KAROLO 2
Go Bolela ka Mmušo—Go Phatlalatša Ditaba tše Dibotse Lefaseng ka Bophara
O ITOKIŠELETŠA go ya tšhemong mesong ya letšatši leo o sa yago mošomong ka lona. Ge o tsoša hlogo, o ikwa o lapile go se nene. O kwa eka o ka napa o eya ka boroko! Eupša o rapela ka seo ke moka wa fetša le pelo gore o ya tšhemong. O šoma tšhemo le kgaetšedi yo a botegago yo a tšofetšego, gomme o kgongwa pelo ke kgotlelelo ya gagwe le botho bja gagwe. Ge o dutše o botša batho molaetša wa therešo ka ntlo le ntlo, o a gopola gore bana beno le dikgaetšedi lefaseng ka bophara ba swaregile ka modiro o swanago, ba diriša dikgatišo tša go swana le tšeo o di swerego gomme le bona ba holwa ke tlhahlo e swanago le yeo o e hwetšago. Ge o boela gae, o ikwa o matlafetše. O leboga gore ga se wa fo itulela gae!
Lehono, bodiredi bja Bokriste ke modiro o mogolo wa Mmušo wa Modimo. Jesu o boletše e sa le pele gore modiro wa boboledi o be o tla gola kudu mehleng ya bofelo. (Mat. 24:14) Boporofeta bjo bo phethagetše bjang? Karolong ye re tlo ithuta ka batho, mekgwa le didirišwa tšeo di thušitšego gore bodiredi bjo bja Bokriste bo atlege, tšeo di thušago batho ba dimilione lefaseng ka moka go bona gore Mmušo wa Modimo ke pušo ya kgonthe.
KAROLONG YE
KGAOLO 6
Batho Bao ba Bolelago Ditaba tše Dibotse—Badiredi ba Ikgafa ka go Rata
Ke ka baka la’ng Jesu a be a kgodišegile gore mehleng ya bofelo o tla ba le batho ba bantši bao ba bolelago ditaba tše dibotse ka go rata? O ka bontšha bjang gore o tsoma Mmušo pele?
KGAOLO 7
Mekgwa ya go Dira Boboledi—Go Diriša Mokgwa le ge e le Ofe go Fihlelela Batho
Ithute ka mekgwa e mefsa yeo batho ba Modimo ba ilego ba e diriša go fihlelela batho ba bantši ka mo go ka kgonegago ka ditaba tše dibotse pele bofelo bo fihla.
KGAOLO 8
Didirišwa tša go Nea Bohlatse—Go Tšweletša Dikgatišo Bakeng sa Tšhemo ya Lefase ka Bophara
Modiro wa rena wa bofetoledi o hlatsela bjang gore Jesu o a re thekga? Ke dintlha dife ka dikgatišo tša rena tšeo di go kgodišago gore Mmušo wa Modimo ke wa kgonthe?
KGAOLO 9
Mafelelo a Modiro wa Boboledi—“Mašemo . . . a Šweufaletše go Bunwa”
Jesu o rutile barutiwa ba gagwe dithuto tše pedi tša bohlokwa mabapi le puno e kgolo ya moya. Dithuto tše di re kgoma bjang lehono?
