Kgaolo 26

Go Thwe’ng ka go ba le Thobalano le Motho yo o sa Ratanego le Yena?

“Bana ba bokana gotee e le go fo bona ge e ba ba ka fihla bokgoleng bja go ba le thobalano le go bona gore ba ka robala le batho ba bakae.”—Penny.

“Bašemane ba bolela ka bolokologi ka taba ye. Ba ikga-ntšha ka gore ba na le dikgarebe eupša ba dutše ba eba le thobalano le banenyana ba bangwe ba bantši.”—Edward.

BAFSA ba bantši lehono ba ikgantšha ka go ba le thobalano le motho yo ba sa ratanego le yena. Ba bangwe e bile ba na le batho bao ba tlwaelanego le bona bao ba ka bago le thobalano le bona eupša ba se ba ikemišetša go ratana le bona.

O se ke wa makala ge o ikwa o lekwa ke seo! (Jeremia 17:9) Edward yo a tsopotšwego pejana o re: “Banenyana ba bantši ba ile ba ithaopela go robala le nna gomme ke lebeletšane le bothata bjo bogolo bja go gana ka ge ke le Mokriste. Ga go bonolo go gana!” Ke melao efe ya motheo ya Beibele yeo o swanetšego go e gopola  ge o kgopelwa go ba le thobalano le motho yo o sa ratanego le yena?

Tseba Lebaka Leo go Fošagetšego go ba le Thobalano le Motho yo o sa Ratanego le Yena

Bootswa ke sebe se segolo kudu moo e lego gore bao ba bo dirago “ba ka se je bohwa bja mmušo wa Modimo.” (1 Bakorinthe 6:9, 10) Go ba gona, seo ke therešo go sa šetšwe gore batho ba babedi ba bolela gore ba a ratana goba ba ba le thobalano le motho yo ba sa ratanego le yena. E le gore o ganetše teko boemong le ge e le bofe, o swanetše go lebelela bootswa ka tsela yeo Jehofa a bo lebelelago ka yona.

“Ke dumela ka kgodišego gore tsela ya Jehofa ke tsela e kaone kudu ya go phela.”—Karen yo a tšwago Canada.

“Gopola gore o na le batswadi, o mogwera wa batho ba bantši e bile o setho sa phuthego. O tla nyamiša batho ba ka moka ge o ka ineela tekong!”—Peter yo a tšwago Brithania.

Ka go ba le pono ya Jehofa ka bootswa, o tla kgona go “[hloya] se sebe” gaešita le ge se ka bonala se go kgahla.—Psalm 97:10.

Bala lengwalo le: Genesi 39:7-9. Lemoga sebete sa Josefa sa go ema a tiile kgahlanong le teko ya go ba le thobalano le seo se mo thušitšego go gana.

Ikgantšhe ka Ditumelo tša Gago

Go tlwaelegile gore bafsa ba ikgantšhe ka seo ba se dumelago. O na le tokelo ya go emela ditekanyetšo tša Modimo ka boitshwaro bja gago. O se ke wa lešwa dihlong ke pono ya gago ka thobalano ya pele ga lenyalo.

“Di tloga fase, bontšha phaa gore o na le ditekanyetšo tša boitshwaro.”—Allen yo a tšwago Jeremane.

“Bašemane bao ke tsenego le bona sekolong se se phagamego  ba be ba tseba seo ke lego sona e bile ba be ba tseba gore maiteko a bona e be e tla ba go itshenyetša nako.”—Vicky yo a tšwago United States.

Go emela ditumelo tša gago ke pontšho ya gore o ba Mokriste yo a godilego tsebong.—1 Bakorinthe 14:20.

Bala lengwalo le: Diema 27:11. Bona kamoo go dira se se nepagetšego go ka thabišago pelo ya Jehofa!

Ema o Tiile!

Go bohlokwa go gana. Eupša ba bangwe ba ka fo se kwešiše lebaka la gago la go gana ba nagana gore o fo itira tše ekego ga o ba kgahlegele.

“Selo se sengwe le se sengwe ka wena—go akaretša le mokgwa wa gago wa go apara, mokgwa wa gago wa go bolela le kamoo o dirišanago le batho ka gona—se swanetše go bontšha gore o a gana.”—Joy yo a tšwago Nigeria.

