Yeo ke e nngwe ya ditemana tšeo di tsebjago kudu le tšeo di tsopolwago gantši ka Beibeleng ka moka. Go boletšwe gore ga go na temana e nngwe yeo “e hlalosago ka boripana tswalano ya Modimo le batho gotee le go hlalosa tsela ya phološo.” Ka baka leo, dinageng tše dingwe temana ye goba tsopolo ya “Johane 3:16” gantši e ngwalwa ditiragalong tša batho bohle, dipampiring tšeo di kgomaretšwago dikoloing, mengwalong ya mabotong le mafelong a mangwe.

Go bonagala bao ba ngwalago temana ye ba ikwa ba kgodišegile gore lerato la Modimo le kgonthišetša phologo ya bona ya ka mo go sa felego. Go thwe’ng ka wena? Lerato la Modimo le bolela’ng go wena? Le gona o nagana gore Modimo o dirile’ng seo se bontšhago gore o a go rata?

Batho ba bantši ba rata go reta Modimo ka ge a bopile legohle, tlhago le batho ka bobona. Diphedi di raragane kudu e bile di bopilwe gabotse moo e lego gore go swanetše go ba go na le motho yo mogolo yo bohlale yo a di bopilego. Batho ba bantši kudu ba leboga Modimo letšatši le letšatši bakeng sa mpho ya bophelo. Le gona ba lemoga gore ba ithekgile ka Modimo ka mo go feletšego bakeng sa dinyakwa ka moka tša bophelo—tše bjalo ka moya, meetse, dijo le medikologo ya tlhago ya lefase—e le gore ba kgone go tšwela pele ba phela le go thabela seo ba se dirago.

Re dira gabotse go leboga Modimo bakeng sa dilo tše ka moka, ka gobane ruri ke Mmopi wa rena le Mothekgi wa bophelo bja rena. (Psalme 104:10-28; 145:15, 16; Ditiro 4:24) Re ka lemoga lerato leo Modimo a re ratago ka lona ge re nagana ka dilo ka moka tšeo a di dirago bakeng sa go dira gore bophelo bo  kgonege. Moapostola Paulo o beile taba ye ka tsela ye: “[Modimo] o nea batho ka moka bophelo le mohemo le dilo ka moka. Gobane ka yena re na le bophelo, re a sepela e bile re gona.”—Ditiro 17:25, 28.

Lega go le bjalo, lerato la Modimo le bonagatšwa ka ditsela tše dintši go e na le ka go fo re hlokomela ka tsela ya kgonthe. Gape o re dirile gore re phagamele diphoofolo le go re nea seriti ka go re dira gore re nyake dilo tša moya le go re thuša gore re di kgotsofatše. (Mateo 5:3) Ka tsela ye, batho bao ba kwago ba na le tebelelo ya go ba karolo ya lapa la Modimo, e lego “bana” ba gagwe.—Baroma 8:19-21.

Ka ge Johane 3:16 e tšwela pele e bolela, Modimo o re bontšhitše lerato la gagwe ka go romela Morwa wa gagwe, Jesu, lefaseng gore a tlo re ruta ka Modimo wa gagwe yo e lego Tatagwe gotee le go re hwela. Lega go le bjalo, ba bantši ba ka dumela gore ga ba tloge ba kwešiša lebaka leo ka lona go bego go nyakega gore Jesu a hwele batho gotee le kamoo lehu la gagwe e lego pontšho ya lerato la Modimo go rena. Anke re boneng kamoo Beibele e hlalosago lebaka la lehu la Jesu le mohola wa lona.

Batho ka moka ba a hwa gomme ba otlilwe ka bolwetši, botšofadi le lehu. Lega go le bjalo, seo ga se seo Jehofa Modimo a bego a se rerile mathomong. O be a file batho ba pele tebelelo ya go phela ka mo go sa felego paradeiseng mo lefaseng. Eupša seo se be se ithekgile ka selo setee feela: Ba be ba swanetše go mo kwa. Modimo o be a boletše gore ge ba be ba ka kgetha go se mo kwe, ba be ba tla hwa. (Genesi 2:17) Motho wa pele o ile a rabela ka go lebanya bolaoding bja Modimo, gomme a tlišetša yena le bana ba gagwe lehu. Moapostola Paulo o hlalosa gore: “Ka motho o tee sebe se tsene lefaseng gomme lehu la tsena ka sebe, ka go re’alo lehu le aparetše batho bohle gobane bohle ba dirile sebe.”—Baroma 5:12.

