Kgaolo 30

Na re Tloga re Loketše go Tsena Lenyalong?

O hweditše motho yo o nyakago go tsena lenyalong le yena gomme le be le dutše le beana mabaka ka nako e telele ka mo go lekanego gore o ka tseba gore le tloga le ratana e le ka kgonthe. Lethabo la go tsena lenyalong le batametše. Goba na go bjalo? O le kgauswi le go dira e nngwe ya diphetho tše dikgolokgolo bophelong, o thoma go ipotšiša . . .

Na re tloga re loketše go tsena lenyalong?

GO BA le dipelaelo mabapi le lenyalo go tlwaelegile—gaešita le ge o rata motho. Ka ge go na le batho ba bantši bao ba sego ba thaba manyalong le dipalo tše oketšegago tša tlhalo, go a kwagala gore o nyaka go  dira dilo ka šedi ge o naganišiša ka mogato wo o fetošago bophelo. O tseba bjang ge e ba o loketše go gata mogato wo? Gona bjale go feta le ge e le neng pele, o swanetše go lebala ditoro le ge e le dife mabapi le lenyalo gomme o nagane ka dilo tša kgonthe. Ka mohlala:

TORO 1 “Re ka phela ka lerato.”

Therešo: Lerato le ka se lefe dikoloto le gona le ka se rarolle mathata a tša ditšhelete. Ge e le gabotse, banyakišiši ba hweditše gore tšhelete ke e nngwe ya dibaki tša motheo tša mathata a lenyalo moo go feleletšago go bile le tlhalo. Go se be le pono e lekalekanego ka tšhelete go ka go gobatša moyeng le maikwelong, le gona go ka senya tswalano ya gago le molekane wa gago. (1 Timotheo 6:9, 10) O ka ithuta’ng go se? Le se ke la leta go fihlela ka morago ga lenyalo gore le tlo ahlaahla tsela yeo le tlago go diriša tšhelete!

Beibele e re: “Ke mang wa lena yo a nyakago go aga tora a sa thomego ka go dula fase gomme a bala ditshenyegelo?”—Luka 14:28.

Tšhišinyo: Boledišana le yo e tlago go ba molekane wa gago ka ditaba tša ditšhelete gona bjale—pele ga ge le nyalana. (Diema 13:10) Ela hloko dipotšišo tše bjalo ka tše: Re tla diriša bjang tšhelete ya rena yeo re e hwetšago? Na re tla kopanela akhaonto ya panka goba yo mongwe le yo mongwe o tla ba le ya gagwe? Ke mang gare ga lena yo a tlago go ba le bokgoni bja go boloka pego ya ditšhelete le go bona gore dikoloto di lefilwe? * Yo mongwe le yo mongwe wa rena a ka diriša bokae ka ntle le go kgopela yo mongwe? Gona bjale ke nako ya gore le thome go šoma gotee!—Mmoledi 4:9, 10.

TORO 2 “Re tla ba banyalani bao ba swanelanago ka gobane re dumelelana ka selo se sengwe le se sengwe—ga nke re ngangišana!”

Therešo: Ge e ba le sa ngangišane, mohlomongwe ke ka gobane le kgonne go phema ka šedi ditaba tšeo di ka tsošago phapano. Eupša ge le šetše le nyalane le tlo swanelwa ke go ahlaahla ditaba tšeo! Therešo ke gore, ga go na batho ba babedi ba sa phethagalago bao ba ka swanelanago tlwaa, ka gona ngangišano e tla ba gona.  (Baroma 3:23; Jakobo 3:2) Le swanetše gore le se ke la ela hloko feela gore le dumelelana gabotse bjang eupša gape le ele hloko seo se diregago ge le sa dumelelane. Tswalano e tiilego e dirwa ke batho ba babedi bao ba kgonago go dumela ka bolokologi gore go na le go se kwane ke moka ba šomela go rarolla bothata bjoo, ba dira seo bjalo ka batho ba ba godilego le ka khutšo.

