Go Wena yo a Ratago Jehofa:

Jesu o itše: “Le tla tseba therešo gomme therešo e tla le lokolla.” (Johane 8:32) Mantšu ao a tloga a kgothatša e le ruri! Ee, go a kgonega gore motho a tsebe therešo le mo “mehleng [ye] ya bofelo” e hlobaetšago moo maaka le bofora di atilego. (2 Timotheo 3:1) Na o sa gopola ge o be o lemoga ka lekga la pele therešo yeo e hlaloswago ka Lentšung la Modimo? Yeo e swanetše go ba e bile phihlelo e kgahlišago!

Lega go le bjalo, go swana le ge go le bohlokwa gore re be le tsebo e nepagetšego ya therešo le go e abela ba bangwe ka mehla ka go ba botša yona, re swanetše go itshwara ka tsela yeo e dumelelanago le therešo. Gore re dire seo, re swanetše go dula leratong la Modimo. Seo se akaretša’ng? Mantšu ao Jesu a a boletšego bošegong bja pele ga lehu la gagwe a araba potšišo ye. O boditše baapostola ba gagwe ba botegago gore: “Ge e ba le boloka ditaelo tša ka, le tla dula leratong la ka go etša ge ke bolokile ditaelo tša Tate gomme ke dula leratong la gagwe.”​—Johane 15:10.

Hlokomela gore Jesu o ile a dula leratong la Modimo ka gore a boloke ditaelo tša Tatagwe. Ke sona seo le rena re swanetšego go se dira lehono. E le gore re dule leratong la Modimo, re swanetše go phela ka go dumelelana le therešo yeo letšatši le letšatši maphelong a rena. Bjona bošegong bjoo, Jesu o itše: “Ge e ba le tseba dilo tše, le a thaba ge e ba le di dira.”​—Johane 13:17.

Re holofela ka pelo ka moka gore puku ye e tla go thuša go tšwela pele o phela ka go dumelelana le therešo bophelong bja gago, ka go re’alo o dule “leratong la Modimo . . . ka tebelelo ya bophelo bjo bo sa felego.”​—Juda 21.