Kgaolo 37

Ke ka Baka La’ng Batswadi ba ka ba sa Nyake ke Ithabiša?

Mofsa yo a lego mahlalagading yo a bitšwago Allison wa Australia, o hwetša meso e mengwe le e mengwe ya Mošupologo sekolong e mo gateletša kudu.

O re: “Yo mongwe le yo mongwe o bolela ka seo a se dirilego mafelobekeng. Ba anega ditaba tšeo di kwagalago di kgahliša, tše di swanago le gore ke meletlo e mekae yeo ba tšwago go yona le gore ke bašemane ba bakae bao ba ba atlilego—gaešita le go tšhabela maphodisa . . . Ditaba tšeo di kwagala di tloga di boifiša eupša di le bose! Ba boa gae ka iri ya bohlano mesong gomme batswadi ba bona ga ba re selo. Nna ke swanetše go ba ke šetše ke robetše le pele ba intšha!

“Le gona, ge bao ke tsenago le bona ka klaseng ba feditše go nkanegela seo ba se dirilego mafelobekeng, ba mpotšiša gore nna ke dirile eng. . . . Ke tšwa dibokeng tša Bokriste. Ke tšwa tšhemong. Ke ikwa eka ke fetilwe ke nako e bose. Ka gona, gantši ke fo ba botša gore ga se ka dira selo. Ke moka ba mpotšiša gore ke ka baka la eng ke se ka intšha le bona.

“Ge Mošupologo o fetile, o ka nagana gore go tla ba kaone. Eupša ga go bjalo. Ka Labobedi, yo mongwe le yo mongwe o bolela ka mafelobeke ao a tlago! Gantši ke fo dula gomme ka ba theetša ge ba bolela. Ke ikwa ke lahlegile kudu!”

 NA LE wena o lebeletšana le se se swanago mesong ya Mošupologo sekolong? O ka ikwa eka go na le lefase la boithabišo ka ntle ga mojako wa gago eupša batswadi ba gago ba o notletše—goba o ikwa eka o phakeng yeo e nago le dilo tša go ithabiša eupša o ganetšwa go bapadiša selo le ge e le sefe sa dibapadišwa moo. Ga se gore o nyaka go dira selo se sengwe le se sengwe seo dithaka tša gago di se dirago. O fo ba o nyaka go fela o ithabiša! Ka mohlala, ke boitapološo bofe bjoo ruri o bego o tla nyaka go itapološa ka bjona mafelobekeng ao a tlago?

□ go bina

□ go ya moletlong

□ go ya khonsateng ya mmino

□ go bogela filimi

□ bjo bongwe ․․․․․

O swanetše go itapološa. Ge e le gabotse, Mmopi wa gago o nyaka gore o thabele bofsa bja gago. (Mmoledi 3:1, 4) Batswadi ba gago le bona ba nyaka gore o ithabiše, gaešita le ge ka dinako tše dingwe o ka fo se dumele seo. Lega go le bjalo, go ka direga gore batswadi ba gago ba na le mabaka a mabedi a kwagalago ao a ba dirago gore ba tshwenyege ka wena: (1) seo o tlago go se dira, le (2) batho bao o tlago go se dira le bona.

Ka gona, go thwe’ng ge e ba o laleditšwe go intšha le bagwera ba gago eupša o sa kgonthišege gore batswadi ba gago ba tla arabela bjang? Ela hloko dikgetho tše tharo le ditlamorago tša tšona.

KGETHO A O SE KE WA KGOPELA—E FO YA

Lebaka leo o ka nyakago go tšea kgetho ye: O nyaka go bontšha bagwera ba gago gore o na le tokologo. O nagana gore o tseba gakaone go feta batswadi ba gago goba gore ga o hlomphe kahlolo ya bona.—Diema 14:18.

Ditlamorago: Bagwera ba gago ba ka kgahlwa ke seo eupša gape ba tla ithuta se sengwe ka wena—gore o moradia. Ge e ba o ka radia batswadi ba gago, o ka fo se be le bothata bja  go radia bagwera ba gago. Ge batswadi ba gago ba ka tseba seo, ba tla kwa bohloko le go ikwa ba radiilwe gomme ga go na pelaelo gore ba tla go okeletša dithibelo! Lega go le bjalo, go se kwe batswadi ba gago gomme wa fo ya ke kgetho ya bošilo.—Diema 12:15.

