se boletšego mabapi le go phela ka mo go sa felego lefaseng. Ke ile ka tenega. Ka gona, ke ile ka tlogela baeng ka phaphošing ya ka pele, ka iša mosadi wa ka ka khitšhing gomme ka re go  yena, ‘O se ke wa ba lešilo. O ka se dumele dilo tša mohuta woo!’

“O ile a araba ka gore, ‘Gona eya ka mola gomme o ba bontšhe gore ba fošitše.’

“Go ba gona, ke ile ka palelwa. Eupša ba be ba le botho kudu gomme ba mpha puku ya mabapi le ge e ba bophelo bo bile gona ka Mmopi goba ka tlhagelelo. Mabaka ao e bego e a nea a be a kwagala e bile a ena le motheo moo ke ilego ka phetha ka gore ke swanetše go tseba ka mo go oketšegilego ka Modimo. Ke ile ka thoma go ithuta Beibele le Dihlatse, gomme go se go ye kae ka lemoga gore seo e se bolelago se fapana kudu le dilo ka moka tšeo ke bego ke di nagana ka bodumedi nakong e fetilego. Ge ke dutše ke ithuta ka Jehofa, ke moo dithapelo tša ka di ilego tša thoma go ba tšeo di lebanyago. Ke be ke ena le mekgwa yeo e bego e sa nape e kgahliša, ka gona ke ile ka kgopela thušo ka thapelo. Ke kgodišegile gore Jehofa o arabile dithapelo tša ka.”

▪ Andrew, o dula Engelane. O re: “Gaešita le ge ke be ke ena le dikgopolo tše di tiilego le go kgahlegela thutamahlale kudu, ke be ke dumela thuto ya tlhagelelo feela ka gobane batho ba bangwe ba be ba re ke therešo. Ke be ke gana go dumela go Modimo ka baka la dilo ka moka tše mpe tšeo di diregago.

 “Lega go le bjalo, ka dinako tše dingwe ke be ke nagana gore: ‘Ge e ba go ena le Modimo kua godimo, gona ke nyaka go tseba seo se bolelwago ke taba yeo ka moka. Ke ka baka la’ng bosenyi le ntwa di atile gakaaka?’ Ge ke be ke le mathateng, gantši ke be ke kgopela thušo ka thapelo, eupša ke sa tsebe gore ke bolela le mang.

“Ke moka motho yo mongwe o ile a nea mosadi wa ka pampišana yeo e gatišitšwego ke Dihlatse tša Jehofa e nago le sehlogo se se rego Na Lefase le le tla Phologa? Yeo e be e le potšišo yeo ke bego ke ipotšiša yona gantši. Pampišana yeo e ntirile gore ke ipotšiše mabapi le Beibele gore, ‘Na dikarabo tša yona di ka ba di le bohlokwa?’ Ka morago, ge ke be ke le maikhutšong, motho yo mongwe o ile a nnea puku e rego, Beibele—Na ke Lentšu la Modimo Goba la Motho? * Ge ke be ke lemoga gore Beibele e dumelelana le thutamahlale ya kgonthe, ke ile ka ikwa ke nyaka go ithuta Beibele ka mo go oketšegilego. Ka gona, ge yo mongwe wa Dihlatse tša Jehofa a kgopela go ithuta yona le nna, ke ile ka dumela. Ge ke thoma go kwešiša morero wa Jehofa, ke ile ka ikwa gore ke be ke mo tseba e le motho wa kgonthe, motho yoo nka bolelago le yena ka bolokologi ka thapelo.”

▪ Jan, o godišeditšwe lapeng la Maprotestanta kua London. O re: “Boikaketši bja bodumedi le go ata ga tlaišego di ntirile gore ke se sa rata bodumedi. Ke ile ka ba ka kgaotša go ya kholetšheng gomme ka thoma go opela le go iphediša ka go bapala katara. Ke ile ka kopana le Pat nakong yeo. O be a godišeditšwe lapeng la Makatholika gomme a se sa le modumedi go swana le nna.

“Re be re dula ka ngwakong woo o sa hlwego o hlokomelwa gotee le ba bangwe bao ba tlogetšego sekolo bao ba bego ba kgahlegela madumedi a ka Bohlabela. Re be re dula go fihla bošego kudu re boledišana ka morero wa bophelo. Gaešita le ge nna le Pat re be re sa dumele go Modimo, re be re nagana gore go swanetše go ba go ena le matla ao a neago bophelo.

“Morwa wa rena o ile a belegwa ka morago ga ge re hudugetše ka leboa la Engelane e le ge re nyaka mošomo bjalo ka diopedi. Bošegong bjo bongwe o ile a babja, gomme ke ile ka ipona ke rapela Modimo yoo ke bego ke sa dumele go yena. Go se go ye kae ka morago ga moo, tswalano ya ka le Pat e ile ya phuhlama, gomme ke ile ka tšea ngwana wa rena ka mo tlogela. Gape ke ile ka kgopela thušo ka thapelo, ke duma ge go ka ba go ena le yo a theetšago. Pat le yena o ile a rapela, eupša ke sa tsebe.

“Ka morago letšatšing leo, Dihlatse tša Jehofa tše pedi di ile tša kokota mojakong wa Pat gomme tša mmontšha tše dingwe tša dikeletšo tša Beibele tše šomago. Pat o ile a nteletša mogala gomme a mpotšiša ge e ba nka thabela go ithuta Beibele le yena le Dihlatse. Kapejana re ile ra ithuta gore e le gore re kgahliše Modimo, re be re swanetše go ngwadiša lenyalo la rena ka molao. Taelo yeo e be e bonagala e le thata kudu ge re lebelela tswalano ya rena yeo e sego ya tia.

“Re be re nyaka go tseba ka mo go oketšegilego ka phethagatšo ya diporofeto tša Beibele, lebaka leo ka lona go nago le tlaišego, gotee le seo se bolelwago ke Mmušo wa Modimo. Ganyenyane-ganyenyane, re ile ra lemoga gore Modimo o na le taba le rena, gomme re be re nyaka go dira seo a rego re se dire. Re ile ra nyalana. Bohlale bja Modimo bo re thušitše go godiša bana ba rena ba bararo. Re kgodišegile gore Jehofa o kwele dithapelo tša rena.”

Itlhahlobele Bohlatse

Go swana le ba bangwe ba dimilione, batho bao ba tsopotšwego sehlogong se ga se ba ka ba forwa ke bodumedi bja maaka gomme ba hweditše lebaka leo ka lona Modimo a dumelelago tlaišego. Na o lemogile gore yo mongwe le yo mongwe wa bona o kgodišitšwe ke kwešišo ya Beibele ya gore Jehofa ruri o kwa dithapelo?

Na o ka rata go hlahloba bohlatse bja gore Modimo o gona? Dihlatse tša Jehofa di tla thabela go go thuša go ithuta therešo ka Jehofa le kamoo o ka batamelago kgauswi le “Mokwi wa thapelo.”—Psalme 65:2.

[Mengwalo ya ka tlase]

[Ntlhakgolo go letlakala 10]

“Ge ke thoma go kwešiša morero wa Jehofa, ke ile ka ikwa gore ke be ke mo tseba e le motho wa kgonthe, motho yoo nka bolelago le yena ka bolokologi ka thapelo”

[Seswantšho go letlakala 9]

Tumelo ya kgonthe e theilwe bohlatseng le kganyogong ya go tseba therešo ka Modimo