KARABO e lebanyago ya potšišo ye ke ee. Jehofa o holofetša bao a ba amogelago ka gore: “Ke tla ba lebalela molato wa bona gomme nka se sa gopola sebe sa bona.” (Jeremia 31:34) Ka go re’alo Jehofa o re kgonthišetša gore ge a lebalela badiradibe ba itsholago, ga a sa gopola dibe tša bona. Eupša na seo ruri se bolela gore Mmopi wa legohle le legologolo ga a kgone go gopola dibe tšeo a di lebaletšego? Mantšu a Hesekiele a nea tshedimošo mabapi le kamoo Modimo a lebalelago le go lebala ka gona.—Bala Hesekiele 18:19-22.

Jehofa o ile a tsebatša kahlolo kgahlanong le Juda le Jerusalema tše sa botegego a diriša moporofeta Hesekiele bjalo ka mmoleledi wa gagwe. Setšhaba ka moka se be se lahlile borapedi bja Jehofa e bile se tladitše naga ka bošoro. Jehofa o be a boletše e sa le pele ka go senywa ga Jerusalema ke Bababilona. Eupša ge a be a bolela kahlolo yeo, Jehofa o ile a nea le molaetša wa kholofelo. Motho yo mongwe le yo mongwe o be a ena le kgetho; yo mongwe le yo mongwe o be a ikarabela ka ditiro tša gagwe.—Ditemana 19, 20.

Bjale go thwe’ng ge e ba motho a be a tlogetše bobe bja gagwe gomme a dira botse? Jehofa o itše: “Ge e ba yo kgopo a ka furalela dibe tša gagwe ka moka tše a di dirilego gomme a boloka melao ya ka ka moka, a ba a dira toka le toko, ruri o tla dula a phela. A ka se hwe.” (Temana 21) Ee, Jehofa o be a “ikemišeditše go lebalela” modiradibe yo a tlogetšego tsela ya gagwe ya go se kwe gomme a bontšha boitsholo bja kgonthe.—Psalme 86:5.

Go thwe’ng ka dibe tšeo a di dirilego? Jehofa o hlalositše ka gore: “Dikarogo tša gagwe ka moka di ka se gopolwe.” (Temana 22) Ela hloko gore dibe tša motho yo a itsholago di be “di ka se gopolwe.” Ke ka baka la’ng se se le bohlokwa?

Ka Beibeleng, lentšu la Seheberu leo le fetoletšwego e le ‘gopola’ le ka bolela seo se fetago go fo gopola dilo tša nakong e fetilego. Puku e nngwe ya ditšhupetšo e bolela mabapi le lentšu le gore: “Ge e le gabotse, gantši kudu [le] šupa go mogato goba [le] tšwelela [le] kgokagane le madiri a bontšhago kgato.” Ka gona, ‘go gopola’ go ka bolela “go gata mogato.” Ka baka leo, ge Jehofa a bolela gore dibe tša modiradibe yo a itsholago “di ka se gopolwe,” O ra gore ka morago A ka se gate mogato kgahlanong le motho yoo ka baka la dibe tšeo, e ka ba ka go mo latofatša goba go mo otla. *

Mantšu a Hesekiele 18:21, 22 a hlalosa ka tsela e kgomago pelo ya kamoo Jehofa a lebalelago ka mo go feletšego ka gona. Ge Jehofa a lebalela dibe tša rena, le ka mohla a ka se diriše dibe tšeo kgahlanong le rena nakong e tlago. Go e na le moo, dibe tša bao ba itsholago o di lahlela ka morago ga gagwe. (Jesaya 38:17) Go bjalo ka ge eka o phumola pego ya dibe tšeo.—Ditiro 3:19.

Bjalo ka batho ba sa phethagalago, re tsoma kgaugelo ya Modimo. Go ba gona, re dira dibe gantši. (Baroma 3:23) Eupša Jehofa o nyaka re tseba gore ge e ba re itshola e le ka kgonthe, o ikemišeditše go re lebalela. Le gona ge a lebalela, o a lebala—seo se ra gore le ka mohla a ka se diriše dibe tša rena go re latofatša goba go re otla. A kgopolo e homotšago gakaakang! Na kgaugelo ya Modimo e go šušumeletša gore o nyake go batamela kgauswi le yena?

Mmalo wa Beibele o šišintšwego bakeng sa July:

▪ Hesekiele 6-20

[Mongwalo wa ka tlase]