1, 2. Ke ka baka la’ng Jehofa a thaba ge a bona maiteko a rena a go ba ba botegago? Bontšha.

MMA le mošemanyana wa gagwe ba tšwa gotee ka lebenkeleng. Gateetee mošemanyana yoo o a ema gomme sefahlego sa gagwe se aparetšwe ke letšhogo. Ka letsogong la gagwe, o swere sebapadišwa se senyenyane seo a se tšerego ka lebenkeleng. O lebetše go se bušetša morago goba go kgopela mmagwe gore a mo rekele sona. O tlalelong gomme o llela mmagwe gore a mo thuše. Mmagwe o mmotša gore a se tshwenyege e bile o boela le yena lebenkeleng leo e le gore a ka bušetša sebapadišwa seo gomme a kgopele tshwarelo. Ge a dutše a dira bjalo, mmagwe o tloga a thabile. Ka baka la’ng?

² Batswadi ka mehla ba thabišwa ke go bona bana ba bona ba ithuta bohlokwa bja potego. Le gona go bjalo le ka Tatago rena wa legodimong, e lego “Modimo wa therešo.” (Psalme 31:5) Ge a bona re dutše re gola moyeng, o kgahlwa ke go bona re katanela go botega. Ka ge re nyaka go mo kgahliša le go dula leratong la gagwe, re bontšha maikwelo ao moapostola Paulo a a boletšego ge a re: “Re rata go itshwara ka go botega dilong tšohle.” (Baheberu 13:18) Anke re eleng hloko dibopego tše nne tše bohlokwa tšeo ka dinako tše dingwe re ka hwetšago go le thata gore re botege. Ke moka re tla ahlaahla e mengwe ya mehola yeo e tlišwago ke go botega.

3-5. (a) Lentšu la Modimo le re lemoša bjang ka dikotsi tša go iphora? (b) Ke’ng seo se ka re thušago go itlhahloba go bona ge e ba re botega?

³ Tlhohlo ya rena ya pele ke go ithuta gore re be ba botegago.  Ka ge re le batho bao ba sa phethagalago, go bonolo kudu go iphora. Ka mohlala, Jesu o ile a botša Bakriste ba Laoditsea gore ba ile ba iphora ka go nagana gore ba be ba humile, mola ge e le gabotse ba be ba ‘diila, ba foufetše gomme ba hlobotše’ moyeng​—e lego boemo bjo bo šokišago e le ruri. (Kutollo 3:17) Go iphora ga bona go ile gwa dira gore boemo bja bona e be bjo kotsi kudu.

⁴ Le gona o ka gopola gore morutiwa Jakobo o ile a lemoša ka gore: “Ge e ba motho a ipotša gore o rapela Modimo ka tsela ya kgonthe eupša a sa laole leleme la gagwe bjalo ka ge eka ke ka tomo, gona o fora pelo ya gagwe gomme borapedi bja gagwe ke bja lefeela.” (Jakobo 1:26) Ge e ba re be re ka nagana gore re ka diriša leleme la rena gampe gomme ra tšwela pele re rapela Jehofa ka tsela e amogelegago, re tla ba re forile pelo ya rena. Borapedi bja rena go Jehofa e be e tla ba bja lefeela, e lego go itshenyetša nako ka mo go feletšego. Ke’ng seo se ka re thibelago go latela tsela e bjalo e gobatšago?

⁵ Ditemaneng tšona tšeo, Jakobo o swantšha therešo ya lentšu la Modimo le seipone. O re kgothaletša gore re lebeledišiše molaong wa Modimo o phethagetšego le go dira diphetogo tše di nyakegago. (Bala Jakobo 1:23-25) Beibele e ka re thuša gore re itlhahlobe go bona ge e ba re botega le go bona seo re swanetšego go se dira go kaonafatša dilo. (Dillo tša Jeremia 3:40; Hagai 1:5) Le gona re ka rapela Jehofa gomme ra mo kgopela gore a re hlahlobe, a re thuše go bona le go lokiša mafokodi le ge e le afe a magolo ao re nago le ona. (Psalme 139:23, 24) Go se botege ke bofokodi bjo bo utegilego gomme re swanetše go bo lebelela ka tsela yeo Tatago rena wa legodimong a bo lebelelago ka yona. Diema 3:32 e re: “Motho wa moradia o šišimiša Jehofa, eupša Modimo o gwerana kgauswi le baloki.” Jehofa a ka re thuša go ikwa ka tsela yeo a ikwago ka yona le go ipona ka tsela yeo a re bonago ka yona. Gopola gore Paulo o itše: “Re rata go itshwara ka go botega.” Re ka se be bao ba phethagetšego gona bjale, eupša re tloga re kganyoga go dula re botega go tšwa pelong.

