Mohlala—Jakobo

Jakobo le ngwanabo e lego Esau ba tšere nywaga e mentši ba sa boledišane. Ge e le gabotse, Esau o hloile Jakobo. Gaešita le ge Jakobo a se a dira selo se se fošagetšego, ke yena a tšeago kgato ya pele ya go rarolla bothata magareng ga bona. O dira khutšo. Boikemišetšo bja gagwe ga se go fenya ngangišano eupša ke gore ngwanabo a boele a mo rate. Jakobo ga a hlokomologe melao ya gagwe ya motheo, le gona ga a gapeletše ngwanabo gore a kgopele tshwarelo pele a dira khutšo le yena.—Genesi 25:27-34; 27:30-41; 32:3-22; 33:1-9.

Wena o rarolla bjang dingangišano tšeo o bago le tšona le ditho tša lapa leno? Ka dinako tše dingwe o ka ikwa gore o tloga o nepile gomme ngwaneno goba motswadi wa gago o fošitše e le ruri. Maemong a bjalo na o letela gore motho yo mongwe a tšee kgato ya pele? Goba na o ka swana le Jakobo? Ge e ba go sa robje melao ya motheo ya Beibele, na o tla ikemišetša go kgopela tshwarelo e le gore go ka ba le khutšo? (1 Petro 3:8, 9) Jakobo ga se a dumelela boikgantšho bo aroganya lapa la gabo. O ile a ikokobetša gomme a lokiša tswalano ya gagwe le ngwanabo. Na o tla dira se se swanago ka ditho tša lapa leno?