Kgaolo 37

Na ke Swanetše go Kolobetšwa?

Araba mafoko a a latelago ka therešo goba maaka:

Ke tlamo gore Bakriste ba kolobetšwe.

□ Therešo

□ Maaka

Morero o mogolo wa kolobetšo ke go go šireletša gore o se ke wa dira sebe.

□ Therešo

□ Maaka

Kolobetšo e go nea sebaka sa gore o tle o phološwe.

□ Therešo

□ Maaka

Ge e ba o se wa kolobetšwa, ga o ikarabele go Modimo ka ditiro tša gago.

□ Therešo

□ Maaka

Ge e ba bagwera ba gago ba kolobetšwa, seo se ra gore le wena o loketše go kolobetšwa.

□ Therešo

□ Maaka

GO FO ba go tlwaelegile gore o nagane ka go kolobetšwa ge e ba o phela ka go dumelelana le ditekanyetšo tša Modimo, o hlagolela segwera le yena e bile o bolela le ba bangwe ka tumelo ya gago. Eupša o ka tseba bjang ge e ba o loketše go kolobetšwa? E le go go thuša go araba potšišo ye, anke re ahlaahle mafoko a lego ka mo godimo ao a nyakago go arabja ka therešo goba maaka.

 ● Ke tlamo gore Bakriste ba kolobetšwe.

Therešo. Jesu o laetše gore barutiwa ba gagwe ba kolobetšwe. (Mateo 28:19, 20) Ge e le gabotse, Jesu ka boyena o ile a kolobetšwa ka go rata. E le gore o latele Kriste, o swanetše go kolobetšwa ge o šetše o godile tsebong ka mo go lekanego gore o ka itirela phetho yeo e bile o tloga o nyaka go kolobetšwa.

● Morero o mogolo wa kolobetšo ke go go šireletša gore o se ke wa dira sebe.

Maaka. Kolobetšo ke tsela ya go bontšha phatlalatša gore o ineetše go Jehofa. Go ineela ga gago ga se selo seo se go thibelago go dira dilo tšeo o bego o ka rata go di dira ka sephiring. Go e na le moo, o neela bophelo bja gago go Jehofa ka gobane o nyaka go phela ka go dumelelana le melao ya gagwe.

● Kolobetšo e go nea sebaka sa gore o tle o phološwe.

Therešo. Beibele e re kolobetšo ke kgato ya bohlokwa gore motho a tle a phološwe. (1 Petro 3:21) Lega go le bjalo, se ga se bolele gore kolobetšo e swana le inšuranse yeo o e tsenelago gore e go šireletše ge go ka hlaga kotsi. O kolobetšwa ka gobane o rata Jehofa gomme o nyaka go mo hlankela ka mo go sa felego ka pelo ya gago ka moka.—Mareka 12:29, 30.

 ● Ge e ba o se wa kolobetšwa, ga o ikarabele go Modimo ka ditiro tša gago.

Maaka. Jakobo 4:17 e re: “Ge e ba motho a tseba go dira seo se lokilego, fela a sa se dire, gona o dira sebe”—a kolobeditšwe goba a se a kolobetšwa. Ka gona, ge e ba o tseba seo se lokilego gomme o godile tsebong ka mo go lekanego gore o ka naganišiša ka bophelo bja gago, mohlomongwe ye ke nako ya gore o boledišane ka taba ye le motswadi wa gago goba Mokriste yo mongwe yo a godilego tsebong. Ka go dira bjalo, o ka tseba seo o swanetšego go se dira gore o tle o kolobetšwe.

● Ge e ba bagwera ba gago ba kolobetšwa, seo se ra gore le wena o loketše go kolobetšwa.

Maaka. Ke wena yo a swanetšego go itirela phetho ya go kolobetšwa. (Psalme 110:3) O swanetše go kolobetšwa ge feela o kwešiša ka botlalo gore go ba yo mongwe wa Dihlatse tša Jehofa go akaretša eng e bile o kgodišegile gore o itokišeditše  go rwala boikarabelo bjo.—Mmoledi 5:4, 5.

Kgato Yeo e Fetošago Bophelo

Kolobetšo ke kgato yeo e fetošago bophelo yeo e lebišago ditšhegofatšong tše dintši. Ka nako e swanago, e akaretša boikarabelo bjo bogolo bja go phelela boineelo bjoo wena o bo dirilego go Jehofa.

Na o loketše go dira boineelo bjoo? Ge e ba go le bjalo, gona o na le lebaka le lebotse la go thaba. O letetšwe ke tokelo e kgolo ka go fetišiša ya go hlankela Jehofa ka pelo ka moka le go phela ka tsela yeo e bontšhago gore ruri o ineetše go yena.—Mateo 22:36, 37.

KGAOLONG YA RENA YEO E LATELAGO

Ithute kamoo o ka ipeelago dipakane e le gore o phele bophelo bja gago ka tsela e bohlale.

KEY SCRIPTURE

“Le neele mebele ya lena e le sehlabelo se se phelago, se sekgethwa, se se amogelegago go Modimo, tirelo e kgethwa ka matla a lena a tlhaologanyo.”—Baroma 12:1.

KELETŠO

Ka thušo ya batswadi ba gago, hwetša motho yo a itšego ka phuthegong yo a ka go thušago gore mafelelong o tle o kolo-betšwe.—Ditiro 16:1-3.

NA O BE O TSEBA . . . ?

Go kolobetšwa ke karolo ya bohlokwa kudu ya “leswao” leo le go hlaolago gore o tle o phološwe.—Hesekiele 9:4-6.

KGATO YEO KE TLAGO GO E TŠEA!