6. Ke ka baka la’ng go nyakega gore banyalani ba botegelane, gomme ke dikotsi dife tšeo ba di phemago ka go dira bjalo?

⁶ Potego e swanetše go ba seka seo se hlaolago lapa la Bokriste. Ka gona, monna le mosadi ba swanetše go boledišana ka bolokologi le ka potego. Lenyalong la Mokriste ga se gwa swanela go ba le mekgwa e gobatšago le e sa hlwekago e bjalo ka go bapala ka maikwelo a lerato le motho le ge e le ofe yo e sego molekane wa gago wa lenyalo, go hlagolela ditswalano tša sephiri ka Inthanete goba go diriša diswantšho tše di kgothaletšago bootswa ka sebopego le ge e le sefe. Bakriste ba bangwe bao ba lego lenyalong ba ile ba kopanela boitshwarong bjo bjalo bjo fošagetšego mola ba bo utela molekane yo a se nago molato. Go dira bjalo go bontšha go se botege. Ela hloko mantšu a Kgoši e botegago Dafida a rego: “Ga se ka dula le batho ba maaka; ga ke tsene mo go nago le bao ba utago seo ba lego sona.” (Psalme 26:4) Ge e ba o le lenyalong, le ka mohla o se ke wa kopanela boitshwarong bjoo bo ka dirago gore o leke go uta seo o lego sona go molekane wa gago!

7, 8. Ke mehlala efe ya ka Beibeleng yeo e ka thušago bana go ithuta bohlokwa bja go botega?

⁷ Batswadi ba bontšha bohlale ka go diriša mehlala ya Beibele ge ba ruta bana ba bona ka bohlokwa bja go botega. Go na le dipego tša mehlala ya go se botege e bjalo ka ya Akane, yo a ilego a utswa gomme a leka go uta dilo tšeo a di utswitšego; Gehasi, yo a ilego a bolela maaka e le gore a holege ka tša ditšhelete; gotee le  Judase, yo a ilego a utswa le go bolela maaka a mašoro ka go gobatša Jesu.​—Joshua 6:17-19; 7:11-25; 2 Dikgoši 5:14-16, 20-27; Mateo 26:14, 15; Johane 12:6.

⁸ Ka lehlakoreng le lengwe, go na le dipego tša mehlala e mebotse ya go botega e bjalo ka ya Jakobo, yoo a ilego a kgothaletša barwa ba gagwe go bušetša tšhelete yeo ba e hweditšego ka mekotleng ya bona ka baka la gore o be a nagana gore mohlomongwe e ile ya tsentšhwa moo ka phošo; le mohlala wa Jefeta le morwedi wa gagwe, yo a ilego a hlompha keno ya tatagwe ka boikgafo bjo bogolo; le wa Jesu, yoo ka sebete a ilego a itsebatša pele ga sehlopha se sešoro sa bahlolampherefere e le gore boporofeta bo phethagatšwe gotee le go šireletša bagwera ba gagwe. (Genesi 43:12; Baahlodi 11:30-40; Johane 18:3-11) Mehlala ye e sego kae e ka nea batswadi tsebišo e bohlokwa e hwetšagalago ka Lentšung la Modimo, gomme seo se ka ba thuša go ruta bana ba bona go rata le go tšeela potego godimo.

9. Batswadi ba swanetše go phema’ng ge e ba ba nyaka go beela bana ba bona mohlala wa potego, gomme ke ka baka la’ng mohlala o bjalo o le bohlokwa?

