GO ILE gwa feta nywaga e mebedi Josefa a sa le kgolegong. Motšheladino yola o be a se a mo gopola. Bošegong bjo bongwe, Farao o ile a lora ditoro tše pedi tše di makatšago gomme a rata go tseba seo di se bolelago. Na o a mmona ge a robetše mo seswantšhong? Mesong e latelago, Farao o ile a bitša banna ba gagwe ba bohlale gomme a ba botša dilo tšeo a di lorilego. Eupša ba ile ba palelwa ke go mmotša seo se bolelwago ke ditoro tša gagwe.

Mo nakong ye motšheladino o ile a gopola Josefa. O ile a re go Farao: ‘Ge ke be ke le kgolegong, go be go na le motho yo a itšego yo a bego a kgona go hlatholla ditoro.’ Farao o ile a laela gore Josefa a ntšhwe kgolegong ka yona nako yeo.

Farao a botša Josefa ditoro tša gagwe a re: ‘Ke bone dikgomo tše šupago tše dibotse tša go nona. Ka morago ka bona dikgomo tše dingwe tše šupago tša go befa e bile di otile kudu. Ke moka dikgomo tšela tša go ota tša ja tšela tša go nona.

‘Torong ya ka ya bobedi ke bone diako tše šupago tše di tletšego tša korong e budulego di etšwa lehlakeng letee. Ka morago ga moo ka bona le diako tše disesane tše šupago tša korong tša go omelela. Ke moka diako tšeo tše disesane tša metša diako tšela tše šupago tše dibotse.’

Josefa a re go Farao: ‘Ditoro tše tše pedi di na le tlhathollo e tee. Dikgomo tše šupago tša go nona le diako tše šupago tša korong tše di tletšego di bolela nywaga e šupago gomme dikgomo tše šupago tša go ota le diako tše šupago tša korong tše di omeletšego di bolela nywaga e mengwe e šupago. Go tla ba le nywaga e šupago yeo ka yona go tlago go mela dijo tše dintši kudu Egipita. Ka morago ga moo go tla ba le nywaga e mengwe e šupago ya tlala.’

Bjale Josefa a re go Farao: ‘Kgetha monna yo bohlale gomme o mmee gore a okamele modiro wa go kgoboketša dijo nywageng e šupago ya mokhora. Ka go re’alo batho ba ka se bolawe ke tlala nywageng e šupago ya tlala yeo e tlago go latela.’

Farao a rata kgopolo yeo. A kgetha Josefa gore a kgoboketše dijo gomme a di boloke. Josefa o ile a latela Farao ka go ba maemong a phagamego kudu Egipita.

Ka morago ga nywaga e seswai, nakong ya tlala, Josefa o ile a bona banna ba bangwe ba etla. Na o a tseba gore e be e le bomang? E be e le bomogolwagwe ba 10. Tatago bona e lego Jakobo o be a ba romile Egipita ka gobane ba be ba felelwa ke dijo kua Kanana. Josefa o ile a tseba bana babo, eupša bona ba se ke ba mo tseba. Na o a tseba gore ke ka baka la’ng ba sa ka ba mo tseba? Ke ka gobane Josefa o be a godile e bile a apere diaparo tša mohuta o mongwe.

Josefa o ile a gopola gore ge e be e sa le mošemane o ile a lora bana babo ba etla gomme ba mo khunamela. Akere o a gopola o bala ka seo. Ka gona Josefa a lemoga gore ke Modimo yo a mo rometšego Egipita gomme e le ka lebaka le lebotse. O nagana gore Josefa o tla dira’ng? Anke re bone.

Genesi 41:1-57; 42:1-8; 50:20.