Ke neng le gona ka baka la’ng mosadi wa Mokriste a swanetšego go rwala hlogong ditabeng tšeo di sepedišanago le borapedi bja gagwe? Anke re hlahlobeng mantšu a buduletšwego a moapostola Paulo tabeng ye. O re nea tlhahlo e nyakegago e le gore re dire diphetho tše di swanetšego, tšeo di godišago Modimo. (1 Bakorinthe 11:3-16) Paulo o utolla dibopego tše tharo tše di swanetšego go sekasekwa: (1) mediro yeo e nyakago gore mosadi a rwale hlogong, (2) maemo ao mosadi a swanetšego go dira bjalo ge a le go ona le (3) mabaka a gore a latele tekanyetšo ye.

Mediro. Paulo o bolela ka e mebedi: thapelo le go porofeta. (Ditemana 4, 5) Go ba gona, thapelo ke go bolela le Jehofa ka tsela ya borapedi. Lehono, go porofeta go akaretša modiro le ge e le ofe wa go ruta woo o theilwego Beibeleng wo o dirwago ke modiredi wa Mokriste. Lega go le bjalo, na Paulo a ka be a bolela gore mosadi o swanetše go rwala hlogong ka mehla ge a rapela goba a ruta therešo ya Beibele? Aowa. Boemo bjo mosadi a rapelago goba a rutago a le go bjona bo dira phapano ya ge e ba a swanetše go rwala hlogong.

Maemo. Mantšu a Paulo a bolela ka maemo, goba mafelo a mabedi ao ditiro tše di dirwago go ona​—lapeng le phuthegong. O re: “Hlogo ya mosadi yona ke monna . . . Mosadi yo mongwe le yo mongwe yo a rapelago goba a porofetago a sa rwala hlogong  o nyatšiša hlogo ya gagwe.” (Ditemana 3, 5) Thulaganyong ya lapa, monna wa mosadi ke yena yo Jehofa a mo kgethago gore e be hlogo ya mosadi yoo. Ge a sa lemoge bolaodi bja monna wa gagwe, o tla nyatšiša monna wa gagwe ge e ba a ka dira boikarabelo bjo Jehofa a bo abetšego monna. Ka mohlala, ge e ba a ka swanelwa ke gore a sware thuto ya Beibele monna wa gagwe a le gona, o tla bontšha go hlompha bolaodi bja monna ka gore a rwale hlogong. O tla dira se go sa šetšwe gore monna o kolobeditšwe goba go se bjalo, ka ge e le hlogo ya lapa. * Ge e ba a swanetše go rapela goba go ruta mola morwa wa gagwe yo a kolobeditšwego a le gona, ka mo go swanago o tla swanelwa ke go rwala hlogong, e se ka baka la gore morwa yoo ke hlogo ya lapa, eupša ka baka la boikarabelo bjo bo neilwego ditho tše ditona tša phuthego ya Bokriste.

Paulo o bolela ka thulaganyo ya phuthego, ka gore: “Ge e ba motho le ge e le ofe a nyaka go lwela motlwae o mongwe, le mmotše gore rena le diphuthego tša Modimo ga re na motlwae o mongwe.” (Temana 16) Ka phuthegong ya Bokriste, bohlogo bo newa batho ba batona bao ba kolobeditšwego. (1 Timotheo 2:11-14; Baheberu 13:17) Ke batho ba batona feela bao ba kgethwago gore e be bagolo le bahlanka ba bodiredi gore ba phethe boikarabelo bjo Modimo a ba neilego bjona bja go hlokomela mohlape wa Gagwe. (Ditiro 20:28) Lega go le bjalo, maemo a ka dira gore mosadi wa Mokriste a dire modiro woo gantši o dirwago ke motho yo motona yo a swanelegago yo a kolobeditšwego. Ka mohlala, go ka nyakega gore a sware seboka sa tirelo ya tšhemo ka gobane motho yo motona yo a swanelegago yo a kolobeditšwego a sa hwetšagale goba a se gona. Goba ge a sepela a na le motho yo a kolobeditšwego e motona, a ka swara thuto ya legae ya Beibele yeo a e rulagantšego e sa le pele. Ka ge mediro ye e le karolo ya mediro yeo e dirwago ka phuthegong ya Bokriste, o tla rwala hlogong go bontšha gore o phetha boikarabelo bjoo gantši bo abelwago motho yo motona.

Ka lehlakoreng le lengwe, dibopegong tše dintši tša borapedi  ga go nyakege gore kgaetšedi a rwale hlogong. Ka mohlala, a ka no se rwale hlogong ge a nea tlhaloso dibokeng tša Bokriste, ge a le bodireding bja ntlo le ntlo le monna wa gagwe goba motho yo mongwe yo a kolobeditšwego yo motona, goba ge a ithuta goba a rapela le bana ba gagwe ba sa kolobetšwago. Therešo ke gore go ka ba le dipotšišo tše dingwe tšeo di rotogago, gomme ge e ba kgaetšedi a sa kgonthišege ka taba yeo, a ka dira nyakišišo e oketšegilego. * Ge e ba a sa kgonthišege le gona ge e ba letswalo la gagwe le mo tutueletša go dira bjalo, e ka se be phošo gore a rwale hlogong, go swana le ge go bontšhitšwe seswantšhong seo se lego mo.

Mabaka. Go temana ya 10, re hwetša mabaka a mabedi ao mosadi wa Mokriste a ka swanelwago ke go rwala hlogong: “Mosadi [o swanelwa] ke go ba le seka sa go laolwa hlogong ya gagwe ka baka la barongwa.” Sa pele, ela hloko polelwana e rego “seka sa go laolwa.” Go rwala hlogong ke tsela yeo mosadi a bontšhago gore o hlompha bolaodi bjo Jehofa a bo neilego batho ba batona bao ba kolobeditšwego ka phuthegong. Ka go dira bjalo, o bontšha gore o rata Jehofa Modimo le go mmotegela. Lebaka la bobedi le hwetšwa mantšung ao a rego: “Ka baka la barongwa.” Mosadi o kgoma bjang dibopiwa tšeo tše matla tša moya ka go rwala hlogong?

Barongwa ba thabela go bona gore bolaodi bja Modimo bo a godišwa mokgatlong wa Jehofa ka moka, kua legodimong le mo lefaseng. Le gona ba holwa ke mehlala ya batho ba sa phethagalago ge go tliwa tabeng ye. Go feta moo, le bona ba swanetše go ikokobeletša thulaganyo ya Jehofa—yona teko yeo e fentšego barongwa ba bantši dinakong tšeo di fetilego. (Juda 6) Go ka  direga gore barongwa ba bone mosadi wa Mokriste a na le phihlelo e ntši, tsebo e ntši e bile a le bohlale kudu go feta motho yo a kolobeditšwego yo motona ka phuthegong; lega go le bjalo, mosadi yoo a hlomphe bolaodi bja motho yoo yo motona ka ntle le go dikadika. Mabakeng a mangwe, mosadi yoo ke Mokriste yo a tloditšwego yo ka morago a tlago go ba yo mongwe wa bajabohwagotee le Kriste. Mosadi yoo mafelelong o tla hlankela boemong bjo bo phagametšego bjoo barongwa ba lego go bjona gomme a buša le Kriste legodimong. A mohlala o mobotse gakaakang wo barongwa ba ka ithutago go wona lehono! Ka kgonthe, dikgaetšedi ka moka di na le tokelo ya go bontšha boikokobetšo boitshwarong bja tšona bja go botega le go ikokobetša pele ga barongwa ba dimilione ba botegago!