Kgaolo 11

Nka Apara’ng?

Heather o kgauswi le go tšwa ka mojako gomme batswadi ba gagwe ga ba kgolwe seo ba se bonago.

Tatagwe o phatloga ka gore: “Ke’ng tše o di aperego?”

Heather o araba a kwagala a maketše ka gore: “Bothata bo kae? Ke fo ba ke eya mabenkeleng le bagwera ba ka.”

Mmagwe o re: “O ka se sepele ka diaparo tšeo!”

Heather o ngongorega ka gore: “Eupša mma tše ke diaparo tšeo bana ka moka ba di aparago. Ka ntle le moo, diaparo tše di na le seo di se bolelago!”

Tatagwe o bolela ka go tia gore: “Ge e ba go le bjalo, rena ga re rate seo di se bolelago! Wena mosetsanyana, boela phapošing o yo apara diaparo tše dingwe, goba go sego bjalo ga go na mo o yago!”

 GO LWA ka diaparo ga se selo se sefsa. Batswadi ba gago ba ka ba ba ile ba lwa le batswadi ba bona ka yona taba ye ge ba be ba lekana le wena. Mohlomongwe le bona ka nako yeo ba be ba ikwa ka tsela yeo o ikwago ya yona lehono! Eupša ga bjale ba fetogile, gomme taba ya seo o ka se aparago e tsoša diphapano tše dintši.

Wena o re: Seaparo se se a ntshwanela.

Bona ba re: Ga se na seriti.

Wena o re: Se a ratega!

Bona ba re: Se tsoša kganyogo.

Wena o re: Ke seripagare sa theko.

Bona ba re: Se swanela theko yeo. . . . Ka gobane seripagare se sengwe sa sona ga se gona!

Na go na le tsela ya go fediša ntwa ye? Ee! Megan wa nywaga e 23 o ithutile sephiri sa go dira bjalo. O re: “Ga go hlokagale gore go be le ngangišano. Go ka ba le kwano.” Kwano? Na seo se bolela gore o swanetše go apara bjalo ka motho yo a nago le nywaga e 40? Aowa! Go kwana go fo bolela gore wena le batswadi ba gago le ahlaahle dilo tšeo le sa dumelelanego ka tšona ke moka le hwetše dikgetho tše dingwe tšeo wena le bona le ka di thabelago. Mehola e tla ba efe?

1. O tla bonagala o le botse kudu gaešita le go dithaka tša gago.

2. Ga se gantši moo batswadi ba gago ba ka se dumelelanego le wena ka seo o se aparago.

3. Ka morago ga go bona gore o kgona go ikarabela tabeng ya moaparo, batswadi ba gago ba ka ba ba go nea tokologo e oketšegilego dilong tše itšego.

Ka gona, a re thome. Akanya ka seaparo seo o naganago gore o swanetše go ba le sona seo o se bonego Inthaneteng goba ka lebenkeleng. Selo sa pele seo o swanetšego go se dira ke . . .

 Ela Hloko Melao ya Motheo ya Beibele

Ka mo go makatšago, Beibele ga e bolele mo gontši ka moaparo. Ge e le gabotse, o ka bala keletšo ka moka ya Mangwalo yeo e bolelago ka go lebanya ka taba ye ka metsotso e sego kae feela! Lega go le bjalo, ka nako yeo o tla hwetša tlhahlo e matla le ya bohlokwa kudu. Ka mohlala:

● Beibele e eletša basadi gore ba ikgabiše “ka go se solege le ka go hlaphogelwa ga monagano.” *—1 Timotheo 2:9, 10.

Polelwana “go se solege” e ka go dira gore o tshwenyege. O ka ipotšiša gore: ‘Na ke swanetše go apara mokotla?’ Le gatee! Mo tabeng ye, go se solege go bolela gore diaparo tša gago di bontšha gore o a itlhompha e bile o naganela maikwelo a ba bangwe. (2 Bakorinthe 6:3) Go na le diaparo tše dintši tšeo di swanelegago tabeng ye. Danielle wa nywaga e 23 o re: “Se e ka ba tlhohlo, eupša o ka apara ka tsela e lego nakong ka ntle le go apara ka mokgwa o feteletšego.”

● Beibele e re ge go tliwa tabeng ya ponagalo ya gago, o swanetše go lebiša tlhokomelo go “motho wa sephiring wa pelo”—goba bjalo ka ge Today’s English Version e fetolela polelwana ye ka gore, “motho yo o lego yena e le ka kgonthe ka gare.”—1 Petro 3:4.

