Christopher, Hannah le Gina ga se bona ba nnoši bao ba ikwago ka tsela yeo. Batho ba bantši lefaseng ka moka ba kgodišegile gore Modimo o ba tšea e le bagwera ba gagwe. Go thwe’ng ka wena? Na o ikwa o le kgauswi le Modimo? Goba na o ka rata go ba kgauswi goba kgauswinyana le yena? Mohlomongwe o ipotšiša gore: ‘Na ruri go a kgonega gore motho feela a be le tswalano ya kgauswi le Modimo Ramatlaohle? Le gona ge e ba go kgonega, go dirwa bjang?’

Go ya ka Beibele, go a kgonega gore motho a be le tswalano ya kgauswi le Modimo. Beibele e re Modimo o be a bitša mopatriareka wa Moheberu e lego Aborahama a re “mogwera wa ka.” (Jesaya 41:8) Le gona, hlokomela taletšo e borutho yeo e lego go Jakobo 4:8 e rego: “Batamelang Modimo gomme o tla le batamela.” Ka gona, go molaleng gore go ba le tswalano ya kgauswi—go ba le segwera—le Modimo go a kgonega. Eupša ka ge Modimo a sa bonagale, o ka ‘batamela’ go yena bjang le go ba le tswalano e botse le yena?

Bakeng sa go araba potšišo yeo, ela hloko seo se diregago ge batho ba thoma go gwerana. Gantši go thoma ka gore batho ba babedi ba tsebane ka maina. Ke moka, ge ba dutše ba boledišana ka mehla, ba abelana dikgopolo le maikwelo, segwera sa bona se a gola. Le gona ge ba katanela go direlana dilo, tlemo ya segwera sa bona e a tia. Go ka bolelwa se se swanago mabapi le go ba le tswalano ya kgauswi le Modimo. A re bone gore go bjalo bjang.