Re mokgatlo wa ditšhabatšhaba wo e sego karolo ya dihlopha tše dingwe tša bodumedi. Gaešita le ge ntlokgolo ya rena ya lefase ka bophara e le United States, fela Dihlatse tša Jehofa tše dintši kudu di dula le dinageng tše dingwe. Ge e le gabotse, Dihlatse tše e ka bago tše dimilione tše seswai di ruta batho ka Beibele dinageng tše di fetago tše 230. Re dira se ka go arabela mantšung a Jesu a rego: “Ditaba tše tše dibotse tša Mmušo di tla bolelwa lefaseng ka moka gore e be bohlatse go ditšhaba tšohle, ke moka bofelo bo tla tla.”—Mateo 24:14.

Go sa šetšwe moo re dulago gona, re hlompha molao. Lega go le bjalo, re katanela go se tšee lehlakore ditabeng tša dipolitiki. Re dira se ka gobane re ekwa taelo ya Jesu yeo go yona a laelago Bakriste gore e ‘se be karolo ya lefase.’ Ka go re’alo ga re tšee lehlakore ditabeng le medirong ya dipolitiki goba go thekga ntwa. (Johane 15:19; 17:16) Ge e le gabotse, Ntweng ya Bobedi ya Lefase, Dihlatse tša Jehofa di ile tša golegwa, tša tlaišwa, le gona di be di tlaišwa le go feta ka ge di be di sa nyake go tšea karolo medirong ya dipolitiki. Yo e kilego ya ba mopišopo wa Mojeremane o ngwadile gore: “Ba ka bolela ka mo go swanetšego gore ke bona feela sehlopha se segolo sa bao ba gannego go tsenela bošole ka baka la letswalo Pušong ya Boraro [ya Jeremane ka tlase ga Hitler].”

Lega go le bjalo, ga re ipee lekatana. Jesu o ile a rapelela balatedi ba gagwe go Modimo, a re: “Ga ke go kgopele gore o ba tloše lefaseng.” (Johane 17:15) Ka baka leo, o ka re bona re le mošomong, re le mabenkeleng e bile re eya sekolong moo re dulago gona.