Go se apare gabotse go ka tanya kgahlego ya batho ba bangwe ka nakwana, eupša ke botse bja gago bja ka gare bjo bo tlago go dira gore o hlomphe ke batho ba bagolo le dithaka tša gago ka  nako e telele. Dithaka tša gago? Ee—gaešita le tšona di ka bona bošilo bja go apara ka tsela e feteletšego. Brittany wa nywaga e 16 o re: “Go a šišimiša go bona ka tsela yeo basadi ba goketšago banna ka diaparo tšeo ba di aparago!” Kay o tla dumelelana le seo. Ge a hlalosa motho yo e kilego ya ba mogwera wa gagwe o re: “Diaparo tša gagwe ka moka e be e le tša bompogeng. O be a nyaka gore bašemane ba mo šetše, gomme e le gore ba mo šetše o be a apara diaparo tše di tanyago kgahlego kudu tšeo a bego a ka di hwetša.”

Hwetša Pono ya Batswadi ba Gago

Go tsenya diaparo tše di sa hlomphegego ka mokotleng wa gago gomme wa di apara ge o fihla sekolong ga se tsela yeo o swanetšego go dira dilo ka yona. Batswadi ba gago ba tla go bota kudu ge e ba o lokologile e bile o ba botša therešo, gaešita le dilong tšeo o ka di dirago bona ba sa tsebe ka tšona. Ge e le gabotse, mohlomongwe o tla dira gabotse ge o ka nyaka pono ya bona ge o nagana ka seo o ka se aparago. (Diema 15:22)—Diriša  “Letlakala la Dipotšišo Mabapi le Moaparo wa Gago” leo le lego go letlakala 82 le 83.

Eupša ke ka baka la’ng o kgopela pono ya bona? Na ga se mošomo wa batswadi ba gago gore ba ganetše tsela yeo o ikwago ka yona ka moaparo wa gago? Aowa, ga se mošomo wa bona. Ke therešo gore tatago le mmago ba ka lebelela dilo ka tsela e fapanego le ya gago, eupša ka dinako tše dingwe seo ke sona se o se nyakago. Nataleine wa nywaga e 17 o re: “Ke leboga keletšo ya batswadi ba ka ka gobane ga ke nyake go tšwa ka ntlong ke itshegiša ka batho goba gore ke be motho yo batho ba bolelago ka yena gampe ka baka la tsela yeo ke bonagalago ka yona.”

 Ka ntle le moo, therešo ke gore: Ge feela o sa dutše o dula le batswadi ba gago, ke bona ba go laolago. (Bakolose 3:20) Lega go le bjalo, ge o ka fo kwešiša dipono tša bona—le bona ba kwešiša tša gago—o ka makatšwa ke gore ke gantši gakaakaang moo le tlago go dumelelana. Ka baka leo, mafelelong go lwa ka diaparo go ka fela!

Keletšo ka Fešene: Ge o itekanya seaparo se itšego, o se ke wa fo nagana ka seo o se bonago seiponeng. Seaparo seo se ka bonagalago se sa solege se ka solega ge o dula fase goba o inama gore o tope selo se itšego. Ge e ba go kgonega, nyaka pono ya motswadi goba mogwera yo a godilego tsebong.

KGAOLONG YA RENA YEO E LATELAGO

Na o itlhoile kudu? O ka dira’ng ge e ba o sa ithate?

[Mongwalo wa tlase]

LENGWALO LA BOHLOKWA

“Go ikgabiša ga lena e se be ga . . . go apara diaparo tša maphadiphadi, eupša e be ga motho wa sephiring wa pelo.”—1 Petro 3:3, 4.

KELETŠO

Phema mehuta ya diaparo tšeo di kgothaletšago thobalano. Di ka dira gore o bonagale o nyaka go šetšwa e bile o nagana ka wena feela.

NA O BE O TSEBA . . . ?

Selo sa pele seo batho ba se naganago ka wena gantši se ithekgile ka moaparo wa gago.

KGATO YEO KE TLAGO GO E TŠEA!

Setho sa lapa goba mogwera yo a godilego tsebong yo nka boledišanago le yena mabapi le seaparo seo ke nyakago go se reka ke ․․․․․

Nakong e tlago ge ke reka seaparo, ke tla ela hloko dilo tše di latelago: ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Ke ka baka la’ng gantši batswadi le bafsa bao ba lego mahlalagading ba thulana ka ditaba tša moaparo?

● Ke bokgoni bofe bjo o ka bago le bjona ka go ahlaahla ditaba tša moaparo le batswadi ba gago?