KGETHO B O SE KE WA KGOPELA—O SE KE WA YA

Lebaka leo o ka nyakago go tšea kgetho ye: O nagana ka taba ye gomme o phetha ka gore seo se tlago go dirwa moo ga se dumelelane le ditekanyetšo tša gago goba gore ba bangwe ba batho bao ba laleditšwego go ka se be botse go sepela le bona. (1 Bakorinthe 15:33; Bafilipi 4:8) Ka lehlakoreng le lengwe, o ka ba o nyaka go ya eupša o boifa go kgopela batswadi ba gago.

Ditlamorago: Ge e ba o sa ye ka gobane o tseba gore go fošagetše go dira seo, o tla ikwa o kgodišegile kudu ge o araba bagwera ba gago. Eupša ge e ba o sa ye e le feela gore o boifa go kgopela batswadi ba gago, o ka feleletša o dutše gae o tshwenyegile o ikwa eka ke wena o nnoši o sa ithabišego.

KGETHO C KGOPELA—KE MOKA O BONE

Lebaka leo o ka nyakago go tšea kgetho ye: O lemoga gore batswadi ba gago ba a go laola e bile o hlompha kahlolo ya bona. (Bakolose 3:20) O rata batswadi ba gago gomme ga o nyake go ba kweša bohloko ka go ba radia. (Diema 10:1) Le gona o na le sebaka sa go tšweletša taba ya gago.

Ditlamorago: Batswadi ba gago ba a tseba gore o a ba rata le go ba hlompha. Le gona ge e ba  ba nagana gore kgopelo ya gago e a kwagala, ba ka go dumelela gore o sepele.

Lebaka Leo Batswadi ba ka Ganago

Go thwe’ng ge e ba batswadi ba gago ba gana? Seo se ka go ferekanya. Lega go le bjalo, go kwešiša pono ya bona go ka go thuša gore o lebeletšane le dithibelo. Ka mohlala, ba ka go ganetša ka lebaka letee goba a mangwe a ao a latelago.

Ba na le tsebo e kgolwanyane le phihlelo. Ga go pelaelo gore ge nkabe o na le kgetho, o be o tla kgetha go rutha lebopong leo le nago le bahlapetši. Ka baka la’ng? Ka gobane ge o dutše o ipshina ka go rutha, ga se gantši o ka kgonago go lemoga dikotsi. Eupša bahlapetši ba boemong bjo bobotse bja go kgona go bona dikotsi.

Ka mo go swanago, ka baka la tsebo ya bona e kgolwanyane le phihlelo, batswadi ba gago ba ka lemoga dikotsi tšeo wena o sa di bonego. Go swana le bahlapetši ba lebopong, morero wa batswadi ba gago ga se go go tima nako ya go ithabiša eupša ke go go thuša go phema dikotsi tšeo di ka go amogago lethabo bophelong.

Ba a go rata. Batswadi ba gago ba na le kganyogo e matla ya go go šireletša. Lerato le ba šušumeletša go go dumelela go dira dilo ge ba ka kgona le go go ganetša ge ba swanetše go dira bjalo. Ge o ba kgopela go dira selo se itšego, ba ipotšiša ge e ba ba ka go dumelela ke moka ba tle ba phele le ditlamorago tša seo. Ba tla dumelelana, le go go dumelela ge feela ba kgodišegile gore o ka se welwe ke kotsi.

 Kamoo o ka Kaonefatšago Dibaka tša Gore ba go Dumelele

Go akaretšwa dintlha tše nne.

Go botega: Sa pele o swanetše go ipotšiša ka potego gore: ‘Ge e le gabotse ke ka baka la’ng ke nyaka go ya? Na lebaka le legolo ke gore ke selo seo ke se thabelago goba ke gore ke nyaka go amogelwa ke dithaka tša ka? Na ke ka baka la gore motho yo mongwe yo a nkgahlago o tla be a le gona?’ Ka gona botša batswadi ba gago therešo. Le bona e kile ya ba bafsa gomme ba go tseba gakaone. Ka gona, ba tla lemoga seo se go tutuetšago e le ka kgonthe. Ba tla tšeela godimo go bolela ga gago therešo gomme o tla holwa ke bohlale bja bona. (Diema 7:1, 2) Ka lehlakoreng le lengwe, ge e ba o sa botege, o fokodiša kgonagalo ya gore ba go bote le go fokotša dibaka tša gore ba go dumelele go sepela.