Beibele e re: “O se ke wa yo robala o galefile.”—Baefeso 4:26, Contemporary English Version.

Tšhišinyo: Naganišiša ka kelohloko kamoo o bego o rarolla diphapano le batswadi ba gago le bana beno go fihla gona bjale. Dira tšhate e swanago le yeo e lego go letlakala 93 la puku ye goba go letlakala 221 la Bolumo 2. Ngwala ditiragalo tše itšego tšeo di dirilego gore go be le go se kwane, kamoo o arabetšego ka gona le gore ke karabelo efe yeo nkabego e bile e kaone. Ka mohlala, ge e ba karabelo ya gago ya kapejana ge go na le phapano e le gore o kitimele ka phapošing ya gago gomme o bethantšhe lebati ka pefelo, gona ngwala karabelo e kaone—karabelo yeo e tlago go thuša go rarolla bothata go e na le go bo gakatša. Ge e ba gona bjale o ithuta go arabela ngangišanong gakaone, o tla ba le bokgoni bjo bo lego bohlokwa bakeng sa lenyalo leo le nago le lethabo.

TORO 3 “Ge ke tsene lenyalong, dikganyogo tša ka ka moka tša thobalano di tla kgotsofatšwa.”

Therešo: Go tsena lenyalong ga go kgonthišetše gore o tla ba le thobalano nako le nako ge o nyaka. Gopola gore molekane wa gago le yena ke motho yo a nago le maikwelo ao a swanetšego go elwa  hloko. Therešo ke gore go tla ba le dinako tšeo ka tšona molekane wa gago a tla bego a sa ikwe a nyaka go ba le thobalano. Lenyalo ga le go nee tshwanelo ya go gapeletša gore dinyakwa tša gago di kgotsofatšwe. (1 Bakorinthe 10:24) Therešo ke gore boitshwaro bo a nyakega bathong bao ba sego lenyalong le bao ba lego lenyalong.—Bagalatia 5:22, 23.

Beibele e re: “Yo mongwe le yo mongwe wa lena a tsebe go laola mmele wa gagwe ka kgethego le kgodišo, e sego ka kganyogo ya megabaru.”—1 Bathesalonika 4:4, 5.

Tšhišinyo: Itlhahlobe ka kelohloko tabeng ya dikganyogo tša gago tša go ba le thobalano gotee le ditshekamelo tša gago gomme o nagane kamoo dilo tše di ka kgomago lenyalo la gago nakong e tlago. Ka mohlala, na o lemaletše mokgwa wa boithati wa go tsoša ditho tša pelego? Na o na le mokgwa wa go bogela diswantšho tšeo di kgothaletšago bootswa? Na o na le mahlo a matelele, ke gore ka sephiring o lebelela batho ba bong bjo bo fapanego ka tsela ya go ba kganyoga? Ipotšiše gore: ‘Ge e ba ke na le bothata bja go laola dikganyogo tša ka tša go ba le thobalano pele ke tsena lenyalong, ke tla kgona bjang go dira bjalo ka morago ga ge ke tsene lenyalong?’ (Mateo 5:27, 28) Taba e nngwe še: Na o sekametše go bapaleng ka lerato le go ratana le batho ba bantši, ka go re’alo wa ba le botumo bja go ba mošemane yo a bapalago ka banenyana goba motho yo a bapalago ka lerato le batho ba bong bjo bo fapanego? Ge e ba go le bjalo, o rulagantše go fenya bjang tshekamelo yeo ka morago ga lenyalo, ge o swanetše go bontšha maikwelo a gago a lerato go motho o tee feela, e lego molekane wa gago?—Diema 5:15-17.

TORO 4 “Lenyalo le tla dira gore ke thabe.”

