Ka moka ga rena re na le kgetho. Re ka direla Jehofa goba ra direla Sathane le batemona ba gagwe. Re ka se kgone go dira tše ka bobedi. Ke gabohlale gakaakang go direla Jehofa!

Bjalo ka ge re bone, batemona ba thabela go gobatša le go fora batho. Jehofa ga a bjalo. O rata batho go etša ge tate a rata bana ba gagwe. Ke Monei wa “’neô tšohle tše botse, le ’mphô tšôhle di tletšexo.” (Jakobo 1:17) Ga a time batho selo lege e le sefe se sebotse, gaešita le ge se se mo nyaka go gontši.—Ba-Efeso 2:4-7.

Nagana ka dilo tšeo di dirilwego lefaseng ke Jesu, Morwa wa Modimo. O ile a dira gore dimuma di bolele gomme a foufolla difofu. O ile a fodiša balephera le batho ba ba golofetšego. O ile a leleka batemona gomme a fodiša malwetši a mehuta ka moka. Jesu ka matla a Modimo, o ile a ba a tsošetša bahu bophelong.—Mateo 9:32-35; 15:30, 31; Luka 7:11-15.

Go e na le go bolela maaka bakeng sa go re timetša, Modimo o bolela therešo ka mehla. Le ka mohla ga a aketše motho.—Numeri 23:19.

Go fo swana lege bolepu bja seokgo bo tanya le go tatetša ntšhi, batho ba dimilione ba tateditšwe ke tumela-khwele le maaka. Ba boifa bahu. Ba boifa batemona. Ba tshwenegile ka boloi, go hlolelwa madimabe, ditaola le dipheku. Ba tlemilwe ke ditumelo le metlwae yeo e theilwego maakeng a Sathane Diabolo. Bahlanka ba Modimo ga ba tanywe ke selo lege e le sefe sa dilo tše.

Jehofa ke yo matla kudu go feta Sathane. Ge e ba o direla Jehofa, o tla go šireletša go batemona. (Jakobo 4:7) Boloi bo ka se ke bja šoma go wena. Ka mohlala, kua Nigeria dingaka tše tharo tše matla tša ditaola di ile tša dira boloi gore di bolaye Hlatse ya Jehofa yeo e gannego go tloga toropong. Ge boloi bo palelwa, o mongwe ba dingaka tša ditaola o ile a tšhoga, a ya go Hlatse gomme a kgopela go gaugelwa.

Ge e ba batemona ba go hlasela, o ka bitša Jehofa ka leina gomme o tla go šireletša. (Diema 18:10) Eupja e le gore o hwetše tšhireletšo ya Modimo, o swanetše go kgaogana ka mo go feletšego le selo lege e le sefe seo se sepedišanago le bonoge le borapedi bja batemona. Barapedi ba Modimo kua Efeso ya bogologolo ba ile ba dira seo. Ba ile ba kgoboketša dipuku tša bona ka moka tša maleatlana gomme ba di fiša. (Ditiro 19:19, 20) Bahlanka ba Modimo lehono ba swanetše go dira se se swanago. ­Lahla dipheku, dithapo “tša go  šireletša,” dipuku tša maleatlana le selo lege e le sefe seo se tswalanago le mekgwa ya bonoge.

Ge e ba o nyaka go kgahliša Modimo, ga se gwa lekana go fo lahla borapedi bja maaka le go kgaotša go dira dilo tše mpe. O swanetše go diriša ka mafolofolo borapedi bjo bo sekilego. Beibele e bontšha seo se nyakegago:

Sathane le batemona ba na le batho mo lefaseng bao ba rutago le go dira dilo tše fošagetšego. Eupja Jehofa le yena o na le batho. Ke Dihlatse tša Jehofa. (Jesaya 43:10) Lefaseng ka moka go na le Dihlatse tše fetago dimilione tše nne. Ka moka ga bona ba leka ka thata go dira dilo tše di lokilego gomme ba ruta batho therešo. Dinageng tše dintši o ka kopana le bona Holong ya Mmušo, moo ba tlago go go amogela ka borutho.

Modiro wa bona ke go thuša ba bangwe go direla Modimo. Ba tla ithuta Beibele le wena legaeng la gago, ba go thuša go ithuta kamoo o ka rapelago Jehofa ka gona ka tsela e nepagetšego. Ga o a swanela go lefa bakeng sa se. Dihlatse di thabela go ruta therešo ka gobane di rata batho e bile di rata Jehofa Modimo.