MONNA o swanetše go dira bjang gore mosadi wa gagwe a ikwe a šireletšegile? Batho ba bantši ba godišitšwe ba na le kgopolo ya gore morero o mogolo wa monna ke go thuša lapa la gagwe gore le eme gabotse ditšheleteng. Lega go le bjalo, basadi ba bangwe ba nyetšwego bao ba nago le motlalo wa dilo tše di bonagalago le bona ba ikwa ba sa šireletšega maikwelong—e bile ba tšhogile. Ka mohlala, mosadi wa Mosepania yo a bitšwago Rosa ge a bolela ka monna yo a nyalanego le yena, o re: “E be e le monna yo a rategago ge a be a na le batho ba ka ntle, eupša ka gae e be e le monna yo a sego botho.” Joy yo a tšwago Nigeria o dumela ka gore: “Ge ke be ke sa dumelelane le monna wa ka, o be a re: ‘O swanetše go dira se sengwe le se sengwe seo ke go botšago sona ka gobane ke monna wa gago.’”

Monna a ka kgatha bjang tema ya gagwe ka lapeng ka tsela e lerato? Go nyakega gore monna a dire’ng go dira gore lapa la gagwe le be le tšhireletšego, le be le “boikhutšo” bakeng sa mosadi wa gagwe?—Ruthe 1:9.

Gaešita le ge monna le mosadi ba lekana pele ga Modimo, Beibele e re molekane yo mongwe le yo mongwe o na le tema e kgethegilego yeo a e kgathago ka lapeng. Baroma 7:2 e re mosadi yo a nyetšwego o ka tlase ga ‘molao wa monna wa gagwe.’ Go fo swana le ge mekgatlo e mentši e kgetha monna yo e bago hlogo gore a hlokomele seo se diregago ka go yona, Modimo o kgethile monna gore e be hlogo ya mosadi wa gagwe. (1 Bakorinthe 11:3) Banna ba swanetše go etelela pele malapeng a bona.

Lena banna, le swanetše go diriša bjang matla a lena a bolaodi ao le a filwego ke Modimo? Beibele e re: “Tšwelang pele le rata basadi ba lena go etša ge Kriste le yena a ratile phuthego.” (Baefeso 5:25) Ee, gaešita le ge Jesu Kriste a sa ka a nyala, mohlala wa gagwe o ka go thuša gore o be monna yo kaone. Anke re bone gore o ka go thuša bjang.

Jesu o be a tsoma go lapološa ba bangwe le go ba imolla. Jesu o ile a holofetša bohle bao ba bego ba gateletšwe e bile ba imetšwe ke mathata gore: “Tlang go nna, . . . ke tla le lapološa.” (Mateo 11:28, 29) Gantši o be a ba fokoletša tlaišego ya mmeleng le go ba nea thušo e lapološago ya moya. Ga go makatše ge ba bantši ba be ba ikwa ba gogelega go Jesu, ba kgodišegile gore o tla hwefola morwalo wa bona!

 Kamoo banna ba ka ekišago Jesu. Tsoma ditsela tša go hwefola morwalo wa mosadi wa gago. Basadi ba bangwe ba ikwa go swana le kamoo Rosa a bego a ikwa ka gona. O llile ka gore: “Ke be ke fo ba mohlanka wa monna wa ka.” Go fapana le seo, monna yo a bitšwago Kweku, yo a thabelago lenyalo la gagwe, o re: “Gantši ke botšiša mosadi wa ka kamoo nka mo fokoletšago ka gona. Ka ge ke mo rata, gantši ke ithaopela go mo thuša ka mešongwana ya ka gae.”

