Ke kgale Keresemose e hlaloswa e le monyanya wa setšo sa Bokriste wa go keteka matswalo a Jesu. Lega go le bjalo, meetlo e mentši yeo e dirwago monyanyeng wo e dira gore re ipotšiše kamoo go tlilego ka gona gore e tswalanywe le matswalo a Jesu.

O mongwe wa meetlo yeo ke nonwane ya Santa Claus. Santa wa mehleng yeno yo a phelago a thabile, wa ditedu tše ditšhweu, wa marama a go phadima le yo a aperego sutu e khwibidu, o tsebja a kile a ba papatšo e atlegilego ya Keresemose yeo e hlametšwego khamphani ya go rekiša dino ya ka Leboa la Amerika ka 1931. Ka bo-1950, Mabrazil a mangwe a ile a leka go tšeela Santa Claus legato ka seswantšho se se tumilego sa setlogo sa nageng ya ona, e lego sa Rakgolo wa Moindia. Mafelelo e bile afe? Moprofesara Carlos E. Fantinati o re Santa Claus ga se a phala Rakgolo wa Moindia feela, eupša “o ile a phala le lesea Jesu gomme a fetoga moemedi wa semmušo wa monyanya wa December 25.” Eupša na dinonwane tše bjalo ka Santa Claus ke bothata bo nnoši ka Keresemose? E le gore re hwetše karabo, a re boeleng morago Bokristeng bja lekgolong la pele la nywaga.

Encyclopedia Britannica e re: “Mehleng ya Bokriste bja lekgolong la pele le la bobedi la nywaga, go ketekwa ga matšatši a matswalo a bahwelatumelo goba letšatši la Jesu la matswalo go be go ganetšwa kudu. Ka baka la’ng? Bakriste ba be ba lebelela go keteka matšatši a matswalo e le moetlo wa boheitene, selo seo se swanetšego go phengwa ka mo go feletšego. Ge e le gabotse, Beibele ga e bolele ka letšatši leo Jesu a belegwego ka lona.

Lekgolong la bone la nywaga C.E., Kereke ya Katholika e ile ya thoma go keteka Keresemose go sa šetšwe go ema ga Bakriste ba lekgolong la pele la nywaga ba tiile kgahlanong le go keteka matšatši a matswalo. Kereke e be e nyaka go matlafatša boemo bja yona ka go tloša le lengwe la mapheko a magolo ao a ka e šitišago, e lego go tuma ga bodumedi bja boheitene bja Roma le menyanya ya gona ya letšatši la mafelelo la marega. Puku ya Christmas in America yeo e ngwadilwego ke Penne L. Restad e bolela gore ngwaga o mongwe le o mongwe, go thoma ka December 17 go fihla ka January 1, “Baroma ba bantši ba be ba eja, ba bapala, ba keteka gaešita le go kopanela menyanyeng e mengwe e le go hlompha medingwana ya bona.” Ka December 25, Baroma ba be ba keteka go tswalwa ga Letšatši leo le sa Fenywego. Ge kereke e be e thoma go keteka Keresemose ka letšatši leo, e ile ya foraforetša Baroma ba bantši ka gore ba keteka matswalo a Jesu go e na le go keteka matswalo a letšatši. Puku ya Santa Claus, a Biography yeo e ngwadilwego ke Gerry Bowler e bolela gore Baroma “ba be ba sa dutše ba thabela didirišwa tša go kgabiša tša menyanya yeo ya bogareng bja marega.” Ge e le gabotse, ba “be ba tšwela pele ba diriša mekgwa ya kgale matšatšing a mafsa.”

Ka gona, go molaleng gore bothata bjo bogolo bja go keteka Keresemose ke setlogo sa yona seo se sa kgahlišego. Ka pukung ya gagwe ya The Battle for Christmas, Stephen Nissenbaum o bolela ka Keresemose gore “e fo ba monyanya wa boheitene wo o apešitšwego ponagalo ya Bokriste.” Ka go re’alo, Keresemose e hlompholla Modimo le Morwa wa gagwe Jesu Kriste. Na ye e fo ba taba ya go se re selo? Beibele e botšiša ka gore: “Toko le go hloka molao di na le segwera sefe? Goba seetša se abelana eng le leswiswi?” (2 Bakorinthe 6:14) Go fo swana le kutu ya mohlare yeo e kgopamego, taba ya Keresemose e kgopame kudu mo e lego gore e “ka se otlollwe.”—Mmoledi 1:15.