⁹ Thuto e bjalo e nea batswadi boikarabelo bjo bohlokwa. Moapostola Paulo o ile a botšiša gore: “Lega go le bjalo, na wena o rutago yo mongwe, ga o ithute? Wena yo a bolelago gore: “O se ke wa utswa,” na o a utswa?” (Baroma 2:21) Batswadi ba bangwe ba dira gore bana ba bona ba gakanege ka go ba ruta gore ba botege mola bona ba sa botege. Ba ka ba ba lokafatša go utswa dilo tše dinyenyane le go bolela maaka ka gore: “Go ba gona, beng ba lebenkele, kgwebo goba mokgatlo o itšego ba letetše gore batho ba tšee dilo tše” goba ba ka re: “E be e fo ba maakanyana a sa rego selo.” Go bolela therešo, bohodu ke bohodu, go sa šetšwe gore selo seo motho a se utswitšego ke se senyenyane gakaakang, le gore maaka ke maaka go sa šetšwe gore ke a makaakang. * (Bala Luka 16:10) Bana  ba akgofa go bona boikaketši gomme bo ka ba gobatša kudu. (Baefeso 6:4) Lega go le bjalo, ge ba ithuta potego ka go latela mehlala ya batswadi ba bona, go ka direga gore ba godiše Jehofa lefaseng le le le sa botegego.​—Diema 22:6.

10. Ke ditemošo dife tšeo re swanetšego go di ela hloko ge re boledišana ka potego le badumedigotee le rena?

¹⁰ Go kopanela le Bakristegotee le rena go re nea dibaka tše dintši tša gore re hlagolele potego. Ka ge re ithutile go Kgaolo 12, re swanetše go ba šedi tseleng yeo re dirišago mpho ya rena ya go bolela, kudukudu ge re na le bana babo rena le dikgaetšedi tša moya. Go fo ipolelela ditaba go ka fetoga lesebo le kotsi gabonolo gaešita le go thomeletša! Ge e ba re bolela ka taba yeo re sa kgonthišegego ka yona, re ka ba re thuša go phatlalatša maaka, ka gona go kaone gore re ele molomo wa rena hloko. (Diema 10:19) Ka lehlakoreng le lengwe, re ka ba re tseba selo se itšego e le sa kgonthe, eupša seo ga se bolele gore re swanetše go bolela ka sona. Ka mohlala, go ka direga gore taba yeo ga e nyake rena, goba go ka se bontšhe botho go bolela ka yona. (1 Bathesalonika 4:11) Batho ba bangwe ba lokafatša go hloka ga bona botho ka go bolela gore ke potego, eupša ka mehla mantšu a rena a swanetše go dula e le a kgahlišago le a nago le botho.​—Bala Bakolose 4:6.

11, 12. (a) Ke ka ditsela dife batho ba bangwe bao ba dirago sebe se segolo ba thatafatšago boemo bjoo? (b) Ke maaka afe ao Sathane a a kgothaletšago ka dibe tše dikgolo, gomme re ka lwantšhana bjang le ona? (c) Re ka bontšha bjang gore re botegela mokgatlo wa Jehofa?

¹¹ Go bohlokwa kudu gore re botegele bao ba etelelago pele  ka phuthegong. Batho ba bangwe bao ba ilego ba dira sebe se segolo ba thatafatša boemo bjoo ka go leka go bipa sebe sa bona le go botša bagolo ba phuthego maaka ge ba botšišwa ka sona. Batho ba bjalo ba ile ba ba ba thoma go phela maphelo a mabedi, ba itira eka ba hlankela Jehofa mola ba phegelela tsela ya go dira sebe se segolo. Ge e le gabotse, tsela e bjalo e dira gore bophelo bja motho e be bja bofora. (Psalme 12:2) Batho ba bangwe ba botša bagolo karolo e itšego ya therešo mola ba uta ditaba tše bohlokwa. (Ditiro 5:1-11) Gantši go se botege mo go bjalo go thoma ka go dumela maaka ao Sathane a a kgothaletšago.​—Bona lepokisi le rego:  “Maaka a Sathane Mabapi le Dibe tše Dikgolo,” go matlakala 164-165.

¹² Le gona go bohlokwa gore re botegele mokgatlo wa Jehofa ge re araba dipotšišo tšeo di ngwadilwego fase. Ka mohlala, ge re bega bodiredi bja rena bja tšhemo, re swanetše go kgonthiša gore re bolela therešo. Ka mo go swanago, ge re tlatša kgopelo ya tokelo ya tirelo e itšego, le ka mohla ga se ra swanela go nea tsebišo e sa nepagalago mabapi le boemo bja rena bja kgonthe bja tša maphelo goba sebopego le ge e le sefe sa bophelo bja rena.​—Bala Diema 6:16-19.

