THUTO 01
Beibele e ka go Thuša Bjang?
Ka moka ga rena, re nyaka go tseba gore ke ka baka la eng re phela, re welwa ke mathata, re ehwa, le gore bophelo bo tlo ba bjang nakong e tlago. E bile re nyaka go tseba gore ke mang a ka re thušago go rarolla mathata a rena. Mathata a go swana le gore re ka dira eng gore re hwetše tšhelete e lekanego gore re kgone go itlhokomela, le gore re ka dira eng gore re dule re thabile ka lapeng. Batho ba bantši ba hweditše gore Beibele e ba arabela dipotšišo tše bohlokwa, e bile e ba thuša gore ba bone gore ba swanetše go dira eng gore ba phele gabotse. Ka moka ga rena Beibele e ka re thuša.
1. Ke dipotšišo dife tše dingwe tšeo Beibele e ka di arabago?
Beibele e araba dipotšišo tše bohlokwa tša go swana le tšeo di rego: Bophelo bo thomile bjang? Ke ka baka la’ng re phela? Ke ka baka la’ng batho ba go loka ba welwa ke mathata? Ge motho a ehwa go direga’ng ka yena? Ge e ba batho ka moka ba nyaka go phela ka khutšo, gona ke ka baka la’ng go na le dintwa tše dintši mo lefaseng? Go tlo direga’ng ka lefase nakong e tlago? Beibele e na le dikarabo tša dipotšišo tše, le gona ga se phošo go nyaka go tseba dikarabo tša tšona.
2. Beibele e ka re thuša bjang gore re thabele bophelo?
Beibele e re nea keletšo e botse. Ka mohlala, e re botša gore re ka dira eng gore re dule re thabile ka lapeng, ge re na le stress, le gore re ka thabela mešomo ya rena bjang. Ge re dutše re ithuta poroutšha ye, Beibele e tlo re arabela dipotšišo tšeo re boletšego ka tšona, le tše dingwe tše dintši. E bile o tlo bona gore ‘Mangwalo ka moka, ao a lego ka Beibeleng, a a re hola.’—2 Timotheo 3:16.
Poroutšha ye ga e tšeele Beibele legato. Go e na le moo, e go kgothaletša gore o ipalele Beibele ka bowena. Ka gona, re go kgothaletša gore le ge o le nnoši, o ipalele mangwalo ao a lego ka mo poroutšheng ye, gomme o a bapiše le seo o ithutago sona.
ITHUTE KA MO GO TSENELETŠEGO
Ekwa gore Beibele e thušitše batho ba bangwe bjang, gore o ka dira eng gore o thabele go e bala, le gore ke ka baka la eng o swanetše go kgopela batho ba bangwe gore ba go thuše go e kwešiša.
3. Beibele e re bontšha tsela
Beibele e swana le seetša se segolo. E ka re hlahla, goba ya re thuša gore re kgone go dira diphetho tše dibotse, le go re botša dilo tšeo di tlago go direga nakong e tlago.
Balang Psalme 119:105, gomme le boledišaneng ka dipotšišo tše di latelago:
-
Mongwadi wa Psalme ye, o be a lebelela Beibele bjang?
-
Wena o lebelela Beibele bjang?
4. Beibele e ka araba dipotšišo tša rena
Mosadi yo mongwe o ile a bona gore Beibele e mo arabetše dipotšišo tše bohlokwa, tšeo a bego a dutše a ipotšiša tšona ka mengwaga e mentši. Bapalang BIDIO ye, gomme le boledišaneng ka dipotšišo tše di latelago:
-
Ke dipotšišo dife tšeo mosadi wa mo bidiong ye a bego a ipotšiša tšona?
-
Go ithuta Beibele go ile gwa mo thuša bjang?
Beibele e re kgothaletša gore re botšiše dipotšišo. Balang Mateo 7:7, gomme le boledišaneng ka potšišo e latelago:
-
Ke dipotšišo dife tšeo o ipotšišago tšona, tšeo o nyakago Beibele e go arabela tšona?
5. O ka thabela go bala Beibele
Batho ba bantši ba thabela go bala Beibele, e bile e a ba hola. Bapalang BIDIO ye, gomme le boledišaneng ka dipotšišo tše di latelago:
-
Bafsa ba mo bidiong ye ba ikwa bjang ka go bala?
-
Le ge ba sa rate go bala, ke ka baka la’ng ba rata go bala Beibele?
Beibele e a re ruta le go re homotša, e bile e re tshepiša gore dilo di tla loka nakong e tlago. Balang Baroma 15:4, gomme le boledišaneng ka potšišo e latelago:
-
Ka ge gona bjale o tseba gore Beibele e a re homotša le gore e re tshepiša gore dilo di tla loka nakong e tlago, se se dira gore o ikwe bjang?
6. Batho ba bangwe ba ka re thuša gore re kwešiše Beibele
Batho ba bantši ba bone go le kaone gore ba ithute Beibele ba thušwa ke batho ba bangwe, go e na le gore ba no ipalela yona ba le nnoši. Balang Ditiro 8:26-31, gomme le boledišaneng ka potšišo e latelago:
-
Re ka dira’ng gore re kwešiše Beibele?—Bona temana 30 le 31.
Go no swana le ge monna wa Moethiopia a be a hloka thušo ya go kwešiša Mangwalo, batho ba bantši lehono le bona ba hwetša go le kaone gore ba ithute Beibele ba thušwa ke batho ba bangwe
BATHO BA BANGWE BA RE: “Go ithuta Beibele ke go senya nako.”
-
Wena o re’ng? Go re’ng o re’alo?
O ITHUTILE ENG?
Beibele e re nea keletšo yeo re ka e dirišago maphelong a rena, e re arabela dipotšišo tše bohlokwa, e bile e a re homotša le go re tshepiša gore nakong e tlago, dilo di tla loka.
Dipotšišo
-
Beibele e ka re nea keletšo efe?
-
Ke dipotšišo dife tše dingwe tšeo Beibele e di arabago?
-
Ke dilo dife tšeo wena o ka ratago go ithuta tšona ka Beibeleng?
ITHUTE KA MO GO OKETŠEGILEGO
Ekwa kamoo Beibele e ka re thušago ka gona lehono.
“Dithuto tša Beibele—Bohlale bjo bo sa Šiiwego ke Nako” (Morokami wa No. 1 2018.)
Bona kamoo Beibele e ilego ya thuša monna yo mongwe, yoo a bego a thatafalelwa ke go lebala dilo tšeo di kilego tša mo diragalela e sa le yo monyenyane.
Ithute mangwalo a Beibele ao a ka go thušago gore o thabe ka lapeng.
“Dilo tše 12 Tšeo di Dirago Gore Lapa le Thabe” (Phafoga! ya No. 2 2018.)
Batho ba bantši ga ba tsebe gore ge e le gabotse ke mang yo a laolago lefase. Eupša ekwa gore Beibele e re le laolwa ke mang.
Ke ka Baka la Eng re Swanetše go Ithuta Beibele? —Bidio Yeo e Feletšego (3:14)
You May Also Like
DIPOTŠIŠO TŠEO DI BOTŠIŠWAGO KUDU
Thuto ya Beibele ke Eng?
Hwetša dikarabo tša dipotšišo tša mabapi le thuto ya rena ya mahala ya Beibele.