Therešo: Motho yo a sego a thaba ge a se lenyalong gantši e ba motho yo a sa thabago ge a tsene lenyalong. Ka baka la’ng? Ka gobane lethabo la motho le laolwa kudu ke pono ya gagwe, e sego maemo  ao a lego go ona. (Diema 15:15) Batho bao ba tlwaetšego go belaela ka maemo a bona bophelong gantši ba lebiša tlhokomelo go seo se sego gona tswalanong ya bona go e na le go e lebiša go seo se lego gona. Go kaone kudu go hlagolela pono e nepagetšego le go e kgomarela ge o sa dutše o se lenyalong. Ke moka ge o tsene lenyalong, o tla dira gore dika tša gago tše dibotse gotee le tša molekane wa gago di bonagale.

Beibele e re: “Go kaone go kgotsofatšwa ke seo o nago le sona go e na le gore ka mehla o phele o nyaka selo se sengwe.”—Mmoledi 6:9, Today’s English Version.

Tšhišinyo: Ka dinako tše dingwe boemo bjo bo fošagetšego bja kgopolo bo tlišwa ke go letela dilo tšeo e sego tša kgonthe. Letlakaleng le lengwe la ka thoko, lokeletša dilo tše pedi goba tše tharo tšeo o di letetšego lenyalong. Di bale ke moka o ipotšiše gore: ‘Na dilo tšeo ke di letetšego di theilwe kudu ditorong go feta dilong tša kgonthe? Na di tutuetšwa ke mekero ya ditaba, mohlomongwe ka  difilimi tša marato goba dipuku? Na dilo tšeo ke di letetšego di lebiša tlhokomelo go seo lenyalo le tlago go ntirela sona—mohlomongwe la alafa go lewa ga ka o šoro ke bodutu, la kgotsofatša kganyogo ya ka ya go ba le thobalano le go dira gore dithaka tša ka di ntšeele godimo?’ Ge e ba go le bjalo, o tla swanelwa ke go kgaotša go nagana ka “nna” gomme o nagane ka “rena.” E le go go thuša go dira bjalo, lokeletša dilo tše pedi goba tše tharo tšeo o di letetšego lenyalong tšeo di akaretšago wena le molekane wa gago wa ka moso.

Ditoro tše di lego ka mo godimo tša mabapi le lenyalo di ka kgoma o šoro lethabo la gago lenyalong. Ka gona, katanela go phumola tsela e bjalo e fošagetšego ya go nagana gomme e tšeelwe legato ke pono e nepagetšego. Letlakala la dipotšišo leo le lego go letlakala 216 le 217 le ka thuša wena le molekane wa gago wa ka moso ge le dutše le lebeletše pele go se sengwe sa dilo tšeo e ka bago tšhegofatšo e kgolo kudu bophelong, e lego lenyalo leo le thabilego!—Doiteronomio 24:5; Diema 5:18.

KGAOLONG YA RENA YEO E LATELAGO

Go kgaogana le motho yo o bego o ratana le yena go ka ba bjalo ka ge eka karolo ya gago e itšego e hwile. O ka lebeletšana bjang ka katlego le ditlamorago tša seo?

[Mongwalo wa tlase]

LENGWALO LA BOHLOKWA

‘Monna o tla tlogela tatagwe le mmagwe, a kgomarela mosadi wa gagwe gomme bona e tla ba nama e tee.’—Genesi 2:24.

KELETŠO

Boledišana le banyalani bao ba godilego gomme o ba botšiše gore ke keletšo efe yeo ba ka ratago go e nea monna le mosadi bao ba sa tšwago go nyalana mabapi le kamoo ba ka bago le lenyalo leo le atlegilego.—Diema 27:​17.

NA O BE O TSEBA . . . 

Lenyalong leo le atlegilego, monna le mosadi ba tšeana bjalo ka bagwera, ba boledišana gabotse, ba kgona go rarolla diphapano le gona ba lebelela tswalano ya bona e le tlemo ya bophelo ka moka.

KGATO YEO KE TLAGO GO E TŠEA!