 Nako ya go bolela: O se ke wa gahlanetša batswadi ba gago ka dikgopelo ge ba sa tšwa go boa mošomong goba wa ba botša tšona ge ba swaregile ka dilo tše dingwe. Eya go bona ge ba iketlile. Eupša o se ke wa leta go fihlela motsotsong wa mafelelo gomme wa leka go ba gapeletša gore ba go arabe. Batswadi ba gago ba ka se thabele go dira phetho ka lepotlapotla. Ba kgopele e sa le pele e le gore o ba nee nako ya go nagana gomme ba tla leboga gore o a ba naganela.

Go bolela ditaba ka botlalo: O se ke wa ba fihlela selo. Hlalosa seo o tlogago o nyaka go se dira. Batswadi ga ba kgotsofatšwe ke karabo ya gore, “ga ke tsebe” kudukudu ge ba go botšišitše gore: “Ke bomang bao ba tlago go ba ba le gona?” “Na motho yo mogolo yo a ikarabelago o tla ba a le gona?” goba gore “Na moletlo o tla fela neng?”

Boemo bja kgopolo: O se ke wa lebelela batswadi ba gago e le manaba. Ba lebelele e le badirišani ba gago—ka gobane ka morago ga go hlahloba dilo ka moka, ruri ke bona. Ge e ba o lebelela batswadi ba gago e le bagwera, o ka se kwagale o elwa le bona gomme le bona ba tla dirišana le wena. Phema mantšu a swanago le gore: “Ga le mpote,” “Batho ka moka ba a ya,” goba “Batswadi ba bagwera ba ka ba ba dumeletše go ya!” Bontšha batswadi ba gago gore o godile tsebong ka mo go lekanego gore o ka amogela phetho ya bona le go e hlompha. Ge o dira bjalo, ba tla go hlompha. Le gona, nakong e tlago ba ka sekamela kudu go nyakeng ditsela tša go go dumelela go dira dilo.

BALA KA MO GO OKETŠEGILEGO MABAPI LE TABA YE GO BOLUMO 2, KGAOLO 32

LENGWALO LA BOHLOKWA

“Morwa wa ka, hlalefa gomme o thabiše pelo ya ka.”—Diema 27:11.

KELETŠO

Ge o eya moletlong, eya o logile leano la go tloga ge dilo di thoma go tšwa tseleng. Pele o eya, tseba seo o tlago go se dira goba go se bolela e le gore ge e ba go hlokagala o tloge ka letswalo le le hlwekilego.

O NAGANA ENG? . . . ?

Batswadi ba lerato ba tla go šireletša kudu e le go go efoša dikotsi. Ge e ba ba sa kwešiše seo o se kgopelago goba ba nagana gore kgopelo ya gago ga e na ntlha le thito, go na le kgonagalo ya gore ba se go dumelele.

KGATO YEO KE TLAGO GO E TŠEA!

Ge e ba letswalo la ka le tshwenywa ke seo ke se bonago goba ke se kwago ge ke bogetše filimi goba ke le moletlong, ke tla ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Ke ka baka la’ng o ka dikadika go nea batswadi ba gago tsebišo ka moka yeo ba e nyakago e le gore ba tle ba dire phetho?

● Go ka ba le ditlamorago dife ge batswadi ba gago ba ka go dumelela go dira dilo ka ge o se wa ba botša ditaba ka botlalo?

[Ntlhakgolo go letlakala 268]

“Ke be ke le lešilo ge ke be ke sa le yo monyenyane. Tše dingwe tša dilo tšeo ke bego ke nagana gore di a kgahliša tšeo ke bego ke di dira di ile tša se sa kgahliša ge nako e dutše e eya. O tla buna seo o se bjetšego. Ke a itshola gore ga se ka ka ka theetša batswadi ba ka.”—Brian

[Seswantšho go letlakala 269]

Go swana le bahlapetši ba lebopong, batswadi ba gago ba boemong bjo bobotse bja go bona kotsi