Jesu o be a naganela ba bangwe e bile a na le kwelobohloko. Mosadi yo mongwe yo a diilago o be a tšere nywaga e 12 a swerwe ke bolwetši bjo šoro. Ge a ekwa ka matla a Jesu a go dira mehlolo, “o be a duletše gore: ‘Ge nka kgwatha feela diaparo tša gagwe tša ka ntle ke tla fola.’” O be a nepile. O ile a ya go Jesu gomme a kgoma merumo ya seaparo sa gagwe, ke moka a fola le semeetseng. Gaešita le ge go ka direga gore ba bangwe bao ba bego ba bogetše ba ile ba phetha ka gore mosadi yo o tshetše mellwane, Jesu o ile a lemoga gore o be a tlaletšwe. * O ile a mmotša ka botho a re: “Morwedi wa-ka, . . . o fole bolwetšing  bja gago bjo bohloko.” Ga se feela gore Jesu o be a sa nyake go mo leša dihlong goba go mo omanya, eupša o ile a dumela gore o be a babja. Ka go dira bjalo, o ile a ipontšha gore e be e le monna wa mohuta mang—monna wa kwelobohloko.—Mareka 5:25-34.

Kamoo banna ba ka ekišago Jesu. Ge mosadi wa gago a sa ikwe gabotse, mo naganele kutšwanyana gomme o se mo felele pelo. Leka go bona dilo ka tsela ya gagwe gomme o kwešiše kamoo a itshwarago ka gona. Ka mohlala, Ricardo o hlalosa gore: “Ge ke lemoga gore mosadi wa ka o selekega feela, ke tloga ke dira boiteko bja gore ke se bolele dilo tšeo di ka mo selekago le go feta.”

Jesu o be a boledišana le barutiwa ba gagwe. Jesu o be a boledišana le bagwera ba gagwe ka mo go tseneletšego. O itše: “Dilo ka moka tšeo ke di kwelego go Tate ke le tsebišitše tšona.” (Johane 15:15) Ke therešo gore ka dinako tše dingwe Jesu o be a nyaka go ba noši gore a itheetše le go rapela. Eupša gantši o be a botša barutiwa ba gagwe maikwelo a gagwe a ka garegare. Bošegong bja pele ga ge a ka bolawa e le sesenyi seo se ahlotšwego, o ile a ba botša ka go lebanya gore o be a “kwele bohloko o šoro.” (Mateo 26:38) Gaešita le ge a be a nyamišwa ke ditiro tša bona, Jesu le ka mohla ga se a ka a kgaotša go bolela le bagwera ba gagwe.—Mateo 26:40, 41.

Kamoo banna ba ka ekišago Jesu. Botša mosadi wa gago seo o se naganago gotee le maikwelo a gago. Mosadi a ka lla ka gore go bonagala monna wa gagwe a phuthologa go bolela ge a le bathong eupša a homola ge a le ka gae. Ka lehlakoreng le lengwe, ela hloko kamoo Ana a arabelago ka gona ge monna wa gagwe a mmotša seo a se naganago gotee le maikwelo a gagwe. O re: “Ke a kwa gore o tloga a nthata, e bile ke ikwa ke le kgauswi le yena.”

O se ke wa otla mosadi wa gago ka go mo homolela. Mosadi yo mongwe o re: “Monna wa ka o be a tšea matšatši a sa mpolediše ge a be a mpefeletše. O be a ntira gore ke ikwe ke le molato e bile ke nyatšega.” Lega go le bjalo, Edwin o leka go ekiša mohlala wa Jesu. O re: “Ge ke tenega, ga ke arabele di sa tloga fase, eupša ke tsoma nako ya maleba ya gore re rarolle bothata.”

Joy, yo a tsopotšwego mathomong, o bone monna wa gagwe a dira diphetogo ga e sa le a thoma go ithuta Beibele le Dihlatse tša Jehofa. Joy o anega ka gore: “O kaonefaditše e bile o leka ka thata go ekiša Jesu ka go ba monna yo lerato kutšwanyana.” Banyalani ba dimilione ba holwa ke thuto ye ya Beibele. Na o ka rata gore le wena e go hole? O ka kgopela yo mongwe wa Dihlatse tša Jehofa gore a go swarele thuto ya mahala ya Beibele.