Ka morago ga lenyalo la kua Kana, Jesu o leba Kaperenaume. Mmago Jesu le banababo ka motswadi o tee—Jakobo, Josefa, Simone le Judase—ba sepela le yena.

Eupša ke ka baka la’ng Jesu a eya Kaperenaume? Motse wo o eme mo o bonagalago go feta wa Natsaretha goba wa Kana gomme go bonagala e le o mogolwanyana. Le gona, barutiwa ba Jesu ba bantši bao a sa tšwago go ba hwetša ba dula Kaperenaume goba kgauswi le yona. Ka gona Jesu a ka ba tlwaetša ka tsela e itšego tikologong ya gabo bona.

Ge a le Kaperenaume, Jesu gape o dira mediro e makatšago. Ka gona batho ba bantši ba motseng le ba tikologong ya kgauswi ba kwa ka dilo tšeo a di dirago moo. Eupša Jesu le bagwera ba gagwe, e lego banna ba ineetšego ba Bajuda, kgauswinyane ba swanetše go wela tsela ba ye Jerusalema Pasekeng ya 30 C.E.

Ge ba le tempeleng kua Jerusalema, barutiwa ba Jesu ba bona selo se sengwe seo se kgahlišago kudu ka Jesu, seo se fapanego le seo ba se bonego peleng.

Molao wa Modimo o laela Baisiraele go dira dihlabelo tša diphoofolo tempeleng, gomme baeti ba nyaka dijo nakong ya ge ba le moo. Ka gona Molao o dumelela bao ba yago Jerusalema go tšwa mafelong a kgole gore ba tle le tšhelete ya go reka “dikgomo, dinku, dipudi,” le dilo tše dingwe tšeo di nyakegago ge ba le moo motseng. (Doiteronomio 14:24-26) Ka baka leo, barekiši kua Jerusalema ba rekišetša diphoofolo goba dinonyana ka lapeng le legolo la tempele. Le gona ba bangwe ba bona ba hlalefetša batho ka go ba lefiša tšhelete e ntši kudu.

A galefile kudu, Jesu o kgothola ditšhelete tša tšhipi tša baananyi, a phekgola ditafola tša bona gomme a raka banna bao. Ke moka Jesu o re: “Tlošang dilo tše mo! Tlogelang go dira ntlo ya Tate ntlo ya thekišetšo!”—Johane 2:16.

Ge barutiwa ba Jesu ba bona se, ba gopola boporofeta bjo bo lego mabapi le Morwa wa Modimo bjo bo rego: “Ke tla jewa ke phišego ya ntlo ya gago.” Eupša Bajuda ba a botšiša ba re: “Ka ge o dira dilo tše, ke pontšho efe ye o ka re bontšhago yona?” Jesu o a araba o re: “Phušolang tempele ye gomme ke tla e tsoša ka matšatši a mararo.”—Johane 2:17-19; Psalme 69:9.

Bajuda ba nagana gore Jesu o bolela ka tempele ya kgonthe kua Jerusalema, ka gona ba botšiša ba re: “Tempele ye e agilwe ka nywaga e masomenne-tshela, fela na wena o re o tla e tsoša ka matšatši a mararo?” (Johane 2:20) Lega o le bjalo, Jesu o bolela ka mmele wa gagwe e le tempele. Ka morago ga nywaga e meraro, barutiwa ba gagwe ba gopola mantšu a ge a tsošitšwe bahung.