Ka Labohlano, July 5, 2013, lapa la Bethele ya United States le ile la thaba kudu ge le be le ekwa Anthony Morris wa Sehlopha se Bušago a tsebiša gore: “Ka Labone, July 4, 2013, go ile gwa fihlelelwa tumelelano ya go rekiša meago e tshelelago yeo e akaretšago meago yeo e lego 117 Adams Street le 90 Sands Street kua Brooklyn. Go rekišwa ga Moago wa pele go ya go wa bohlano go ra gore re swanetše go ba re tšwele meagong yeo magareng ga August lenyaga.”

Ngwanabo rena Morris o hlalositše gore Lefapha la Bohlatswetšo le la Dry Clean, ao a lego lebatong la botshelela le la bošupa Moagong wa boraro, a tla tšwela pele a šoma moo go fihlela magareng ga 2014. O itše: “Mohlomongwe  moagong wa 90 Sands Street re tla huduga ka 2017.”

Go rekišwa ga meago ye e megolo e tshelelago ke karolo ya maiteko a go huduša ntlokgolo ya lefase ya Dihlatse tša Jehofa kua New York City go e iša lefelong la diheketara tše 102 kua Warwick, New York. Lega go le bjalo, go lokišeletša lefelo leo la moago go be go ka se thome go fihlela go hweditšwe mangwalo a semolao a go nea tumelelo ya gore go agiwe.

Ka gona, ka Labone, July 18, lapa la Bethele ya United States le ile la theetša ka phagahlo tsebišo yeo e ilego ya balwa ke Mark Sanderson wa Sehlopha se Bušago yeo e bego e re: “Re thabela go le tsebiša gore bošegong bja Laboraro, July 17, Warwick Planning Board e dumelelane le polane ya moago wa ntlokgolo e mpsha ya Dihlatse tša Jehofa. Ye ke tumelelo ya mafelelo yeo e nyakegago gore re hwetše ditumelelo tša go thoma go aga. Ke mo go kgahlišago go tseba gore tumelelo ya bošegong bja maabane e tlile nywaga e mene tlwaa go tloga letšatšing leo re feditšego ka lona go reka setsha sa Warwick. Go oketša moo, ditiragalo tša matšatšing a sego kae a fetilego tšeo di lebišitšego gore re hwetše tumelelo ye ke bohlatse bjo bogolo bja gore Jehofa o a re šegofatša.” Ngwanabo rena Sanderson o ile a leboga yo mongwe le yo mongwe ka go šoma ka thata le ka go rapela go tšwa pelong gore mošomo wo o bohlokwa o atlege. O itše: “Ka godimo ga tšohle, re tumiša Jehofa le go mo leboga ka go kgona go thoma mošomo wo wa bohlokwa wa go hudušetša ntlokgolo ya lefase kua Warwick, New York.”

Ka Labohlano, July 26, Ngwanabo rena Morris o ile a ba le seboka le baithaopi ba 1 000 ba Bethele le ba Komiti ya  tša Meago ya Tikologo ka phapošing ya go jela kua Tuxedo, New York, e lego lefelo leo go beilwego ditlabakelo tša modiro wa go aga wa Warwick. Ka morago ga go ba aga moyeng, o ile a bolela gore go na le tsebišo yeo a swanetšego go e dira. Ngwanabo rena Morris o itše: “Mo seatleng sa ka ke swere selo seo ke sa tšwago go se amogela seo ke nyakago go se abelana le lena. Karolo ya ka godimo ya fomo ye e re: ‘Tumelelo ya go Aga.’” Pele a ka ya kgole, baithaopi ba ile ba opa magoswi. Ngwanabo rena Morris o ile a tšwela pele ka go bala dikarolo tša tumelelo ya mathomo e kgolo ya go aga yeo e ntšhitšwego ke toropo ya Warwick diiri tše tharo pele ga moo, gomme seo sa thabiša bohle bao ba bego ba le gona.

Ga e sa le mošomo wa go katološa meago o thomile kua Wallkill ka August 2009, bana babo rena le dikgaetšedi ba e ka bago ba 2 800 ba hlanketše moo e le baithaopi ba nakwana. Mošomo woo o akaretša go agwa ga moago o mofsa wa bodulo, lefelo la go phaka dikoloi le diofisi. O mongwe wa meago ya bodulo o a lokišwa, le gona go dirwa diphetogo lefelong la go gatiša, bohlatswetšo, holo, moagong wa ditlabakelo le moo go gorogelago baeng. Go letetšwe gore modiro wa go katološa meago o tšwele pele go fihlela mafelelong a 2015.

Go dutše go le bjalo, modiro wa go aga ntlokgolo e mpsha ya lefase o thomile kua Warwick. Dikgweding tše sego kae ga e sa le modiro o thomilwe, go be go dutše go kgorwa le go lokišeletša lefelo leo go thoma go aga gotee le go tsenya diphaephe tša ka tlase ga mmu. Go agwa ga meago ya pele e meraro, e lego Lefelo la go Lokiša Dikoloi, Lefelo la go Phaka Dikoloi tša Baeng le Moago wa go Lokiša Ditlabakelo go thomilwe mafelelong a 2013. Meago ye e bohlokwa kudu bakeng sa go hlokomela didirišwa le batho  bao ba šomago moo nakong ya ge go agiwa le ge go tla be go fedile. Ka morago ga moo go tla agiwa meago ya bodulo, Diofisi le Moago wa Ditlabakelo yeo go rulagantšwego gore e thongwe ka 2014.

Setho sa Komiti ya Modiro wa go Aga e lego Kenneth Chernish o hlalosa gore lefelo la kua Tuxedo, e lego setsha sa diheketara tše 20 seo se lego dikhilomithara tše e ka bago tše lesome ka leboa la Warwick, “ke lona le thekgago go agwa ga ntlokgolo e mpsha kua Warwick. Ba bangwe ba baithaopi ba tla dula moo le gona go tla apeelwa moo, gwa bewa ditlabakelo le didirišwa tša go aga.” E le gore go akgofišwe modiro wa go aga kua Tuxedo, Dikomiti tše mmalwa tša Meago tša Tikologo tša ka bohlabela bja United States di thuša ka dikarolo tše itšego tša modiro.

Baithaopi ba bantši bao ba šomago le Dikomiti tša Meago tša Tikologo nageng ka bophara le bona ba fagahletše go tšea karolo modirong wa go aga ntlokgolo e mpsha ya lefase. Bana babo rena le dikgaetšedi bao ba nago le bokgoni ba šetše ba ithaopetše go šoma ka nakwana mafelong a. Leslie Blondeau, yoo yena le monna wa gagwe e lego Peter ba šomago go tsenya dipompi le diphaephe, o re: “Go šoma gotee go dira gore re batamelane kgauswi e bile go dira gore re be le dilo tšeo re tlago go di gopola ka nako e telele.”

Mallory Rushmore o re: “Ga bjale ke šoma le bao ba tsenyago mohlagase mo Tuxedo. Letšatši le lengwe le le lengwe le kgahliša kudu. Go a thabiša go bona baithaopi ka moka ba šoma gotee.”

Quincy Dotson o re: “Ye ke tokelo e kgolo kudu. Ke be ke nagana gore ke tlo lahlegelwa kudu, eupša ge e le gabotse ke holega go feta kamoo ke bego ke naganne.”

Ngwanabo rena Chernish o re: “Ke mo go kgahlišago kudu go tšea karolo modirong wo. Bana babo rena le dikgaetšedi ba šoma ka lebelo le ka bokgwari, e bile ba thabela mošomo wa bona kudu.”