Kgaolo 16

Na ke kwa Bohloko ka Mokgwa wa Tlhago?

Le ge kgaolo ye e bolela ka go hwelwa ke motswadi, melao ya motheo yeo e ahlaahlwago mo e šoma le ge setho le ge e le sefe sa lapa goba mogwera wa kgauswi a hwile.

“Ge mma a be a ehwa, ke ile ka ikwa ke lahlegile ka mo go feletšego e bile ke se na morero. Ke yena yo a bego a dira gore lapa lešo le dule le momagane.”—Karyn.

KE DILO tše sego kae feela bophelong tšeo di ka go kwešago bohloko kudu go feta lehu la motswadi. Ka morago ga moo, o ka swanelwa ke go lwantšhana le maikwelo a fapafapanego ao o sa kago wa ba le ona. Brian yo a bego a na le nywaga e 13 ge tatagwe a be a bolawa ke bolwetši bja pelo o re: “Bošegong bjo re kwelego ka bjona gore tate o hwile, seo re bego re ka kgona go se dira e be e le go lla le go gokarelana feela.” Natalie yo a bego a na le nywaga e lesome ge tatagwe a be a bolawa ke kankere o gopola ka gore: “Ke be ke sa  tsebe gore ke ikwe bjang. Ka gona ga se ka kwa selo. Ke be ke se na maikwelo.”

Lehu le kgoma motho yo mongwe le yo mongwe ka tsela e fapanego. Beibele e re “yo mongwe le yo mongwe” o na le “mohlako wa gagwe le bohloko bja gagwe.” (2 Dikoronika 6:29) Ge o sa dutše o naganne ka seo, tšea motsotso o nagana kamoo lehu la motswadi wa gago le go kgomilego ka gona. Ka mo tlase, hlalosa (1) kamoo o ilego wa ikwa ka gona ge o be o thoma go kwa ka lehu la motswadi wa gago le (2) kamoo o ikwago ka gona ga bjale. *

1 ․․․․․

2 ․․․․․

Mohlomongwe dikarabo tša gago di utolla gore maikwelo a gago a boela sekeng, bonyenyane ka tekanyo e itšego. Se se tlwaelegile. Ga se bolele gore o lebetše motswadi wa gago. Ka lehlakoreng le lengwe, o ka hwetša gore maikwelo a gago ga se a fetoga goba gore o kwa bohloko le go feta. Mohlomongwe  bohloko bja gago bo tšwelela bjalo ka maphoto ao a bonagalago a fokotšega le go elela ke moka a betha lebopo ka dinako tšeo o sa di letelago. Se le sona se tlwaelegile—gaešita le ge se direga nywaga e mentši ka morago ga lehu la motswadi wa gago. Potšišo ke gore: O ka lebeletšana bjang le go kwa bohloko ga gago—go sa šetšwe gore go tla ka tsela efe?

O se ke wa tšhaba go lla! Go lla go thuša go okobatša bohloko bja go hwelwa. Lega go le bjalo, o ka ikwa ka tsela yeo Alicia a ilego a ikwa ka yona. O be a na le nywaga e 19 ge mmagwe a be a ehwa. Alicia o anega ka gore: “Ke be ke nagana gore ge ke be nka lla kudu, ba bangwe ba be ba tla nagana gore ke hloka tumelo.” Eupša nagana ka se: Jesu Kriste e be e le motho yo a phethagetšego yo a bego a na le tumelo e tiilego go Modimo. Lega go le bjalo, o ile “a ntšha megokgo” ka baka la lehu la mogwera wa gagwe yo a rategago Latsaro. (Johane 11:35) Ka gona, o se ke wa tšhaba go ntšha megokgo. Seo ga se bolele gore o hloka tumelo! Alicia o re: “Mafelelong, ke ile ka lla. Ka lla kudu letšatši le lengwe le le lengwe.” *

Bolela ka maikwelo a go ikwa o le molato. Karyn yo a bego a na le  nywaga e 13 ge mmagwe a be a ehwa, o re: “Ke be ke tlwaetše go ya phapošing ya lebatong la ka godimo gomme ke atla mma ke re a robale gabotse. Go ile gwa ba le nako e nngwe yeo ke sa kago ka dira bjalo. Mesong e latelago, mma o ile a hwa. Go sa šetšwe gore taba ye e bonagala e sa kwagale, ke ikwa ke le molato ka baka la ge ke se ka ka ka mmona bošegong bjoo bja mafelelo—le ka baka la dilo tšeo di diregilego mesong e latetšego. Tate o be a tšere leeto la tša kgwebo gomme a nyaka gore nna le mogolwake re šale re hlokometše mma. Eupša re ile ra robala bošego kudu. Ge ke eya ka phapošing ya go robala, mma o be a sa buše moya. Ke ile ka nyama kudu ka gobane o be a phetše gabotse ge tate a be a tloga!”