E le gore ke šomele go kolobetšwa, ke tla oketša kwešišo ya ka ka dithuto tše di latelago tša Beibele: ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Ke ka baka la’ng kolobetšo e le kgato yeo e sa swanelago go tšewa gabohwefo?

● Ke’ng seo se ka dirago gore mofsa a nyake go kolobetšwa eupša a sešo a lokela go dira bjalo?

● Ke ka baka la’ng mofsa ka bošilo a ka dikadika go ineela le go kolobetšwa?

[Ntlhakgolo go letlakala 306]

“Go tseba gore ke kolobeditšwe go nthušitše gore ke dire diphetho tše bohlale le gore ke se ke ka dira dilo tšeo di bego di tla ba le ditlamorago tše kotsi.”—Holly

 [Box/​Picture on page 307]

Dipotšišo Tšeo Gantši di Botšišwago Mabapi le Kolobetšo

Kolobetšo e swantšhetša’ng? Go inwa le go ntšhwa ka meetseng go bolela gore o hwile tseleng ya gago ya boithati gomme ga bjale o tlo phelela go dira thato ya Jehofa.

Go neela bophelo bja gago go Jehofa go bolela’ng? Go bolela gore ga o sa tlo iphelela, o holofetša gore o tlo etiša go dira thato ya Modimo pele ga dilo ka moka. (Mateo 16:24) O swanetše go rulaganya go ineela go Jehofa e sa le pele ka thapelo pele o ka kolobetšwa.

O swanetše go dira’ng ka bophelo bja gago pele o kolobetšwa? O swanetše go phela ka go dumelelana le Lentšu la Modimo le go botša ba bangwe ka tumelo ya gago. O swanetše go hlagolela segwera le Modimo ka thapelo le ka go ithuta Lentšu la gagwe. O swanetše go hlankela Jehofa ka gobane o kgetha go dira bjalo—e sego ka gobane o gapeletšwa.

Na o swanetše go kolobetšwa o na le nywaga e itšego? Nywaga ga se selo seo o swanetšego go tshwenyega ka sona. Lega go le bjalo, o swanetše go ba o godile ka mo go lekanego—monaganong le maikwelong—gore o ka kwešiša seo se bolelwago ke go ineela.

Go thwe’ng ge e ba o nyaka go kolobetšwa eupša batswadi ba gago ba re o eme ganyenyane? Mohlomongwe ba nyaka gore o be le phihlelo e oketšegilego ka bophelo bja Bokriste. Tšeela godimo keletšo ya bona, gomme o diriše nako ye go matlafatša segwera sa gago le Jehofa.—1 Samuele 2:26.

 [Lepokisi go letlakala 308, 309]

Letlakala la go Itlhahloba

Na o Nagana ka go Kolobetšwa?

Lekola tšwelopele ya gago ka go hlahloba dipotšišo le mafoko ao a lego ka mo tlase. Kgonthišetša gore o bala mangwalo ao a bontšhitšwego pele o ka ngwala dikarabo tša gago.

O bontšha ka ditsela dife gore gona bjale o holofetše Jehofa?—Psalme 71:5. ․․․․․

O bontšhitše bjang gore matla a gago a go hlatha a tlwaeditšwe go kgethologanya se se nepagetšego le se se fošagetšego?—Baheberu 5:14. ․․․․․

O rapela gakae? ․․․․․

O rapela ka eng, gona dithapelo tša gago di utolla’ng ka go rata ga gago Jehofa?—Psalme 17:6. ․․․․․

Ka mo tlase, ngwala dipakane le ge e le dife tšeo o ka ratago go ipeela tšona mabapi le dithapelo tša gago. ․․․․․

Na o ithuta Beibele ka mehla?—Joshua 1:8. ․․․․․

Ke dilo dife tšeo o di akaretšago thutong ya gago ya motho ka noši? ․․․․․

 Ka mo tlase, ngwala dipakane le ge e le dife tšeo o ka ratago go ipeela tšona mabapi le thuto ya motho ka noši. ․․․․․

Na bodiredi bja gago bo a atlega? (Ka mohlala: Na o ka kgona go hlalosetša batho ba bangwe dithuto tša motheo tša Beibele? Na o boela go bao ba bontšhitšego kgahlego bodireding? Na o dira boiteko bja go swara thuto ya legae ya Beibele?)

□ Ee □ Aowa

Na o kgona go ya bodireding gaešita le ge batswadi ba gago ba sa ye?—Ditiro 5:42.

□ Ee □ Aowa

Ka mo tlase, ngwala dipakane le ge e le dife tšeo o ka ratago go ipeela tšona mabapi le bodiredi.—2 Timotheo 2:15. ․․․․․

Na o ka bolela gore o ba gona dibokeng tša Bokriste ka mehla goba o a etela?—Baheberu 10:25. ․․․․․

O tšea karolo ka ditsela dife dibokeng? ․․․․․

Na o kgona go ya dibokeng ge batswadi ba gago ba sa ye (ge feela ba go dumelela go ya o nnoši)?

□ Ee □ Aowa

Na o ka bolela gore o tloga o thabela go dira thato ya Modimo?—Psalme 40:8.

□ Ee □ Aowa

Na o ka ngwala dinako tšeo ka tšona o ilego wa kgona go ganetša kgateletšo ya dithaka?—Baroma 12:2. ․․․․․

O rulagantše go dira’ng gore o boloke lerato leo o ratago Jehofa ka lona le le matla?—Juda 20, 21. ․․․․․

Na o tla hlankela Jehofa gaešita le ge batswadi ba gago le bagwera ba ka kgaotša go dira bjalo?—Mateo 10:36, 37.

□ Ee □ Aowa

[Seswantšho go letlakala 310]

Go swana le lenyalo, kolobetšo ke kgato yeo e fetošago bophelo—ga se ya swanela go tšewa gabohwefo