[Ntlhakgolo go letlakala 81]

“Ge ke bona banenyana ba apere diaparo tše di sa hlomphegego, go ba hlompha ga ka go a fokotšega. Ka lehlakoreng le lengwe, ge ke bona batho ba apere diaparo tše di sa solegego e bile e le tše dibotse, ke ipotša gore: ‘Ye ke tsela yeo ke nyakago gore batho ba ntebelele ka yona.’”—Nataleine

 [Box/​Pictures on pages 82, 83]

Letlakala la Dipotšišo

Letlakala la Dipotšišo Mabapi le Moaparo wa Gago

Ditaelo: Dira kopi ya matlakala a. Kgopela batswadi ba gago gore ba tlatše karolo ya ka lehlakoreng le letona ke moka wena o tlatše yeo e lego ka go le letshadi. Ka morago, ba nee dikarabo tša gago gomme bona ba go nee tša bona ke moka le ahlaahleng dikarabo tša lena. Na go na le dilo tšeo di le makatšago? Ka moka ga lena le ithutile’ng ka pono ya yo mongwe yeo le bego le sa e tsebe pele?

Karolo ya Gago Nagana ka seaparo se itšego seo o nyakago go se apara goba go se reka.

Ke ka baka la’ng o rata seaparo seo? Lokeletša mabaka ao a lego ka mo tlase go ya ka bohlokwa bja wona.

․․․․․ Ke sa leina la go tuma

․․․․․ Se ipiletša bathong ba bong bjo bo fapanego le bja gago

․․․․․ Se dira gore o amogelege go dithaka tša gago

․․․․․ Se a go swanela

․․․․․ Theko ya sona

․․․․․ A mangwe ․․․․․

Batswadi ba ka ge ba thoma go bona seaparo se mohlomongwe ba tla re

□ “O ka se tsoge o se rekile!”

□ “Mohlomongwe o ka se reka.”

□ “Ga se na bothata.”

Ge e ba ba gana, mohlomongwe lebaka le legolo e ka ba gore

□ “Se tsoša kganyogo.”

□ “Ga se na seriti.”

□ “Se nakong kudu.”

□ “Ga se bolele gabotse ka rena batswadi ba gago.”

□ “Se bitša kudu.”

□ Le lengwe ․․․․․

Na re ka Šoma  Gotee Tabeng ye?

Ke bona bohlokwa bofe ponong ya batswadi ba ka?

․․․․․

Go thwe’ng ge e ba go na le selo seo se ka dirwago seaparong seo e le gore se amogelege?

․․․․․

Karolo ya Batswadi ba Gago Naganang ka seaparo se itšego seo ngwana wa lena yo a lego mahlalagading a nyakago go se apara goba go se reka.

Le nagana gore ke ka baka la’ng ngwana wa lena a rata seaparo seo? Lokeletšang mabaka a lego ka mo tlase go ya ka moo le naganago gore go tla eng pele go yena.

․․․․․ Ke sa leina la go tuma

․․․․․ Se ipiletša bathong ba bong bjo bo fapanego le bja gagwe

․․․․․ Se dira gore a amogelege go dithaka tša gagwe

․․․․․ Se a mo swanela

․․․․․ Theko ya sona

․․․․․ A mangwe ․․․․․

Karabelo ya ka ya mathomo ke gore

□ “O ka se tsoge o se rekile!”

□ “Mohlomongwe o ka se reka.”

□ “Ga se na bothata.”

Lebaka leo nka ganago ka lona ke gore

□ “Se tsoša kganyogo.”

□ “Ga se na seriti.”

□ “Se nakong kudu.”

□ “Ga se bolele gabotse ka rena batswadi ba gago.”

□ “Se bitša kudu.”

□ Le lengwe ․․․․․

Na re ka Šoma Gotee Tabeng ye?

Na go gana ga rena seaparo se e fo ba feela taba ya seo rena re se ratago?

□ Ee □ Mohlomongwe □ Aowa

Go thwe’ng ge e ba go na le selo seo se ka dirwago seaparong seo e le gore se amogelege?

․․․․․

Phetho ․․․․․

[Lepokisi go letlakala 84]

Go Thwe’ng ka Bašemane?

Melao ya motheo ya Beibele yeo e ahlaahlilwego kgaolong ye e šoma le go bašemane. O se ke wa solega. Dira gore motho wa gago wa sephiring wa pelo—seo o lego sona ka gare e le ka kgonthe—a bonagale gabotse go ba bangwe. Ge o nagana go apara goba go reka seaparo se itšego, ipotšiše gore: ‘Se tla bolela’ng ka nna? Na seo se se bolelago se tloga se bontšha seo ke lego sona e le ka kgonthe?’ Gopola gore diaparo di bolela se itšego ka wena. Kgonthišetša gore diaparo tša gago di bontšha ditekanyetšo tšeo o di dumelago!

[Seswantšho go letlakala 80]

Diaparo tša gago di swana le leswao leo le botšago batho sohle ka wena. Leswao la gago le bolela eng ka wena?