Go swana le Karyn, mohlomongwe o ikwa o le molato ka tekanyo e itšego ka baka la dilo tšeo o ilego wa hlokomologa go di dira. O ka ba wa itlhokofatša ka go bolela gore “nkabe.” ‘Nkabe ke ile ka kgothaletša tate go yo bona ngaka.’ ‘Nkabe ke ile ka hlola mma pejana.’ Ge e ba o tshwenywa ke dikgopolo tše bjalo, gopola se: Ke ga tlhago go ikwa o itshola ka baka la dilo tšeo o dumago eka nkabe o ile wa di dira ka tsela e fapanego. Therešo ke gore o be o tla dira dilo ka tsela e fapanego ge nkabe o be o tsebile seo se bego se tla direga. Eupša o be o sa tsebe. Ka baka leo, ga se wa swanela go ikwa o le molato. Ga o ikarabele ka lehu la motswadi wa gago! *

Bolela ka maikwelo a gago. Diema 12:25 e re: “Mantšu a mabotse a tla go thabiša.” (Today’s English Version) Go se bolele ka  maikwelo a gago go ka dira gore o thatafalelwe ke go lebeletšana le bohloko bja go hwelwa. Ka lehlakoreng le lengwe, go boledišana le motho yo mongwe yo o mmotago ka maikwelo a gago go tla go bulela sebaka sa go hwetša “mantšu a mabotse” a kgothatšo ge o ikwa o nyamile.

Bolela le Modimo. Go na le kgonagalo ya gore o tla ikwa o le kaone kudu ge o fetša go ‘tšhollela pelo ya gago’ go Jehofa Modimo ka thapelo. (Psalme 62:8) Ye ga se tsela ya go fo go dira gore o ikwe bokaone. Ka thapelo, o lopa “Modimo wa khomotšo yohle, yo a re homotšago ditlaišegong tša rena tšohle.” (2 Bakorinthe 1:3, 4) Tsela e nngwe yeo Modimo a re homotšago ka yona ke ka Lentšu la gagwe, Beibele. (Baroma 15:4) Ke ka baka la’ng o sa dule o na le lelokelelo la mangwalo ao a go kgothatšago e le ka kgonthe? *

Bohloko bja go hwelwa ga bo fele ka bošego bjo tee. Eupša Beibele e ka re kgothatša, ka gobane e re kgonthišetša gore lefaseng le lefsa leo Modimo a holofetšago gore o tla le tliša, “lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona.” (Kutollo 21:3, 4) Le wena o ka hwetša gore go naganišiša ka dikholofetšo tše bjalo go tla go thuša go lebeletšana le go hwelwa ke motswadi.

[Mengwalo ya tlase]

LENGWALO LA BOHLOKWA

“[Modimo] o tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.”—Kutollo 21:4.

KELETŠO

Eba le pego. Go ngwala dilo tšeo o di naganago ka motswadi wa gago yo a hwilego go ka go thuša kudu go lebeletšana le bohloko bja go hwelwa.

NA O BE O TSEBA . . . ?

Go lla ga se leswao la gore motho o a fokola. Gaešita le banna ba matla ba bjalo ka Aborahama, Josefa, Dafida le Jesu ba ile ba lla ge ba be ba hwetšwe.—Genesi 23:2; 50:1; 2 Samuele 1:11, 12; 18:33; Johane 11:35.

KGATO YEO KE TLAGO GO E TŠEA!

Ge ke ikwa ke gateletšwe ke bohloko bja go hwelwa, ke tla ․․․․․

Seo ke tlago go se botšiša motswadi wa ka yo a phelago ka taba ye ke gore ․․․․․

O NAGANA ENG?

● Ke ka baka la’ng e le mo gobotse go nagana ka dilo tše di kgahlišago tšeo o di gopolago ka motswadi wa gago yo a hwilego?

● Ke ka baka la’ng go ngwala seo o se naganago ka yena go ka go thušago go lebeletšana ka katlego le bohloko bja go hwelwa?