13. Re ka kgomarela bjang potego ge e ba re tsenela kgwebo le modumedigotee le rena?

¹³ Potego ya rena go badumedigotee le rena e akaretša le ditabeng tša kgwebo. Ka dinako tše dingwe, bana babo rena le dikgaetšedi ba Bakriste ba ka tsenela kgwebo gotee. Ba swanetše go ba šedi gore ditaba tše bjalo di se tsenatsenane le borapedi bja bona bjoo bo dirwago Holong ya Mmušo goba bodireding bja tšhemo. Tswalano e bjalo ya kgwebo e ka ba e swanago le ya magareng ga mothwadi le mothwalwa. Ge e ba re thwala bana babo rena goba dikgaetšedi, re swanetše go ba šedi gore re ba swara ka potego, ka go ba lefelela ka nako, ka go ba nea tšhelete yeo le dumelelanego ka yona le ditshwanelo tšeo di rulagantšwego goba tšeo di nyakegago go ya ka molao. (1 Timotheo 5:18; Jakobo 5:1-4) Ka lehlakoreng le lengwe, ge e ba re thwetšwe ke ngwanabo rena goba kgaetšedi, re swanetše go phetha modiro woo o sepedišanago le mogolo wa rena.  (2 Bathesalonika 3:10) Ga se ra letela gore re swarwe ka tsela e itšego e kgethegilego ka baka la tswalano ya rena ya moya, e le bjalo ka ge eka mothwadi wa rena o gapeletšega gore a re nee nako e oketšegilego ya go ikhutša, ditshwanelo goba dilo tše dingwe tšeo di sa hwetšwego ke bašomi ba bangwe.​—Baefeso 6:5-8.

14. Ge Bakriste ba tsenela kgwebo ya mohlakanelwa, ke mogato ofe o bohlale woo ba ka o gatago, le gona ka baka la’ng?

¹⁴ Go thwe’ng ge e ba kgwebo ya rena e le ya mohlakanelwa, mohlomongwe e akaretša go dira dipeeletšo goba kadimo ya tšhelete? Beibele e nea molao wa motheo o bohlokwa le o holago ka gore: Ngwalang tumelelano! Ka mohlala, ge Jeremia a be a reka tšhemo, o ile a ngwala lengwalo la bohlatse leo le nago le dihlatse, gomme a le boloka lefelong le le šireletšegilego e le gore a ka le diriša nakong e tlago. (Jeremia 32:9-12; bona le Genesi 23:16-20.) Ge o tsenela kgwebo le badumedigotee le wena, go ngwala fase dilo ka botlalo lengwalong leo le lokišeditšwego, leo le saennwego gotee le leo le nago le dihlatse ga go bolele gore ga le botane. Go e na le moo, go thuša go thibela go se kwešišane, go nyama gotee le go se dumelelane mo go ka tšwelelago gomme gwa baka dikarogano. Bakriste le ge e le bafe bao ba tsenelago kgwebo gotee ba swanetše go dula ba gopola gore ga go kgwebo le ge e le efe yeo e swanetšego go senya botee le khutšo ya phuthego. *​—1 Bakorinthe 6:1-8.

15. Jehofa o ikwa bjang ka mekgwa ya kgwebo e sa botegego, gomme Bakriste ba swanetše go arabela bjang mekgweng e bjalo e tlwaelegilego?

¹⁵ Potego ya Mokriste ga se ya lekanyetšwa feela ka phuthegong. Paulo o itše: “Re rata go itshwara ka go botega dilong tšohle.” (Baheberu 13:18) Mmopi wa rena o nyaka gore re botege ditabeng tša lefase tša kgwebo. Ka pukung ya Diema feela, go bolelwa gane ka dikala tša bofora. (Diema 11:1; 16:11; 20:10, 23) Mehleng ya bogologolo, go be go tlwaelegile go diriša  dikala ditabeng tša kgwebo e le gore go elwe boima bja dilo tšeo di rekilwego le tšhelete yeo e bego e dirišwa go reka dilo tšeo. Barekiši ba sa botegego ba be ba ka diriša mehuta e mebedi ya dikala le sekala seo se sa nepagalago e le gore ba ka fora le go hlalefetša bareki ba bona. * Jehofa o hloile ditiro tše bjalo! E le gore re dule leratong la gagwe, re swanetše go phema ka gohle mekgwa le ge e le efe e sa botegego ya kgwebo.

16, 17. Ke dibopego dife tša go se botege tšeo di tlwaelegilego lefaseng lehono, gomme Bakriste ba therešo ba ikemišeditše go dira’ng?