Seka seo ke tlago go šomela go sona gona bjale e le go nthuša go kaonefatša tswalano ya ka le molekane wa ka wa ka moso ke ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Dinageng tše dingwe, manyalo a mantši a feleletša ka tlhalo. O nagana gore ke ka baka la’ng go le bjalo?

● Go na le dikotsi dife ka go tsena lenyalong e le feela go tšhabela bophelo bja ka gae bjo bo sa thabišego?

● Ke ka baka la’ng go tla ba bohlokwa go dira dilo ka go dumelelana le melao ya motheo ya Beibele lenyalong la gago la ka moso?

[Ntlhakgolo go letlakala 220]

“Lenyalo ke mogato o mogolo. Go bohlokwa gore o se ke wa tseba feela seo o tsenago go sona, eupša o tsebe le gore o tsena go sona le mang.”—Audra

 [Box/​Picture on pages 216, 217]

Letlakala la Dipotšišo

Na o Loketše go Tsena Lenyalong?

Ela hloko dipotšišo tše di lego matlakaleng a mabedi a latelago. Mohlomongwe o ka ba wa diriša matlakala a e le motheo wa poledišano magareng ga gago le molekane wa gago wa ka moso. Kgonthišetša gore o bala mangwalo ao a bontšhitšwego.

Ditaba tša Ditšhelete

□ Boemo bja gago bja kgopolo ke bofe ka tšhelete?—Baheberu 13:5, 6.

□ Ke ka ditsela dife o šetšego o ipontšha gore o na le boikarabelo ditabeng tša ditšhelete?—Mateo 6:19-21.

□ Na gona bjale o na le dikoloto? Ge e ba go le bjalo, o gata megato efe go di lefa?—Diema 22:7.

□ Lenyalo la lena le tla nyaka bokae? Ge e ba le tla dira sekoloto bakeng sa lenyalo la lena, le nagana gore ke sekoloto sa bokae seo le ka tlago la kgona go se lefa?—Luka 14:28.

□ Ge le šetše le nyalane, na wena le molekane wa gago le tla swanelwa ke go šoma? Ge e ba go le bjalo, le tla swaragana bjang le go dira ga lena dilo ka dinako tše di sa swanego gotee le dinyakwa tša dinamelwa?—Diema 15:22.

□  Wena le molekane wa gago le tla dula kae? Mohlomongwe le tla lefa bokae bakeng sa rente, dijo, diaparo le ditshenyagalelo tše dingwe, le gona le tla lefelela bjang ditshenyagalelo tšeo?—Diema 24:27.

Ditaba tša Lapa

□ O dirišana gabotse gakaaka’ng le batswadi ba gago gotee le bana beno?—Ekisodo 20:12; Baroma 12:18.

□ Gona bjale o rarolla bjang mathata a ka gae?—Bakolose 3:13.

□ Ge e ba o le kgarebe, ke ka ditsela dife o bontšhago go ba le “moya wo o homotšego le o boleta”?—1 Petro 3:4.

□ Na o rulagantše go ba le bana? (Psalme 127:3) Ge e ba go se bjalo, o tla diriša dithibela pelego tša mohuta ofe?

□ Ge e ba o le lesogana, o rulagantše go etelela pele bjang go hlokomela lapa la gago moyeng?—Mateo 5:3.

Semelo sa Motho

□ O ipontšhitše bjang gore o seroto?—Diema 6:9-11; 31:17, 19, 21, 22, 27.

□ O bontšhitše bjang moya wa boikgafo?—Bafilipi 2:4.

□ Ge e ba o le lesogana, ke ka ditsela dife o bontšhago gore o ka laola dilo ka tsela e swanago le ya Kriste?—Baefeso 5:25, 28, 29.

□ Ge e ba o le kgarebe, go na le bohlatse bofe bja gore o ka ikokobeletša bolaodi?—Baefeso 5:22-24.

[Seswantšho go letlakala 219]

O se ke wa itahlela lenyalong pele o ka tseba selo se itšego ka meetse ao o itahlelago go ona