TABA YA LETLAKALA LA KA NTLE | NA MODIMO O NA LE TABA LE WENA?
Modimo a ka go Homotša
“Modimo yo a homotšago bao ba nyamilego, o re homoditše.”—2 BAKORINTHE 7:6.
‘Morwa wa Modimo o nthatile gomme a ikgafela nna.’—BAGALATIA 2:20
LEBAKA LEO BA BANGWE BA BELAELAGO SE: Le ge batho ba tloga ba nyaka khomotšo, ba bangwe ba nagana gore ke go ba le boithati go kgopela Modimo gore a tsene ditaba gare le go ba thuša go lebeletšana le mathata a bona. Mosadi yo a bitšwago Raquel o re: “Ge ke lebelela batho ba bantši lefaseng—le mathata a magolo ao ba lebeletšanago le ona, gona dilo tšeo di ntshwenyago di bonagala di se bohlokwa kudu moo ke dikadikago go kgopela Modimo gore a nthuše.”
SEO LENTŠU LA MODIMO LE SE RUTAGO: Modimo o šetše a ile a tsena ditaba gare ka tsela e makatšago ka go thuša le go homotša batho. Lehono motho yo mongwe le yo mongwe mo lefaseng o na le sebe sa leabela, e lego bolwetši bja go palelwa ke go latela melao ya Modimo ka mo go phethagetšego. Lega go le bjalo, Modimo “o re ratile gomme a romela Morwa wa gagwe [Jesu Kriste] e le sehlabelo sa poelanyo bakeng sa dibe tša rena.” (1 Johane 4:10) Ka lehu la Jesu la sehlabelo, Modimo o dira gore go kgonege go lebalelwa dibe, go ba le letswalo le hlwekilego le kholofelo ya bophelo bjo bo sa felego lefaseng le lefsa la khutšo. * Eupša na sehlabelo seo se diretšwe feela batho ka moka goba se bontšha gore Modimo o a go kgahlegela ka noši?
Nagana ka moapostola Paulo. O ile a šušumetšwa kudu ke sehlabelo sa Jesu moo a ngwadilego gore: “Bophelo bjoo bjale ke bo phelago nameng ke bo phela ka tumelo yeo e lego go Kriste Morwa wa Modimo, yena yo a nthatilego gomme a ikgafela nna.” (Bagalatia 2:20) Ke therešo gore Jesu o ile a ba a hwa pele Paulo a ka ba Mokriste. Lega go le bjalo, Paulo o ile a lebelela sehlabelo seo e le mpho yeo Modimo a mo fago yona.
Le wena Modimo o go neile mpho ya lehu la Jesu la sehlabelo. Mpho ye e bontšha kamoo o lego bohlokwa go Modimo. E ka go nea “khomotšo e sa felego le kholofelo e botse” gomme ya go “matlafatša tirong e nngwe le e nngwe e botse le lentšung le lengwe le le lengwe le lebotse.”—2 Bathesalonika 2:16, 17.
Lega go le bjalo, Jesu o gafile bophelo bja gagwe e le sehlabelo nywaga e ka bago e 2 000 e fetilego. Na se ga se bohlatse bja gore lehono Modimo o nyaka go ba le tswalano le wena?
^ par. 5 Bakeng sa tsebišo e oketšegilego ka sehlabelo sa Jesu, bona kgaolo 5 ya puku ya Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.