Lega go le bjalo, Modimo “o rata toka.” (Psalme 37:28) Gaešita le ge a be a ka se hlokomologe sebe sa ka boomo sa motho wa pele, Modimo ga se a ahlolela batho ka moka tlaišegong le lehung go iša ka mo go sa felego ka baka la go se kwe ga motho o tee. Go e na le moo, ka go diriša molao wa motheo wa gore “bophelo bo lefše ka bophelo,” o lekalekantše dikala tša toka gomme a dira gore bophelo bjo bo sa felego bo kgonege gape bakeng sa batho bao ba kwago. (Ekisodo 21:23) Potšišo e re, Bophelo bjo bo phethagetšego bjoo bo lahlegetšego Adama bo be bo ka hwetšwa bjang gape? Karabo e re: Motho yo mongwe o ile a swanelwa ke go nea, goba go gafa, bophelo bjo bo lekanago le bja Adama—e lego bophelo bjo bo phethagetšego.

Go molaleng gore go be go se na setlogolo sa Adama seo se sa phethagalago seo se bego se ka kgona go lefa theko yeo, eupša Jesu o be a ka kgona. (Psalme 49:6-9) Ka ge a belegwe a se na sepatso sa sebe sa leabela, Jesu o be a phethagetše go fo etša ge Adama a kile a ba bjalo. Ka go re’alo, Jesu o lopolotše batho bokgobeng bja sebe ka go gafa bophelo bja gagwe. Ka go dira bjalo, o neile ditlogolo tša batho ba babedi ba pele sebaka sa go ka thabela bjona bophelo bjo bo phethagetšego bjoo Adama le Efa ba kilego ba bo thabela. (Baroma 3:23, 24; 6:23) Na go na le seo re swanetšego go  se dira gore re holwe ke pontšho ya lerato e kgolo gakaakaa?

Ge re boela go Johane 3:16, re ela hloko mantšu ao a rego “yo mongwe le yo mongwe yo a dumelago go [Jesu] a se ke a fedišwa, eupša a be le bophelo bjo bo sa felego.” Se se bolela gore go hwetša mpho ya bophelo bjo bo sa felego go ithekgile ka maemo. Ge e ba re nyaka gore re “be le bophelo bjo bo sa felego,” re swanetše go dumela go Jesu gomme re mo kwe.

Mo gongwe o ka ipotšiša gore: ‘Go kwa go akaretšwa bjang tabeng ye? Na Jesu ga se a bolela gore “yo mongwe le yo mongwe yo a dumelago go yena” o tla ba le bophelo bjo bo sa felego?’ Ee, go nyakega tumelo. Lega go le bjalo, go bohlokwa go gopola gore ka Beibeleng, go fo dumela gore Jesu o gona ga se gwa lekana. Go ya ka Vine’s Expository Dictionary of Old and New Testament Words, lentšu leo le dirišitšwego ke Johane lelemeng la mathomong le bolela “go ithekga ka, e sego go fo dumela.” E le gore motho a amogelwe ke Modimo, ga go nyakege gore a fo tseba gore Jesu ke Mophološi. Motho yo a dumelago o swanetše gore gape a katanele go diriša seo Jesu a bego a se ruta. Ge e ba motho a sa dire selo, go bolela ga gagwe gore o a dumela ke ga lefeela. Beibele e re: “Tumelo ka ntle le mediro e hwile.” (Jakobo 2:26) Ge taba ye e bewa ka tsela e nngwe, seo se nyakegago go motho yo a dumelago ke go dumela go Jesu—ke gore, o swanetše go phela ka go dumelelana le tumelo ya gagwe.

Paulo o hlalosa taba ye ka tsela ye: “Lerato leo Kriste a nago le lona le a re tutuetša, gobane re phethile ka gore motho o tee [Jesu] o hwetše bohle . . . O hwetše bohle gore bao ba phelago ba se sa hlwa ba iphelela, eupša ba phelele yena yo a ba hwetšego gomme a tsošwa.” (2 Bakorinthe 5:14, 15) Go leboga ga rena sehlabelo sa Jesu go tšwa pelong go swanetše go re tutueletša go dira diphetogo bophelong bja rena—re tlogele go iphelela ka boithati gomme re phelele Jesu yo a re hwetšego. Ke gore, maphelong a rena re swanetše go etiša pele go diriša seo Jesu a bego a se ruta. Ga go pelaelo gore phetogo e bjalo e tla kgoma ditekanyetšo tša rena, dikgetho tša rena le dilo ka moka tšeo re di dirago. Moputso wa bao ba dumelago go Jesu e tla ba ofe?

