BAISIRAELE ba dutše nywaga e mentši Egipita, ba atlega e bile ba ata. Lega go le bjalo, go ile gwa thoma go buša Farao yo mongwe. Mmuši yo o be a sa tsebe Josefa. Ka ge e be e le mogateledi yo sehlogo yo a bego a boifa go ata ga Baisiraele, o ile a ba dira makgoba gomme a laela gore maitšibulo a bona ka moka a bašemane a lahlelwe ka Nokeng ya Nile. Eupša mma yo mongwe yo a nago le sebete o ile a šireletša lesea la gagwe gomme a le uta ka sešegong gare ga mahlaka-noka. Morwedi wa Farao o ile a hwetša lesea leo gomme a le rea leina la Moše, ke moka a le godišetša ka lapeng la bogoši Egipita.

Ge Moše a be a e-na le nywaga e 40, o ile a tsena mathateng ge a be a šireletša lekgoba la Moisiraele go monei-mošomo wa Moegipita. Moše o ile a tšhabela nageng ya kgole moo a ilego a dula gona e le motšhabi. Ge Moše a be a e-na le nywaga e 80, Jehofa o ile a mo romela Egipita gore a ye pele ga Farao gomme a mmotše gore a lokolle batho ba Modimo.

Farao o ile a gana a tiišitše. Ka gona, Modimo o ile a otla Egipita ka dikotlo tše lesome. Nako e nngwe le e nngwe ge Moše a be a e-tla go Farao gore a mo nee sebaka sa go phema kotlo e latelago, Farao o ile a gana, a nyatša Moše gotee le Modimo wa gagwe, Jehofa. Mafelelong, kotlo ya lesome e ile ya bolaya maitšibulo ka moka nageng—ka ntle le a malapa ao a ilego a kwa Jehofa gomme a tlotša dikosene tša ona ka madi a kwana ya sehlabelo. Morongwa wa Modimo yo a bego a tlile go bolaya maitšibulo o ile a feta malapeng ao. Ka morago ga moo, Baisiraele ba be ba gopola phološo ye e kgahlišago ka go bina monyanya wa ngwaga le ngwaga o bitšwago Paseka.

Ka ge a be a lahlegetšwe ke morwa wa gagwe wa leitšibulo, Farao o ile a laela Moše le Baisiraele ka moka gore ba tšwe Egipita. Gatee-tee ba ile ba rulaganya gore batho ba sepele. Eupša Farao o ile a fetoša monagano wa gagwe. O ile a ba lelekiša a e-na le bahlabani ba bantši le dikoloi tša ntwa. Go be go bonala Baisiraele ba kgakgetšwe lebopong la Lewatle le Lehwibidu. Jehofa o ile a aroganya Lewatle le Lehwibidu gomme a dumelela Baisiraele gore ba fete mmung o omilego, meetse a ba tsentše gare! Ge Baegipita ba tsena ka lewatleng ka lebelo, Modimo o ile a dira gore meetse a kopane ka lebelo gomme a khupetša Farao le madira a gagwe.

Ka morago, ge Baisiraele ba be ba le Thabeng ya Sinai, Jehofa o ile a dira kgwerano le bona. A diriša Moše e le mmoelanyi, Modimo o ile a nea Baisiraele melao yeo e bego e tla ba hlahla le go ba šireletša mo e ka bago karolong e nngwe le e nngwe ya bophelo. Ge feela Baisiraele ba be ba amogela pušo ya Modimo ka potego, Jehofa o be a tla ba le bona gomme a dire gore setšhaba seo e be tšhegofatšo ditšhabeng tše dingwe.

Lega go le bjalo, bontši bja Baisiraele ka mo go nyamišago bo ile bja bontšha go hloka tumelo go Modimo. Ka baka leo, Jehofa o ile a dira gore moloko woo o ralale lešokeng ka nywaga e 40. Ke moka, Moše o ile a laela Jošua yo a lokilego gore a etelele setšhaba pele. Mafelelong, Baisiraele ba be ba le kgaufsi le go tsena nageng yeo Modimo a bego a e holofeditše Aborahama.

—E theilwe go Ekisodo; Lefitiko; Numeri; Doiteronomio; Psalme 136:10-15; Ditiro 7:17-36.