Lehu la Jesu e bile tiragalo e bohlokwa kudu historing—o ile a hwa gore a bušetše bophelo bja batho boemong bja bjona. Motho o be a sa bopša a na le tshekamelo ya go dira dilo tše mpe, gore a babje goba a hwe. (Genesi 1:31) Eupša sebe se tsene lefaseng ka motho wa mathomo e lego Adama. Jesu o ile a gafa bophelo bja gagwe gore a re phološe sebeng le lehung.—Bala Mateo 20:28; Baroma 6:23.

Modimo o bontšhitše lerato le legolo kudu ka go romela Morwa wa gagwe lefaseng gore a tlo re hwela. (1 Johane 4:9, 10) Jesu o ile a botša balatedi ba gagwe gore ba gopole lehu la gagwe ka monyanya o bonolo wa senkgwa le beine. Go dira bjalo ngwaga le ngwaga ke tsela ya rena ya go leboga lerato leo le bontšhitšwego ke Modimo le Jesu.—Bala Luka 22:19, 20.

Ge Jesu a be a thoma go botša barutiwa ba gagwe gore ba gopole lehu la gagwe, o ile a bolela ka kgwerano, goba tumelelano. (Mateo 26:26-28) E ile ya nea bona gotee le palo e lekanyeditšwego ya ba bangwe tebelelo ya go ba dikgoši le baperisita le yena legodimong. Gaešita le ge batho ba dimilione ba gopola lehu la Jesu, ke feela bao ba lego kgweranong yeo bao ba jago senkgwa le go nwa beine.—Bala Kutollo 5:10.

Lebakeng la mo e nyakilego go ba nywaga e 2 000, Jehofa o be a dutše a kgetha bao e tlago go ba dikgoši. (Luka 12:32) Palo ya bona ke e nyenyane ge e bapišwa le ya bao ba tlago go phela lefaseng ka mo go sa felego.—Bala Kutollo 7:4, 9, 17.