“O swanetše go bolela ka mo go kwagalago gore seo se ka se tsoge se diregile. Le ka mohla o se ke wa amogela dimpho tše di tšwago go bašemane bao ba lekago go go foraforetša gore o robale le bona. Ba ka nyaka gore o lefelele dimpho tšeo ka go robala le bona.”—Lara yo a tšwago Brithania.

Jehofa o tla go thuša ge e ba o ema o tiile. Mopsalme Dafida o be a ka bolela ka Jehofa go tšwa phihlelong ya gagwe gore: “Yo a botegago o tla dirišana le yena ka potego.”—Psalme 18:25.

 Bala lengwalo le: 2 Dikoronika 16:9. Hlokomela gore Jehofa o ikemišeditše go thuša bao ba nyakago go dira se se nepagetšego.

Lemoga Kotsi e sa tla

Beibele e re: “Yo bohlale ke yo a bonego kotsi a ikuta.” (Diema 22:3) O ka diriša bjang keletšo ye? Ka go lemoga kotsi e sa tla!

“Ikaroganye ka mo o ka kgonago ka gona le batho bao ba bolelago dilo tše bjalo.”—Naomi yo a tšwago Japane.

“O se ke wa fana ka boitsebišo bja motho ka noši bjo bjalo ka aterese ya gago goba nomoro ya mogala.”—Diana yo a tšwago Brithania.

Lekodišiša polelo ya gago, boitshwaro, bagwera gotee le mafelo ao o tlwaetšego go ya go ona. Ke moka o ipotšiše gore: ‘Na  ka go se tsebe ke bontšha maswao ao a tlago go dira gore ba bangwe ba nkgopele go robala le bona?’

Bala lengwalo le: Genesi 34:1, 2. Bona kamoo go ba lefelong le le fošagetšego go dirilego gore ngwanenyana yo a bitšwago Dina a be le mafelelo a setlago pelo.

Gopola gore Jehofa Modimo ga a tšee gabohwefo taba ya go robala le motho yo o sa ratanego le yena; le wena o se ke wa e tšea gabohwefo. Ka go emela seo se nepagetšego, o ka ba le letswalo le le hlwekilego pele ga Modimo gomme wa ipolokela seriti. Ngwanenyana yo a bitšwago Carly o re: “Ke ka baka la’ng o itumelela go ba sedirišwa sa kapejana sa go kgotsofatša dikganyogo tša motho yo mongwe? Eba šedi gore o šireletše boemo bjo bo hlwekilego bjo o šomilego ka thata gore o be le bjona pele ga Jehofa!”

KGAOLONG YA RENA YEO E LATELAGO

Ke banenyana ba mohuta mang bao bašemane ba rego ba tloga ba ba kgahla? O ka makatšwa ke go tseba karabo!

LENGWALO LA BOHLOKWA

‘Dira sohle se o ka se kgonago gore mafe-lelong Modimo a go hwetše o se na sepatso e bile o hloka sekodi gomme o le khutšong.’—2 Petro 3:14.

KELETŠO

Hlagolela dika tša gago tša ka gare. (1 Petro 3:3, 4) Ge o ka ba motho yo kaone, gona o tla kgahla mohuta wa motho yo a lego kaone.

NA O BE O TSEBA . . . ?

Jehofa o nyaka gore o thabele thobalano go etša ge a e diretše go ba mothopo wa lethabo lenyalong, o se na dipelaelo, o sa boife dikotsi le manyami ao gantši e lego ditlamorago tša bootswa.

KGATO YEO KE TLAGO GO E TŠEA!

Nka ekiša boikemišetšo bja josefa bja go dula a hlwekile boitshwarong ge e ba ke ․․․․․

Ke tla phema phošo yeo dina a e dirilego ge e ba ke ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Gaešita le ge thobalano e gobogilego e ka bonagala e kgahliša batho, ke ka baka la’ng e fošagetše?

● Ke’ng seo o tlago go se dira ge e ba motho yo mongwe a go kgopela gore o robale le yena?

[Ntlhakgolo go letlakala 185]

“Ema o tiile! Ge lesogana le lengwe le be le nkgokeletša go robala le lona, ke ile ka re, ‘Ntlogele!’ ke moka ka tloga moo ke šošobantše sefahlego.”—Ellen

[Seswantšho go letlakala 187]

Ge e ba o eba le thobalano le motho yo o sa ratanego le yena, o ithekiša ka tšhelete ya tlase