Ka tlwaelo batho ba nyaka go ba badirakhutšo, go botega le go ba ba botho. Ka gona, ke ka baka la’ng gantši re bona bošoro, go hloka toka le sehlogo? Dipego tša ditaba tše tšhošago di atile. Na go na le motho yo a lekago go diriša batho bobe?—Bala 1 Johane 5:19.

Na Modimo o bopile batho ba na le tshekamelo ya go dira bobe? Aowa, Jehofa Modimo o bopile batho ka seswantšho sa gagwe, ba na le tshekamelo ya go ekiša lerato la Modimo. (Genesi 1:27; Jobo 34:10) Eupša Modimo gape o neile batho seriti ka go ba fa tokologo ya boikgethelo. Ge batswadi ba rena ba mathomo ba be ba kgetha go dira bobe, ba ile ba gana mohlala wa Modimo gomme ya ba bao ba sa phethagalago. Re abetše tshekamelo ya bona ya go dira sebe.—Bala Doiteronomio 32:4, 5.

Modimo o nyaka re lwantšha ditshekamelo tša rena tše mpe. (Diema 27:11) Ka gona o re ruta kamoo re ka phemago go dira dilo tše di fošagetšego le kamoo re ka hwetšago lethabo la kgonthe. Lega go le bjalo, gona bjale ga re kgone go ekiša lerato la Modimo ka tsela e phethagetšego.—Bala Psalme 32:8.

Le ge ga bjale bobe bo atile, Modimo o bo dumeletše ka nakwana e le gore bohle ba bone ditlamorago tša bjona tše di nyamišago. (2 Petro 3:7-9) Lega go le bjalo, kgauswinyane lefase le tla tlala ka batho ba thabilego bao ba kwago Modimo.—Bala Psalme 37:9-11.