Karolo ya mafelelo ya Johane 3:16 e bolela ka kholofetšo ya Modimo go bao ba dumelago tokišetšong ya topollo gomme ba phela ka go dumelelana le ditekanyetšo tša gagwe. Modimo o rerile gore batho bao ba botegago ‘ba se ke ba fedišwa, eupša ba be le bophelo bjo bo sa felego.’ Lega go le bjalo, batho ba ba holwago ke lerato la Modimo ba na le ditebelelo tše di sa swanego ka bokamoso.

Jesu o holofeditše sehlopha se sengwe gore se tla phela ka mo go sa felego legodimong. O boditše barutiwa ba gagwe ba botegago ka mo go kwagalago gore o be a yo ba lokišetša lefelo e le gore ba tle ba buše le yena letagong. (Johane 14:2, 3; Bafilipi 3:20, 21) Bao ba tsošetšwago bophelong bja legodimong “e tla ba baperisita ba Modimo le ba Kriste gomme ba tla buša le yena e le dikgoši ka nywaga e sekete (1 000).”—Kutollo 20:6.

Ke feela palo e lekanyeditšwego ya balatedi ba Kriste yeo e bego e tla amogela tokelo e bjalo. Ge e le gabotse, Jesu o itše: “Se boife, wena mohlatswana, gobane Tatago lena o kgahlilwe ke go le nea Mmušo.” (Luka 12:32) “Mohlatswana” woo e be e tla ba wa batho ba bakae? Kutollo 14:1, 4 e re: “Ka lebelela gomme ka bona Kwana [Jesu Kriste yo a tsošitšwego bahung] e eme Thabeng ya Tsione [ya legodimong] e na le ba dikete tše lekgolo-masomenne-nne (144 000) bao ba ngwadilwego leina la yona le leina la Tatago yona diphatleng. . . . Ba ba rekilwe gare ga batho ba le bjalo ka dithakangwaga go Modimo le go Kwana.” Ge ba bapišwa le batho ba dibilione tše dintši bao ba kilego ba phela, batho ba 144 000 ba dira “mohlatswana” feela. Ka ge ba hlaloswa e le dikgoši, gona ba tlo buša bomang?

Jesu o boletše ka sehlopha sa bobedi sa bao ba botegago bao ba tlago go amogela mehola ya Mmušo wa legodimong. Ka ge go bonwe go Johane 10:16, Jesu o itše: “Le gona ke na le dinku tše dingwe tšeo e sego tša lešaka le; le tšona ke swanetše go di tliša gomme di tla theetša lentšu la ka, ya ba mohlape o tee wa modiši o tee.” “Dinku” tšeo di fagahletše go phela ka mo go sa felego mo lefaseng—e lego tebelelo yeo Adama le Efa ba bego ba na le yona mathomong. Re tseba  bjang gore tebelelo ya bona ya bokamoso ke ya mo lefaseng?

Mabakeng a mantši, Beibele e bolela ka maemo a Paradeise ao a tlago go ba gona mo lefaseng. Gore o iponele se, mo gongwe o ka rata go phetla Beibele ya gago gomme wa bala ditemana tše di latelago: Psalme 37:9-11; 46:8, 9; 72:7, 8, 16; Jesaya 35:5, 6; 65:21-23; Mateo 5:5; Johane 5:28, 29; Kutollo 21:4. Ditemana tšeo di bolela e sa le pele ka go fela ga ntwa, tlala, bolwetši le lehu. Di bolela ka nako yeo ka yona batho ba lokilego ba tlago go thabela go kgona go ikagela dintlo, go lema mašemo a bona le go godišetša bana ba bona maemong a khutšo. * Na ga o kgahlwe ke tebelelo e bjalo? Re na le lebaka le lebotse la go dumela gore dikholofetšo tšeo di tla phethagala kgauswinyane.

Ge e ba o ipha nako ya go nagana ka dilo ka moka tšeo Modimo a di diretšego wena le batho ka moka, go molaleng gore o šetše a dirile mo gontši kudu. O re file bophelo, bohlale, boemo bjo bobotse bja tša maphelo le dilo tšeo di nyakegago bakeng sa go thekga bophelo. Go feta moo, mpho ya Modimo ya topollo ka Jesu, yo a re hwetšego, e ka bolela ditšhegofatšo tše dikgolo kudu, ka ge re ithuta seo go Johane 3:16.

Bophelo bjo bo sa felego maemong a khutšo le a kgahlišago, batho ba se kotsing ya bolwetši, ntwa, tlala goba lehu, ruri bo tla bula tsela ya lethabo la ka mo go sa felego gotee le ditšhegofatšo. Taba ya gore o tla amogela ditšhegofatšo tšeo e ithekgile ka wena ka mo go feletšego. Potšišo yeo e šetšego ge e le gabotse ke e rego, O direla Modimo eng?