Pele Jesu Kriste a ka rotogela legodimong ka 33 C.E., o ile a holofetša gore o tla boa. O ile a itshwantšha le motho yo a tswaletšwego bogošing yo a sepetšego ka nako e telele gomme a boa a na le matla a go buša e le kgoši. Morero wa go boa ga Jesu ke go tlo nea batho pušo e botse.—Bala Luka 19:11, 12.

Kriste o tla boa ka mmele wa mohuta mang? O ile a tsošwa e le motho wa moya yo a sa bonagalego. (1 Petro 3:18) Ke moka, o ile a ya legodimong gomme a dula ka letsogong le letona la Modimo. (Psalme 110:1) Ka morago ga nako e telele, Jesu o ile a tlišwa pele ga Jehofa Modimo, “Motala wa Mabaka,” yo a neilego Jesu matla a go buša batho. Ka gona Jesu ga a boe e le motho, eupša o boa e le Kgoši e sa bonagalego.—Bala Daniele 7:13, 14.

Ge Jesu a fihla le barongwa ba gagwe ka tsela e sa bonagalego, o tla ahlola batho. O tla fediša batho ba kgopo eupša bao ba mo amogelago e le kgoši o tla ba nea bophelo bjo bo sa felego.—Bala Mateo 25:31-33, 46.

Go buša ga Jesu e le Kgoši go tla fetoša lefase gore e be paradeise. O tla tsoša bahu e le gore ba thabele bophelo lefaseng leo la Paradeise.—Bala Luka 23:42, 43.