[Ntlhakgolo go letlakala 112]

“Ga se ka ka ka bolela ka maikwelo a ka. Go ka be go nthušitše gore ke phele gabotse maikwelong le mmeleng ge nkabe ke ile ka bolela kutšwanyana ka ona. Nkabe ke ile ka lebeletšana le bohloko bja ka gakaone.”—David

 [Box/​Picture on page 113]

CHANTELLE

“Tate o ile a babja ka nywaga e ka bago e mehlano, gomme boemo bja gagwe bja tša maphelo bo be bo mpefala. Ke be ke na le nywaga e 16 ge a be a ipolaya. Ka morago ga moo, mma o ile a tsebiša nna le mogolwake ka seo se bego se direga. Le gona o ile a re dumelela gore re thuše go dira diphetho ka ditaba tša mabapi le poloko. Seo se ile sa re nolofaletša dilo. Ke nagana gore bana ga ba nyake go ikwa eka ba utelwa dilo—kudukudu dilo tše dikgolo go swana le tše. Ge nako e dutše e eya, ke be ke kgona go bolela ka lehu la tate ka bolokologi. Neng goba neng ge ke be ke ekwa gore ke nyaka go lla, ke be ke tla ya felotsoko goba go mogwera gomme ke lle. Keletšo ya ka ke gore: Ge e ba o nyaka go bolela ka taba yeo, batamela lapa leno le bagwera. Selo le ge e le sefe seo o nyakago go se dira e le go ntšha bohloko bja go hwelwa, se dire.”

[Box/​Picture on pages 113, 114]

LEAH

“Mma o ile a hwa lehlakore o šoro ge ke be ke na le nywaga e 19 gomme o ile a hwa nywaga e meraro ka morago. Ka morago ga lehu la gagwe, ke ile ka nagana gore ke swanetše go tia matla. Tate o be a tla thatafalelwa ke go mpona ke sa tie matla. Ge ke be ke gola, ka mehla mma o be a nthuša ge ke babja goba ke sa ikwe gabotse. Ke gopola kamoo diatla tša  gagwe di bego di le ka gona ge a be ntlhahloba gore ga ke na mpshikela. Gantši ke kwa bohloko ge ke nagana gore ga a sa le gona. Ke leka go uta maikwelo a ka, gomme seo se nkweša bohloko. Ka gona ka dinako tše dingwe ke bogela dinepe tša gagwe go fo dira gore ke lle. Go bolela le bagwera le gona go a nthuša. Beibele e holofetša gore bao ba hwilego ba tla tsošetšwa lefaseng la paradeise. (Johane 5:28, 29) Ge ke nagana ka kholofelo ya go tlo bona mma gape—e bile ke nagana ka seo ke swanetšego go se dira gore le nna ke tle ke be moo—bohloko bja go hwelwa bo a okobala.”

[Box/​Picture on page 114]

BETHANY

“Ke duma eka nka gopola ke botša tate gore: ‘Ke a go rata.’ Ke kgodišegile gore ke ile ka dira bjalo, eupša ga ke gopole ke mmotša seo, ke be nka rata go gopola seo. Ke be ke na le nywaga e mehlano feela ge a be a ehwa. Tate o ile a hwa lehlakore ge a be a robetše, gomme o ile a kitimišetšwa sepetlele. Ge ke tsoga mesong e latelago, ke ile ka kwa gore o hwile. Ka morago ga moo, go bolela ka tate go be go ntshwenya, eupša ka morago ke ile ka thabela go kwa ditaba tša mabapi le yena ka gobane seo se be se nthuša go mo tseba gakaone. Keletšo ya ka go motho le ge e le ofe yo a hwetšwego ke motswadi ke gore a thabele motsotso o mongwe le o mongwe wo a bilego le wona le motswadi wa gagwe le go ngwala dilo tšeo a di gopolago gore a se ke a di lebala. Ke moka a dire seo a ka se kgonago go aga tumelo ya gagwe e le gore a tle a be gona ge motswadi wa gagwe a tsošwa lefaseng le lefsa la Modimo.”

 [Lepokisi go letlakala 116]

Letlakala la Dipotšišo

Ngwala Dikgopolo tša Gago

Ngwala tše dingwe tša dilo tše di thabišago tšeo o di gopolago ka motswadi wa gago. ․․․․․

Ngwala dilo tšeo o dumago gore nkabe o ile wa di botša motswadi wa gago ge a be a sa phela. ․․․․․

Akanya o na le ngwaneno yo a lwantšhanago le maikwelo a go ikwa a le molato ka lehu la motswadi wa lena. Ngwala seo o bego o tla se bolela go mo homotša. (Se se ka thuša le wena gore o bone ge e ba maikwelo a gago a go ikwa o le molato e le a swanetšego.) ․․․․․

Ngwala dilo tše pedi goba tše tharo tšeo o bego o ka rata go di tseba ka tatago goba mmago yo a hwilego, ke moka o kgopele motswadi wa gago yo a phelago gore le boledišane ka se sengwe sa dilo tšeo. ․․․․․

Bala Ditiro 24:15. Kholofetšo yeo e lego temaneng ye e go thuša bjang go lebeletšana le lehu la motswadi wa gago? ․․․․․

[Seswantšho go letlakala 115]

Bohloko bja go hwelwa bo ka swana le maphoto ao a bethago lebopo ka dinako tše sa letelwago