MATŠATŠI a lesome ka morago ga ge Jesu a rotogetše legodimong, barutiwa ba gagwe ba ka bago 120 ba ile ba bokana ntlong e itšego kua Jerusalema ka nako ya Monyanya wa Bajuda wa Pentekoste ka 33 C.E. Kapejana, lešata le bjalo ka ledimo le matla le ile la tlala ntlo. Ka mohlolo, barutiwa ba ile ba thoma go bolela ka maleme ao ba bego ba sa a tsebe. Ditiragalo tše tše sa tlwaelegago di be di ka hlaloswa bjang? Modimo o be a neile barutiwa moya o mokgethwa.

Ka ntle go be go e na le lešaba ka ge baeng ba be ba tlile monyanyeng ba e-tšwa dinageng tše dintši. Ruri ba ile ba makatšwa ke go kwa maleme a bona a bolelwa gabotse ke barutiwa ba Jesu! A hlalosa seo se diregilego, Petro o ile a tsopola boporofeta bja moporofeta Joele bja gore Modimo o be a tla “thšêla” moya wa gagwe gore bao ba o amogelago ba hwetše dimpho tša mohlolo. (Joele 2:28, 29) Bohlatse bjo bjo matla bja moya o mokgethwa bo ile bja dira gore go be molaleng gore go diregile phetogo e bohlokwa: Modimo o be a se sa amogela Isiraele, eupša o be a amogela phuthego ya Bokriste yeo e bego e sa tšwa go thewa. Bao ga bjale ba bego ba nyaka go hlankela Modimo ka tsela e amogelegago ba be ba swanetše go ba balatedi ba Kriste.

Kgabagareng, kganetšo e ile ya oketšega gomme manaba a golega barutiwa. Eupša morongwa wa Jehofa o ile a bula mejako ya kgolego bošego gomme a botša barutiwa gore ba tšwele pele ba botša batho ka Modimo. Ge letšatši le hlaba, ba ile ba dira sona seo. Ba ile ba tsena ka tempeleng gomme ba thoma go ruta batho ditaba tše dibotse tša mabapi le Jesu. Baganetši ba bona ba bodumedi ba ile ba galefa gomme ba ba laela gore ba kgaotše go bolela. Ka sebete barutiwa ba ile ba araba ka gore: “Re swanetše go kwa Modimo e le mmuši go e-na le batho.”—Ditiro 5:28, 29.

Tlaišo e ile ya gakala. Bajuda ba bangwe ba ile ba latofatša morutiwa Stefano ka molato wa thogako gomme ba mo kgatla ka mafsika go fihlela a e-hwa. Lesogana le lengwe—Saulo wa Tareso—le be le lebeletše gomme le dumelela polao yeo. Ke moka, le ile la ya Damaseko gore le golege motho le ge e le ofe yo a latelago Kriste. Ge Saulo a le tseleng, seetša seo se tšwago legodimong se ile sa bonega go mo dikologa gomme lentšu la re: “Saulo, Saulo, o ntlhomaretše’ng?” A foufaditšwe ke seetša seo, Saulo o ile a botšiša gore: “Ke wena mang?” Lentšu le ile la araba ka gore: “Ke nna Jesu.”—Ditiro 9:3-5.

Matšatši a mararo ka morago, Jesu o ile a roma morutiwa yo a bitšwago Ananiase gore a dire gore Saulo a bone gape. Saulo o ile a kolobetšwa gomme a thoma go bolela ka sebete mabapi le Jesu. Saulo o ile a tla a tsebja e le moapostola Paulo gomme a ba setho se fišegago sa phuthego ya Bokriste.

Barutiwa ba Jesu ba be ba bolela ditaba tše dibotse tša Mmušo wa Modimo go Bajuda le Basamaria feela. Ga bjale morongwa o ile a tšwelela go Koronelio, e lego molaodi wa madira a Roma yo a boifago Modimo gomme a mmotša gore a romele batho gore ba ye go bitša moapostola Petro. A e-na le banna ba bangwe, Petro o ile a botša Koronelio le ba lapa la gagwe ka Modimo. Ge Petro a dutše a bolela, moya o mokgethwa o ile wa theogela go badumedi bao ba Bantle gomme moapostola Petro a laela gore ba kolobetšwe ka leina la Jesu. Ga bjale tsela ya go hwetša bophelo bjo bo sa felego e be e buletšwe batho ba ditšhaba ka moka. Phuthego e be e itokišeditše go phatlalatša ditaba tše dibotse kgole le kgaufsi.

—E theilwe go Ditiro 1:1–11:21.