¹⁶ Ka ge Sathane e le mmuši wa lefase le, ga re makatšwe ke gore re aparetšwe ke go se botege. Letšatši le lengwe le le lengwe re ka lebeletšana le diteko tša gore re se botege. Ge batho ba tlatša mangwalo a go kgopela mošomo, go tlwaelegile gore ba ngwale maaka, ba feteletše dilo, ba itlhamele dilo tšeo ba rego ba kgona go di dira gomme ba be ba bolele maaka ka boitemogelo bja bona. Ge batho ba tlatša difomo tša go huduga, tša metšhelo, tša inšurense, bjalobjalo, gantši ba nea dikarabo tša bofora e le gore ba hwetše seo ba se nyakago. Barutwana ba bantši ga ba botege ditlhahlobong, goba ge ba ngwala ditaodišo le dipego tša sekolong ba ka ya Inthaneteng gomme ba tšea selo seo ba se hweditšego moo, ke moka ba ngwalolla modiro wa motho yo mongwe go le bjalo ka ge eka o tšweleditšwe ke bona. Le gona ge batho ba dirišana le bahlankedi ba sa botegego, gantši ba ba nea letsogo-le-kobong e le gore ba hwetše seo ba se nyakago. Ga re makale ge re bona boitshwaro bjo bo bjalo lefaseng leo batho ba bantši e lego “baithati, barati ba tšhelete . . . [le] ba go se rate go loka.”​—2 Timotheo 3:1-5.

¹⁷ Bakriste ba therešo ba ikemišeditše go se kopanele mekgweng yeo. Ka dinako tše dingwe seo se dirago gore potego e be tlhohlo ke gore bao ba phelago ka ditsela tše bjalo tša go se botege go bonagala ba atlega gaešita le go hwetša mehola  lefaseng la lehono. (Psalme 73:1-8) Go sa dutše go le bjalo, Bakriste ba ka goga ka kgara ditabeng tša ditšhelete ka baka la go nyaka go dula ba botega “dilong tšohle.” Na seo se swanelwa ke boikgafo bjoo? Ruri go bjalo! Eupša ka baka la’ng? Ke ditšhegofatšo dife tšeo di tlišwago ke go itshwara ka potego?

18. Ke ka baka la’ng go ba le botumo bja go botega go le bohlokwa kudu?

¹⁸ Ga go na selo se bohlokwa bophelong go feta go tsebja o le motho yo a botegago. (Bona lepokisi le rego:  “Na ke Botega Gakaaka’ng?”.) Le gona akanya ka se​—motho yo mongwe le yo mongwe a ka itirela botumo bjo bjalo! Ga se gwa ithekga ka bokgoni bja gago, lehumo, ponagalo, boemo bja gago setšhabeng goba selo le ge e le sefe seo o ka se kego wa se laola. Lega go le bjalo, batho ba bantši ba palelwa ke go itirela botumo bjo bobotse. Ke selo seo se sa tlwaelegago. (Mika 7:2) Batho ba bangwe ba ka go kwera ka baka la go botega ga gago, eupša ba bangwe ba tla tšeela godimo potego ya gago e bile ba tla go bota le go go hlompha. Dihlatse tše dintši tša Jehofa di ile tša hwetša gore potego ya tšona e ile ya di tlišetša mehola ya tša ditšhelete. Ga se tša loba mešomo ya tšona ya boiphedišo ge bašomi bao ba sa botegego ba be ba rakwa, goba di ile tša hwetša mošomo ge bašomi ba botegago ba be ba tloga ba nyakega.

19. Tsela ya bophelo ya potego e ka kgoma bjang letswalo la rena le tswalano ya rena le Jehofa?

¹⁹ Go sa šetšwe gore seo se a go diragalela goba go se bjalo, o tla hwetša gore potego e tliša mehola e megolo. O tla ba le letswalo le le hlwekilego. Paulo o ngwadile gore: “Re holofela gore re na le letswalo le botegago.” (Baheberu 13:18) Go feta moo, botumo bja gago bo tla lemogwa ke Tatago rena yo lerato wa legodimong, e bile o rata batho bao ba botegago. (Bala Psalme 15:1, 2; Diema 22:1) Ee, go ba yo a botegago go go thuša gore o dule leratong la Modimo, le gona re ka se hwetše moputso o fetago woo. Anke re hlahlobeng taba e tswalanego le yeo: Pono ya Jehofa ka mošomo.